ខេត្តបន្ទាយមានជ័យ ៖ កម្លាំងអាវុធហត្ថឃាត់ខ្លួនជនសង្ស័យម្នាក់ បានធ្វើសកម្មភាពចែកចាយគ្រឿងញៀននៅតាមតំបន់ជាយដែនកម្ពុជា ថៃ កសាងសំណុំរឿងបញ្ជូនទៅតុលាកាចាត់ការតាមនិតិវិធីបន្ទាប់ពីអាវុធហត្ថក្រុងប៉ោយប៉ែតបញ្ជូនមកនារសៀលថ្ងៃទី២៩ខែសីហាឆ្នាំ២០១៤។
ករណីបង្ក្រាបនេះកម្លាំងអាវុធហត្ថក្រុងប៉ោយប៉ែតធ្វើឡើងនៅយប់ថ្ងៃទី២៨ ខែសីហា ឆ្នាំ២០១៤ ត្រង់ចំណុចភូមិក្បាលស្ពាន១ សង្កាត់-ក្រុងប៉ោយប៉ែត ខេត្តបន្ទាយមានជ័យ។
ឯកឧត្តម ឧត្តមសេនីយ៍ត្រី ឱ បូរិន មេបញ្ជាការអ ហខេត្តបន្ទាយមានជ័យ បានប្រាប់នៅល្ងាចថ្ងៃទី២៩ ខែសីហា នេះថា ជនសង្ស័យខាងលើនេះគឺត្រូវបានកម្លាំងអ ហក្រុងប៉ោយប៉ែត ធ្វើការឃាត់ខ្លួន បន្ទាប់ពីជនសង្ស័យធ្វើសកម្មភាពចែកចាយគ្រឿងញៀនយ៉ាងសកម្មនៅតំបន់ជាយដែនកម្ពុជា ថៃ ។លោកបានបន្តថា ជនសង្ស័យខាងលើនេះមានឈ្មោះ សុខ មីហ្គេល ហៅបារាំង ភេទប្រុស អាយុ២០ឆ្នាំ មានលំនៅឋានភូមិកើតហេតុខាងលើនេះ សមត្ថកិច្ចបានដកហូតបានវត្ថុតាង មានគ្រឿងញៀន មេតំហ្វេតាមីន ទឹកកក ចំនួន១ថងតូច និងទូរស័ព្ទ២គ្រឿងផងដែរ។
ក្រោយពីឃាត់ខ្លួនជនសង្ស័យបានសារភាពចំពោះមុខសមត្ថកិច្ចថា គ្រឿងញៀនទាំងនេះ ពិតជារបស់គេមែន ព្រមទាំងបានប្រព្រឹត្តល្មើសច្បាប់ថែមទៀតផង ។
បច្ចុប្បន្ន ត្រូវបានសមត្ថកិច្ចជំនាញកសាងសំណុំរឿងជនសង្ស័យខាងលើដើម្បីបញ្ជូនតុលាកាដើម្បីចាត់ការតាមផ្លូវច្បាប់ ៕
