បាត់ដំបង ៖ កាលពីថ្ងៃទី១ ខែវិច្ឆិកា ឆ្នាំ២០១៤ នៅមុខសាលាបៀលប្រាយ ភូមិសង្កាត់ចំការសំរោង ក្រុងបាត់ដំបង មានប្រារព្ធពិធីសម្ពោធបើកការដ្ឋានពង្រីកផ្លូវក្រាលកៅស៊ូ ប្រវែង១៩៥០ម៉ែត្រ ទទឹង៧ម៉ែត្រ និងប្រឡាយមេប្រវែង៣៧៥០ម៉ែត្រ ក្រោមអធិបតីភាព ឯកឧត្តម ងិន ឃន តំណាំងរាស្ត្រមណ្ឌលបាត់ដំបង ឯកឧត្តម ជូ គឹមឡេង រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង ។ អញ្ជើញមានវត្តមាន ក្នុងពិធីនោះ រួមមានឯកឧត្តម លោកជំទាវ លោកឧកញ៉ា សមាជិក សមាជិការ ក្រុមប្រឹក្សាខេត្ត អភិបាលរងខេត្ត លោកស្នងការ លោកមេបញ្ជាការកងរាជអាវុធហត្ថខេត្ត លោកមេបញ្ជាករតំបន់ប្រតិបត្តិការសឹករងខេត្ត លោក លោកស្រី ប្រធាន អនុប្រធានមន្ទីរជុំវិញខេត្ត ក្រុមប្រឹក្សាក្រុង សង្កាត់ និងប្រជាពលរដ្ឋនៅសង្កាត់ស្លាកែត សង្កាត់ចំការសំរោង និងសង្កាត់ក្តុលដូនទាវ ជាច្រើនរយអ្នក ។
លោក សៀង ឯម វូនស្ហី អភិបាលក្រុងបាត់ដំបង បានអោយដឹងថា ផ្លូវក្រាលកៅស៊ូលេខ៥១៥ ពីគល់ស្ពានឧត្តរៈ សង្កាត់ស្លាកែត ទៅដល់ផ្លូវបំបែកស្រែមួយពាន់ សង្កាត់ចំការសំរោងប្រវែង១៩៥០ម៉ែត្រ ត្រូវពង្រីកអោយបានទទឹង៧ម៉ែត្រ និងដាក់លូមុខកាត់១០០លូ សងខាងផ្លូវ ស្មើប្រវែង៣៦៥ម៉ែត្រ បន្ថែមទៀត ។ មានលូកាត់ទទឹង ៤ កន្លែង និងប្រឡាយមេ រំដោះទឹកចេញពីទីក្រុងប្រវែង ៣៧៥០ ម៉ែត្រ ទទឺងមាត់លើ៨ម៉ែត្រ និងផ្លូវក្រាលគ្រួសក្រហម អមសងខាងប្រឡាយ ពីភូមិពោធិ៍ម៉ស្រីដល់ស្រុកឯកភ្នំ ។ មានប្រឡាយរងពីភូមិពោធិ៍ម៉ស្រី មកផ្លូវស្រែមួយរយប្រវែង៤០០ម៉ែត្រ ក្នុងនាមរដ្ឋបាលក្រុងបាត់ដំបង និងជំនួសមុខ អោយប្រជាពលរដ្ឋក្រុងបាត់ដំបង សូមថ្លែងអំណរសាទរ ត្រេកអរជាអតិបរិមា ចំពោះការស្ថាបនា និងពង្រីកបន្ថែម នូវសមិទ្ធផលសារធារណៈ ដ៏មានសារៈសំខាន់មួយនេះ ក្រោមការយកចិត្តទុកដាក់របស់ ឯកឧត្តម ងិន ឃន តំណាំងរាស្ត្រមណ្ឌលបាត់ដំបង ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង ។
រដ្ឋបាលសាលាក្រុងបាត់ដំបងបាននឹងកំពុង បំពេញមុខងារភារកិច្ច របស់ខ្លួន យ៉ាងសកម្ម ដើម្បីឆ្លើយតបជាវិជ្ជមាន ចំពោះការលើកកំពស់ប្រសិទ្ធភាព រដ្ឋបាល តាមគោលការណ៍វិមជ្ឈការ និងសហមជ្ឈការ ការកាត់បន្ថយភាពក្រីក្រ និងអនុវត្តតាមគោលការណ៍អភិបាលកិច្ចល្អ តាមរយៈការបង្ខិត រដ្ឋបាលសាធារណៈអោយនៅជិតប្រជាពលរដ្ឋ ។ ផ្សាភ្ជាប់និងកិច្ចការនេះ រដ្ឋបាលខេត្តបានជួយគាំទ្រយ៉ាងពេញទំហឹង ដើម្បីលើកកំពស់ប្រសិទ្ធភាព នៃការផ្តល់សេវារដ្ឋបាល និងសេវាសាសធារណៈជូនប្រជាពលរដ្ឋ ក្នុងនោះ លេចធ្លោគឺសមិទ្ធផល ផ្តើមចេញពីការផ្តល់សេវាសាសធារណៈ ដូចជាការស្ថាបនាផ្លូវ ប្រព័ន្ធផ្លូវដឹកជញ្ជូនទីក្រុង ប្រព័ន្ធប្រឡាយលូរំដោះទឹក ការគ្រប់គ្រងកាសំណល់ទីក្រុង សុខមាលភាពសាធារណៈ គ្រឹះស្ថានសិក្សាធំ ៗ តំបន់ពាណិជ្ជកម្មថ្មីៗធំៗ បន្ថែមសួនសាធារណៈ សេវាផ្គត់ផ្គង់អគ្គីសនី ទឹកស្អាត ។ល។
ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង បានអោយដឹងថា ផ្លូវនិងប្រឡាយនៅចំណុចសង្កាត់ទាំង៣ គឺសង្កាត់ស្លាកែត សង្កាត់ចំការសំរោង និងសង្កាត់ក្តុលដូនទាវ មានសារៈសំខាន់ខ្លាំង ព្រោះប្រជាពលរដ្ឋចរាចរណ៍ច្រើន ដូច្នេះដើម្បីកាត់បន្ថយនៅការកកស្ទះផ្លូវ ស្ទះទឹកលេចជនត្រូវពង្រីកផ្លូវ និងស្តារប្រឡាយ ដើម្បីធ្វើដំនើរបានស្រួលទាំងអស់គ្នា ។
ឯកឧត្តម ងិន ឃន តំណាំងរាស្ត្រមណ្ឌលបាត់ដំបង បានអោយដឹងថា កាលពីឆ្នាំ២០០០ផ្លូវនៅទីនេះជាផ្លូវដីក្រហម ជាតំបន់ស្រែចំការមានសត្វកង្កែបហ៊ីងយំ ទ្រហឹងអឹងកង តែបច្ចុប្បន្នជាផ្លូវកៅស៊ូមានផ្ទះសំបែងធំៗ សំលេងសត្វកង្កែបហ៊ីងក៏បាត់អស់ដែរ ។ ការអភិវឌ្ឍន៍ប្រទេសគឺដោយមានសន្តិភាព ប្រទេសមានសន្តិភាព គឺដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្រួបបង្រួមជាតិអោយខ្មែររួបរួមគ្នាបញ្ឈប់សង្គ្រាមគ្រប់ទីកន្លែង ។ ផ្លូវនៅទីនេះបានក្រាលកៅស៊ូក៏ដោយតែឆ្នាំ២០១៤ កំណើនប្រជាជននិងកំណើនសេដ្ឋកិច្ចជាតិមានការកើនឡើង យើងត្រូវពង្រីកទទឹងរបស់វា ដើម្បីអោយប្រជាពលរដ្ឋដឹកជញ្ជូន និងចរាចរណ៍បានទូរលាយនិងជៀសផុតពីការគ្រោះថ្នាក់ចរាចរណ៍ជាដើម ការសន្យារបស់រដ្ឋាភិបាលត្រូវតែធ្វើនិងកសាងមិនកុហក់នោះទេ ៕
