ខេត្តបាត់ដំបង៖ ឯកឧត្តមឧបនាយករដ្ឋមន្ត្រី កែ គឹមយ៉ាន សមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានទី១ក្រុម ការងារចុះជួយខេត្តបាត់បងបានអញ្ជើញជាអធិបតីដ៏ខ្ពង់ខ្ពស់ប្រកាស តែងតាំងឯកឧត្តម សេង ផល្លី ជាប្រធានក្រុមការងារចុះជួយស្រុករតនមណ្ឌល និងក៏ប្រកាសអនុប្រធាន ក្រុមការងារចុះជួយឃុំទាំង៥និងស្រុករតនមណ្ឌល ខេត្តបាត់ដំបងកាលពីថ្ងៃទី៣០ខែសីហាឆ្នាំ២០១៤នៅគណបក្សប្រជាជន កម្ពុជាស្រុករតនៈមណ្ឌល។
បន្ទាប់ពីលោកសឿមប៊ុនរិទ្ធិប្រធាន គណៈចាត់តាំងបក្សខេត្តបាត់ដំបងឡើងអានសេចក្តីប្រកាសតែងតាំងនិងលោក ថាត់ ណារុន អនុប្រធានគណៈកម្មាធិការគណបក្សស្រុកឡើងរាយការណ៍រួចមក។
ឯកឧត្តមឧបនាយក រដ្ឋមន្ត្រី កែ គឹមយ៉ាន សមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាអនុ ប្រធានទី១ក្រុម ការងារចុះជួយខេត្តបាត់បង បានប្រគល់លិខិតតែងតាំងអោយឯកឧត្តម សេង ផល្លី ជាប្រធានក្រុមការងារចុះជួយស្រុករតនមណ្ឌល។
ឯកឧត្តមឧបនាយក រដ្ឋមន្ត្រី កែគឹមយ៉ាន ឱ្យដឹងថា៖ សកម្មភាពអ្វីដែលមន្ត្រីរាជការធ្វើខុសឆ្គង ទៅលើប្រជាពលរដ្ឋកន្លងមកគឺនៅពេលនេះត្រូវតែកែខ្លួនឱ្យបានល្អ ឡើងវិញដោយទុកឱកាសឆ្លុះកញ្ចក់ដុះក្រអែលខ្លួនឯង និងខិតខំធ្វើអំពើល្អហើយបំរើផលប្រយោជន៍ប្រជាពលរដ្ឋពិតប្រាកដ។ ដើម្បីដណ្តើមយកប្រជាប្រិយភាព ក្នុងការផ្តល់ជំនឿទុកចិត្ត របស់ប្រជាពលរដ្ឋមកលើការដឹកនាំរបស់គណបក្សប្រជាជនកម្ពុជាមកវិញ។ ជាពិសេសក្នុងការត្រៀមខ្លួនចូលរួមប្រកួតប្រជែងបោះឆ្នោតជ្រើសរើស តំណាងរាស្ត្រ សម្រាប់ឆ្នាំ២០១៨ខាងមុខឱ្យទទួលបានជោគជ័យ។
ឯកឧត្តឧបនាយករដ្ឋមន្ត្រីក៏បានណែនាំដល់អាជ្ញាធរខេត្តបាត់ដំបងឱ្យ ខិតខំដោះស្រាយបញ្ហា ប្រឈមទាំងឡាយដើម្បីបញ្ចៀសការថ្នាំងថ្នាក់ពីសំណាក់ប្រជាពលរដ្ឋដូជា បញ្ហាទំនាស់ដីធ្លី បញ្ហាទឹក និងបញ្ហាប្រឈមមួយចំនួនទៀតផងដែរ ។ ក្នុងឱកាសនោះដែរ ឯកឧត្តមឧបនាយករដ្ឋមន្ត្រីក៏បាន ណែនាំដល់ក្រុមការងារចុះជួយស្រុករតនមណ្ឌលទើបតែតែងតាំងនៅពេលនេះ ជាង៤០០នាក់ ត្រូវតែខិត ខំសហការគ្នាបង្កើនស្នាដៃធ្វើកិច្ចការងារឱ្យមានប្រសិទ្ធភាព ក្នុងនោះ ចៀសវាងកុំឱ្យកើតឡើងមានគ្នាច្រើនធ្វើឱ្យអន្សមខ្លោច ។
ឯកឧត្តមឧបនាយករដ្ឋមន្ត្រីក៏បានកោតសរសើរដល់គណបក្សប្រជាជនកម្ពុជា ស្រុករតនមណ្ឌល កាលពីបោះឆ្នោតជ្រើសតាំងតំណាងរាស្ត្រកន្លងទៅ គឺមានសម្លេងគាំទ្រពីប្រជាពលរដ្ឋរហូតជាប់ចំណាត់ ថ្នាក់លេខ ៣ ក្នុងចំណោមស្រុកក្រុងទូទាំងខេត្តបាត់ដំបងនេះ មានន័យថា ការដឹកនាំរបស់ក្រុមការងារនិងអាជ្ញាធរគ្រប់ជាន់ ថ្នាក់បានបំរើផលប្រយោជន៍ពិតប្រាកដ ទើបធ្វើឱ្យប្រជាពលរដ្ឋ មានជំនឿទុកចិត្តបោះ ឆ្នោតជូនគណបក្សប្រជាជនកម្ពុជា ៕
