ខេត្តបន្ទាយមានជ័យ៖ រថយន្តឆ្លាម១គ្រឿងបើកលឿនជ្រេវ៉ារថយន្តផ្សេងទៀតក្នុងទិសដៅពីជើងទៅទិសត្បូងធ្លាក់ទឹកប្រឡាយ ក្រោយពីសមត្ថកិច្ចព្យាយាមទាញរថយន្តឆ្លាមពីក្នុងទឹកប្រឡាយឃើញបុស៣នាក់បានស្លាប់បាត់បង់ជីវិតបាត់ហើយ។
ហេតុការណ៍នេះបានកើតឡើងនៅម៉ោង៥និង៣០នាទីល្ងាច ថ្ងៃទី០៤ ខែកញ្ញា ឆ្នាំ២០១៦ នៅតាមបណ្តោយកំណាត់ផ្លូវជាតិលេខ៥ ទល់មុខមន្ទីរសុខាភិបាលខេត្តបន្ទាយមានជ័យ។
លោក សួន នីប៉ូ ប្រធានផ្នែកចរាចរណ៍ផ្លូវគោកបានអោយដឹងថា បើតាមសម្តីសាក្សីបានប្រាប់សមត្ថកិច្ចថារថយន្តឆ្លាមមួយគ្រឿងបានបើកបរពីជើងទៅត្បូង។ លុះបើកមកដល់ចំនុចកើតហេតុខាងលើ រថយន្តនេះបានឡើងជែងជាមួយរថយន្តមួយផ្សេងទៀតក្នុងស្ថានភាពគ្រោះថ្នាក់ហើយក៏រេចង្កូតធ្លាក់ផ្លូវចូលទៅក្នុងទឹកលិចរថយន្តតែម្តង។
ចំពោះករណីគ្រោះថ្នាក់ចរាចរនេះសមត្ថកិច្ចសន្និដ្ឋានថាគឺបណ្តាលមកពីបើកបរជែងក្នុងស្ថានភាពគ្រោះថ្នាក់ហើយមានជាតិស្រវឹង។
ក្រោមការជួយអន្តរាគមន៍ពីប្រជាពលរដ្ឋនិងសមត្ថកិច្ចអស់រយេះពេលយ៉ាងយូរទើបទាញជនរងគ្រោះចេញបានចំនួនបីនាក់។ ជនរងគ្រោះត្រូវបានសមត្ថកិច្ចបញ្ជាក់ថាបានស្លាប់បាត់បង់ជីវិតទៅហើយគ្រាដែលរថយន្តលិចទៅក្នុងទឹក ហើយអ្នកជួយសង្គ្រោះយូរពេក។
សាក្សីបានអោយដឹងថាជនរងគ្រោះទាំងបីនាក់ គឺជាគ្រូបង្រៀននៅសាលាបឋមសិក្សាឬស្សីក្រោកដែលស្ថិតក្នុងស្រុកមង្គលបូរី ខេត្តបន្ទាយមានជ័យ។
បច្ចុប្បន្នសពទាំងបីនាក់ត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី រីឯរថយន្តសមត្ថកិច្ចកំពុងស្ទូចយកទៅរក្សាទុកនៅការិយាល័យចរាចរណ៍ខេត្ត៕
