បាត់ដំប ង ៖ចោរមិនស្គាល់សាវតា២នាក់ ដកកាំភ្លើងខ្លីភ្ជង់ ប្រពន្ធអតីតៈមន្ត្រីនគរបាលផ្នែកសុខាភិបាល ចូលនិវត្តន៍ យកគ្រឿងអល័ង្គការ និងប្រាក់ជាង១ម៉ឺនដុល្លា កាលពីម៉ោង៨និង៣០នាទី ព្រឹកថ្ងៃទី១៨ ខែកញ្ញា ឆ្នាំ២០១៤ នៅក្រុមទី៣ភូមិពពាលខែ ឃុំអូរតាគី ស្រុកថ្មគោល ខេត្តបាត់ដំបង ។
លោក ហៀង ប៊ុនថា អធិការរងស្រុកថ្មគោលបានអោយដឹងថា ស្ត្រីរងគ្រោះដែលចោរចង វាយមានឈ្មោះ លឿង ឃិញ អាយុ៦០ឆ្នាំ មានប្តីឈ្មោះ គី គិត អាយុ៦១ឆ្នាំ អតីតៈប្រធានការិយាល័យនគរបាលផ្នែកសុខាភិបាលនៃស្នងការដ្ឋានខេត្ត បាត់ដំបង និងមានកូន៣នាក់ ទៅធ្វើការងារនៅខេត្តផ្សេង ។ វត្ថុតាងដែលបាត់បង់មានខ្សែក១ខ្សៃ ខ្សែដៃ១ខ្សែ ចិញ្ចៀនពេជ្រ១វង់ និងមាសប្រាក់មួយចំនួនសរុបជាង១ម៉ឺនដុល្លា ។ ចំណែកក្រុមចោរ២នាក់ មិនស្គាល់មុខមាត់និងសាវតាឡើយ។
ស្ត្រីរងគ្រោះឈ្មោះ លឿង ឃិញ បានអោយដឹងថា មុនពេលកើតហេតុប្តីបានដឹកខ្លួនមកពីទិញម្ហូប រួចគាត់បើកឡានចេញទៅលាងបាត់ ពេលខ្លួនដើរជិតដល់ទ្វារចូលផ្ទះ ឃើញទ្វារចំហ មានការឆ្ងល់ ហើយក៏ដើរចូលទៅ ។ ពេលដើរចូលផុតទ្វារ ភ្លាមស្រាប់តែមានមនុស្សប្រុស ២ នាក់ រាងស្គម សក់វែង វ័យជាង៣០ឆ្នាំ បានយកកាំភ្លើងខ្លីភ្ជង់អូសចូលបន្ទប់ បន្ទាប់មកយកខ្សែអង្រឹងចងស្លាបសេក និងវាយច្រានផ្កាប់មុខទាញយកទូរស័ព្ទ ដោះខ្សែក ហើយឆែកឆេរតាមតុទូរប្រមូលមាសប្រាក់ និងគ្រោះអល័ង្គការយកទៅអស់ ។ មួយសន្ទុះក្រោយមក ខ្លួនត្រដុះខ្សែចំណងរួចរត់ទៅតាមប្តីនៅកន្លែងលាងរថយន្ត ប្រាប់ហេតុការណ៍នេះ។
ឈ្មោះ គី គិត ជាប្តីស្ត្រីរងគ្រោះបានអោយដឹងថា មុនពេលកើតហេតុខ្លួនបានដឹកប្រពន្ធមកពីផ្សារ ដោយរថយន្តប្រឡាក់បានដាក់ប្រពន្ធនៅមុខរបងផ្ទះ ហើយបើកទៅលាង ពេលកំពង់លាងរថយន្ត ប្រពន្ធមកប្រាប់ថាចោរប្លន់អស់ទ្រព្យសម្បត្តិហើយ។
សមត្ថកិច្ចការិយាល័យបច្ចេកទេសបានបញ្ជាក់ថា ករណីកើតឡើងនៅផ្ទះលោក គី គិត អតីតមន្ត្រីនគរបាលពិតជាករណីប្លន់យកមាសប្រាក់មែន មិនមែនជាការច្នៃប្រឌិតឡើយ ។
ចំពោះជនសង្ស័យសមត្ថកិច្ចកំពុងកំណត់មុខសញ្ញា ធ្វើការស្រាវជ្រាវតាមឃាត់ខ្លួនជនដៃដល់ យកមកផ្តន្ទាទោសតាមផ្លូវច្បាប់ ៕
