ខេត្តបន្ទាយមានជ័យ ៖ នៅតាមការិយាល័យចុះឈ្មោះបោះឆ្នោតក្នុងខេត្តបន្ទាយមានជ័យនិមួយៗប្រជាពលរដ្ឋបាននាំគ្នាទៅចុះឈ្មោះបោះឆ្នោតយ៉ាងសស្រាក់សស្រាំដោយស្ងៀមស្ងាត់ពុំមានបាតុភាពអ្វីកើតឡើងនៅតាមការិយាល័យចុះឈ្មោះបោះឆ្នោតនីមួយៗនោះឡើយហើយបើគិតត្រឹមថ្ងៃទី៣ខែកញ្ញា ឆ្នាំ២០១៦មានរយៈពេល ២កន្លះនេះមានប្រជាពលរដ្ឋជាអ្នកមានសិទ្ធិបោះឆ្នោត នៅខេត្តបន្ទាយមានជ័យ បានទៅចុះឈ្មោះបោះឆ្នោតថ្មី បានចំនួន ១៤.៤៧១ នាក់ លើចំនួន ៤៧៤.៨០៣ នាក់ នៃអ្នកត្រូវចុះឈ្មោះទាំងអស់ក្នុងខេត្តបន្ទាយមានជ័យ។នៅព្រឹកថ្ងៃទី៣ខែកញ្ញា ឆ្នាំ២០១៦នេះ សួន បវរ អភិបាលខេត្តបន្ទាយមានជ័យនិងលោក វ៉ៃ គេងលីអភិបាលក្រុងសិរីសោភ័ណបានអញ្ជើញចូលរួមចុះឈ្មោះបោះឆ្នោតថ្មីនៅការិយាល័យចុះឈ្មោះបោះឆ្នោតក្នុងសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យដើម្បីបំពេញកាតព្វកិច្ចជាពលរដ្ឋខ្មែរ។
ថ្លែងនៅក្នុងពិធីចុះឈ្មោះបោះឆ្នោតនោះឯកឧត្តម សួន បវរ បានមានប្រសាសន៍ថាក្នុងនាមលោកជាប្រធានគណៈបញ្ជាការឯកភាពខេត្តមុនចុះឈ្មោះបោះលោកបានឲ្យកំលាំងសមិត្ថកិច្ចទាំងអស់ត្រូវបង្កើនការប្រុងប្រយ័ត្នការពារថែរក្សា សុវត្ថិភាពសន្តិសុខសណ្តាប់ធ្នាប់ ពិសេសនោះនៅតាមការិយាល័យចុះបោះឆ្នោតនិមួយៗឲ្យបានល្អជាសវាងអសន្តិសុខកើតឡើង។ឯកឧត្តម សួន បវរ បានបញ្ជាក់ទៀតថាប្រជាពលរដ្ឋមានសិទ្ធចុះឈ្មោះបោះឆ្នោតបានលុះត្រាណាតែប្រជាពលរដ្ឋណាមានអាយុចាប់ពី១៨ឆ្នាំឡើងនិងមានអត្តសញ្ញាណប័ណ្ណសញ្ជាត្តិខែ្មរបើទោះបីចាស់ក្តីថ្មីក្តីក៏អាចចុះឈ្មោះបានទាំងអស់តែបើគ្មានអត្តសញ្ញាណប័ណ្ណសញ្ជាត្តិខែ្មរវិញអាចជំនួសសៀវភៅគ្រួសារ បញ្ជីជាតិកំណើតនិងរូបថត២សន្លឹកនិងសាក្សី២នាក់អាចចុះឈ្មោះបានហើយ។
ហើយក្នុងការចុះឈ្មោះនេះមានរយៈពេល៣ខែរាប់ទាំងថ្ងៃសៅរ៍និងថ្ងៃអាទិត្យផងដែរក្នុងរយះពេល៣ខែនេះពលរដ្ឋណាមិនបានមកចុះឈ្មោះបោះឆ្នោតនោះទេមិនអាចចុះឈ្មោះបន្តទៀតបានឡើយ។ឯកឧត្តម សួន បវរ ក៏បានធ្វើការអំពាវនាវឲ្យប្រជាពលរដ្ឋទាំងអស់រួតរះនាំគ្នាទៅចុះឈ្មោះបោះឆ្នោតឲ្យបានគ្រប់គ្នាព្រោះនេះជាកាតព្វកិច្ច របស់បងប្អូនគ្រប់រូបក្នុងនាមជាពលរដ្ឋខ្មែរដើម្បីចូលរួម បោះឆ្នោតជ្រើសរើសក្រុមប្រឹក្សាឃុំ សង្កាត់នៅ ឆ្នាំ២០១៧និងបោះឆ្នោតជើសតាំងតំណាងរាស្ត្រនៅឆ្នាំ២០១៨ផងដែរ។ប្រជាពលរដ្ឋទាំងប្រុសស្រីដែលនាំគ្នាមកចុះឈ្មោះបោះឆ្នោតនេះបាននិយាយគ្រប់ៗគ្នាថាការចុះឈ្មោះបោះឆ្នោតដោយកុំព្យូទ័រលើកនេះពិតជាត្រឹមត្រូវមានភាពយុត្តិធម៌ល្អដែលអាចទទួលយកបានប្រជាពលរដ្ឋម្នាក់សង្ឃឹមថា បោះឆ្នោតនៅពេលខាងមុខនេះអាចទទួលយកជាផ្លូវការបានមិនមានការសង្ស័យទៀតនោះឡើយ៕
