ប៉ៃលិន ៖ ប្រជាពលរដ្ឋចំនួន ១៩ គ្រួសារ ដែលមានបញ្ហាទំនាស់ដីធ្លីទំហំជាង ៥០ ហិកតា នៅចំណុចភ្នំកេះ ស្ថិតក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ជាច្រើនឆ្នាំកន្លងមកហើយជាមួយឈ្មោះ យស់ សារ៉ាវុទ្ធ ពេលនេះត្រូវបានគណៈកម្មការដោះស្រាយទំនាស់ធ្លីថ្នាក់ខេត្ត សម្រេចប្រគល់ជូន ពួកគាត់ទៅតាមទំហំដីជាក់ស្តែង ដើម្បីឲ្យពួកគាត់បានកាន់កាប់ដោយស្របច្បាប់ ។
ការដោះស្រាយនិង សម្រេចប្រគល់ឲ្យនេះ ត្រូវបានធ្វើឡើងកាលពីព្រឹកថ្ងៃទី១៧ ខែកញ្ញា ឆ្នាំ ២០១៤ នៅសាលប្រជុំសាលាស្រុកសាលាក្រៅ ក្រោមអធិបតីភាពលោកស្រី ជា លាភ អភិបាលរងខេត្ត លោក ម៉ម ហម លោក គុយណារ៉េត សមាជិកក្រុមប្រឹក្សាខេត្ត ដោយមានការចូលរួមពីលោកប្រធានមន្ទីរសូរិយោដីខេត្ត លោស្នងការនគបាលខេត្ត និងប្រជាពលរដ្ឋច្រើននាក់ផងដែរ ។ ក្នុងកិច្ចប្រជុំដោះស្រាយនេះ គឺពុំមានឃើញ វត្តមាន លោក យស់ សារ៉ាវុទ្ធ ដែលអះអាងថាជាម្ចាស់ដីមកចូលរួមឡើង ។អ្នករៀបចំកិច្ចប្រជុំបានអញ្ជើញ គាត់ដែរ តែមិនឃើញគាត់មក ដោយប្រាប់ថាគាត់ជាប់ប្រជុំ ។
លោកស្រី ជា លាប អភិបាលរងខេត្តប៉ៃលិន និងជាអនុប្រធានក្រុមការងារដោះស្រាយ បន្ទាន់ នូវបញ្ហាទំនាស់ដីធ្លី របស់ប្រជាពលរដ្ឋ ពាក់ព័ន្ធជាមួយដីបំរុងរបស់រដ្ឋ ដីតំបន់បរិស្ថាន និងដីព្រៃសហគមន៍ក្នុងខេត្តប៉ៃលិន បានមានប្រសាសន៍ថាអាជ្ញាធរខេត្តបានរៀបចំគណៈកម្មការ ដើម្បីចុះដោះស្រាយបញ្ហាទំនាស់ដីធ្លីជូនបងប្អូនប្រជាពលរដ្ឋដែលមាន ទំនាស់ដីធ្លីទាំងអស់ក្នុងខេត្ត។
ការដោះស្រាយនេះ គឺសម្រាប់តែដីដែលមិនទាន់មានប្លង់កាន់កាប់ស្របច្បាប់ប៉ុណ្ណោះ ។ ចំនែកបញ្ហាដីមានទំនាស់ ហើយកំពុងស្ថិតក្នុងការស៊ើបអង្កេត របស់តុលាការអាជ្ញាធរខេត្តនឹងខិតខំរកមេធាវីការពារក្តី ជូនប្រជាពលរដ្ឋទៅតាមផ្លូវច្បាប់ ។
ស្ត្រីឈ្មោះ ម៉ម ផេត អាយុ ៤៨ ឆ្នាំ មានទីលំនៅភូមិទួលខ្ពស់ ឃុំស្ទឹងត្រង់ ស្រុកសាលាក្រៅ តំណាង ប្រជាពលរដ្ឋទាំង១៩ គ្រួសារដែលមានទំនាស់ដីធ្លីបានឲ្យដឹងថាដីដែលមានទំនាស់មានទំហំ៥៥ ហិកតា នៅចំណុចភ្នំកេះ ស្ថិតក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ។ដីនេះគឺពួកគាត់ទំនាស់ជាមួយឈ្មោះ យស់ សារ៉ាវុទ្ធ ជាមន្ត្រីកយ ដែលចុះមកហាមឃាត់ និងយកប៉ូលីស ប៉េអឹម មកគម្រាមពួកគាត់មិនឲ្យបង្កបង្កើនផលលើដីនោះទេ ដោយអះអាងគេជាម្ចាស់ដីនោះ ។ បញ្ហាទំនាស់នេះគឺដោះស្រាយជាច្រើនលើកមកហើយតែមិនទទួលបានលទ្ធផល អ្វីឡើយ ។
ស្រី្តរូបនោះបានបន្តថា ពួកគាត់ទាំង១៩គ្រួសារ ក្នុងនោះគឺ១៦គ្រួសារ មានដីក្នុងមួយគ្រួសារទំហំ៥០ម៉ែត្រ x ៣០០ម៉ែត្រ និង៣គ្រួសារទៀតមានដីទំហំ ១០០ ម៉ែត្រ x ៣០០ម៉ែត្រ ។ ដីនោះពីដំបូងគឺលោក វ័រ រួម ដែលជាមេទាហានបានចែកជូនពួកគាត់ក្រោមមកខេត្តសុំយកដីនោះធ្វើជា ដីសហគមន៍។ ក្រោយមកទៀត ដីនោះបែរជាត្រូវក្លាយទៅជាដីកម្មសិទ្ធិ ឯកជន របស់ឈ្មោះ យស់ សារ៉ាវុទ្ធ ទៅវិញ ទើបពួកទាមទារ យកដីនោះមកវិញ ព្រោះពួកគាត់ជាប្រជាពលរដ្ឋក្រីក្រ មានតែដីបន្តិចបន្តួចនេះដើម្បីបង្កបង្កើនផល សម្រាប់ចិញ្ចឹម គ្រួសារ ។
ទាក់ទងនឹងបញ្ហានេះ លោក ហុក សុផល ប្រធានមន្ទីររៀបចំដែនដីនគរូបនីកម្ម សំណង និងសូរិយោដី ខេត្តប៉ៃលិនបានឲ្យដឹងថា ក្រោយពេលកិច្ចប្រជុំដោះស្រាយថ្ងៃនេះរួច បើប្រជាពលរដ្ឋឯកភាពទៅតាមការ សម្របសម្រួលរបស់គណៈកម្មដោះស្រាយទំនាស់ដីធ្លីខេត្តលោក នឹងឲ្យមន្ត្រីជំនាញចុះទៅវាស់វែងទំហំដី ជាក់ស្តែង ហើយរៀបចំចេញប្លង់រួមមួយ ដែលមានការទទួលស្គាល់ពីអាជ្ញាធរ ដែនដី គ្រប់លំដាប់ថ្នាក់ សម្រាប់ ប្រជាពលរដ្ឋទាំង១៩គ្រួសារតែម្តង ។
លោកបានបន្តថា ពេលនេះ លោកនិងមន្ត្រីជំនាញរបស់លោកកំពុងតែខិតខំរៀបចំចុះបញ្ជីប្លង់ដី ជាប្រព័ន្ធនៅក្រុងប៉ៃលិន ឲ្យរួចរាល់សិន ហើយនឹងរៀបចំចុះបញ្ជីប្លង់ដីជាប្រព័ន្ធនៅស្រុកសាលាក្រៅ និងរៀបចំចុះបញ្ជីប្លង់ជាប្រព័ន្ធជូនពួកគាត់ទៅតាមគ្រួសារនីមួយៗ ។
លោកបានផ្តាំផ្ញើរទៅប្រជាពលរដ្ឋទាំងអស់ត្រូវត្រៀមឯកសារ ពាក់ព័ន្ធ ដូចជាលិខិតបញ្ជាក់កម្មសិទ្ធស្របច្បាប់ សំបុត្រអាពាហ៍ពិពាហ៍ សៀវភៅគ្រួសារ ដើម្បីបំពេញតាមលក្ខណ៍ក្នុងការចុះបញ្ជីប្លង់ដីជាប្រព័ន្ធ ប្រសិន បើមិនមានឯកសារទាំងនោះទេគឺមន្ត្រីជំនាញមិនអាចធ្វើប្លង់ជា ប្រព័ន្ធជូនប្រជាពលរដ្ឋបានទេ ។
ក្នុងកិច្ចប្រជុំដោះស្រាយនោះ លោកស្រី ជា លាភ បានប្រាប់ទៅកាន់ប្រជាពលរដ្ឋថា គណៈកម្មការដោះ ស្រាយទំនាស់ដីធ្លីខេត្ត បានឯកភាពតាមការណ៍ស្នើសុំរបស់ប្រជាពលរដ្ឋ នឹងរៀបចំប្រគល់ដីនោះជូនពួកគាត់។
ស្ត្រីឈ្មោះ ម៉ម ផេន តំណាងប្រជាពលរដ្ឋទាំង១៩គ្រួសារបានសំដែងនូវអារម្មណ៍សប្បាយរីករាយ និងថ្លែងអំណរ គុណយ៉ាងខ្លាំងដល់អាជ្ញាធរខេត្តដែលបានជួយដោះស្រាយទំនាស់ដីធ្លីជូន ពួកគាត់ឲ្យទទួលបានកម្មសិទ្ធិកាន់កាប់ដីស្របច្បាប់ ។ ពួកគាត់និងបានឈប់ព្រួយបារម្ភ អំពីការរំលោភបំពាន់ និងគម្រាមកំហែង ពួកគាត់ទៀត។
លោកស្រី ជា លាភ បានបញ្ជាក់ថាចំពោះបញ្ហាទំនាស់ដីធ្លីផ្សេងៗទៀតដើលកើតមានក្នុង ខេត្តប៉ៃលិន គណកម្មការដោះស្រាយទំនាស់ដីធ្លីខេត្ត និងបន្តធ្វើការដោះស្រាយជាបន្តបន្ទាប់ នៅក្រោយពេលចប់ពិធីបុណ្យភ្ជំបិណ្ឌ ៕ សំ កូលីន
