ភ្នំពេញ ៖ ក្រុមចោរដៃឆៃ បាញ់៥គ្រាប់ សម្លាប់ជនរងគ្រោះព្រោះប្លន់យកម៉ូតូគ្រឿង កាលពីវេលាម៉ោង ១:៣០នាទីយប់ឈានចូលទី០១ ខែកញ្ញា ឆ្នាំ ២០១៦ ស្ថិតតាមបណ្តោយផ្លូវលេខ ៥៩២ ក្នុងសង្កាត់បឹងកក់២ ខណ្ឌទួលគោក ទល់មុខហាង ម៉េងលី ។
នារីម្នាក់ឈ្មោះ ស្រីនុច អាយុ ២២ ឆ្នាំ ស្នាក់នៅសង្កាត់ភ្នំពេញថ្មី ខណ្ឌសែនសុខ ត្រូវជាសង្សាជនរងគ្រោះបានប្រាប់សមត្ថកិច្ចថា មុនពេលកើតហេតុ គេជាមួយមិត្តប្រុសជនរងគ្រោះឈ្មោះ ស្រីផានិត្រ អាយុ ២៤ ឆ្នាំ មុខរបរនិស្សិតពេទ្យ ឆ្នាំទី៥ នៅ IU ស្នាក់នៅសំណង១២ សង្កាត់ទឹលល្អក់៣ ខណ្ឌទួលគោក ដោយពួកគេទើបតែចេញពីជួបជុំគ្នាជាមួយបងប្អូន នៅខារ៉ាអូនខេ ឈិងចាងនៅម្តុំស្ពានអាកាស៥មករា លុះពេលដល់ម៉ោង១មួយយប់ពួកគេក៏នាំគ្នាចេញទៅផ្ទះ ដោយពេលនោះ បុរសរងគ្រោះបានជិះម៉ូតូមួយគ្រឿងម៉ាក Zoomer X ពណ៌ ខៀវ ពាក់លេខ ភ្នំពេញ 1642 ចាំលេខនៅខាងក្រោយ បានជិះធ្វើដំណើរតាមបណ្តោយផ្លូវលេខ ៥៩២ ក្នុងទិសដៅពីកើតទៅលិច ក្នុងគោលបំណងជូននាងជាសង្សាទៅផ្ទះ នៅភ្នំពេញថ្មី ហើយពេលនោះ ស្រាប់តែមកដល់ចំណុចកើត ក៏មានជនសង្ស័យពីរនាក់ជិះម៉ូតូមួយគ្រឿងម៉ាក ស្តុបពីរ ពណ៌ស មិនចាំស្លាកលេខ បានព្យាយាមជិះតាមកៀរម៉ូតូរបស់គេ (ជនរងគ្រោះ) ពីក្រោយរហូតមកដល់មុខហាង ម៉េងលី ក៏ធ្វើជនរងគ្រោះរេចង្កួចម៉ូតូទៅប៉ះម៉ូតូកង់បីដែលគេចតចោលនៅចិញ្ចើមផ្លូវ បណ្តាលអោយដួល ហើយភ្លាម ៗនោះបក្ខពួកជនល្មើសបានដកកាំភ្លើងខ្លី ភ្ជុង់ប្លន់យកម៉ូតូតែ ពួកគេ(ជនរងគ្រោះ) មិនព្រមអោយក៏ប្រទាងប្រទុងគ្នា ហើយក៏លឺសំលេង គ្រាប់កាំភ្លើងជាច្រើនគ្រាប់ ធ្វើអោយជនរងគ្រោះដេញដួលនៅថ្លុកឈាមបាត់ទៅហើយ ។ បន្ទាប់ពីកើតហេតុក្ម្រមចោរក៏លើកម៉ូតូរបស់ជនរងគ្រោះជិះចេញទីបាត់ស្រមោលតែម្តង។
ទោះជាយ៉ាងណាជនរងគ្រោះត្រូវបានមិត្តកក្រ័ដឹកតាមម៉ូតូកង់បីយកសង្គ្រោះនៅមន្ទីរពេទ្យលោកសង្ឃ ដោយស្ថានភាពធ្ងន់ធ្ងរពេកជនរងគ្រោះ បានស្លាប់បាត់បង់ជីវិត ព្រោះត្រូវគ្រាប់កាំភ្លើង៥ គ្រាប់សុទ្ធតែចំណុចសំខាន់ ។
សមត្ថកិច្ចកំពុងសាកសួរនារីជាសង្សាចំពោះភិភាគជនល្មើសក្នុងករណីបាញ់ប្លន់សម្លាប់ដ៍សាហាវនេះផងដែរ ៕
