បាត់ដំបង ៖ តំណាងប្រជាពលរដ្ឋ ៣៨ គ្រួសារ ចំណោម ៧៥ គ្រួសារ រស់នៅលើដីជុំវិញផ្សារចាស់យូរហើយ គ្មានប័ណ្ណកម្មសិទ្ធិតវ៉ាសុំអោយលោក ច័ន្ទ សុផល អភិបាលខេត្តជួយអន្តរាគមន៍ ធ្វើប័ណ្ណកម្មសិទ្ធ កាលពីព្រឹកថ្ងៃទី០១ ខែកញ្ញា ឆ្នាំ២០១៤ នៅសួននាគបាញ់ទឹកក្រុងបាត់ដំបង ។
លោកស្រី ហម កឹម អាយុ៦៥ឆ្នាំ តំណាងប្រជាពលរដ្ឋបានអោយដឹងថា លំនៅដ្ឋានប្រជាពលរដ្ឋ៧៥គ្រួសារ នៅជុំវិញផ្សារចាស់ថ្មគោល ក្នុងភូមិថ្មគោល និងភូមិគោកត្រប់ឃុំតាម៉ឺនស្រុកថ្មគោល ។ ពួកគាត់បានសង់ផ្ទះរស់នៅ តាំងពីឆ្នាំ១៩៨៤ មានសំបុត្រប័ណ្ណភូមិឃុំត្រឹមត្រូវ ។ លុះខែមករា ឆ្នាំ២០០៧ ផ្សារថ្មគោលចាស់បានរុះរើ យកទៅសាងសង់កន្លែងថ្មី ហើយខាងរដ្ឋអំណាចខេត្តបានយកដីផ្សារចាស់ និងយកលំនៅដ្ឋានប្រជាពលរដ្ឋធ្វើជាកម្មសិទ្ធិ (មិនដឹងយកផ្ទាល់ខ្លួន ឬដើម្បីរដ្ឋ) ដោយមិនទទួលស្គាល់ប័ណ្ណកម្មសិទ្ធិ ប្រជាពលរដ្ឋចេញដោយអជ្ញាធរឃុំ ។ ក្រោយមកប្រជាពលរដ្ឋតស៊ូមតិទាមទា រហូតដល់ខែ៦ ឆ្នាំ២០១២ ទើបលោក សម ណេង អភិបាលស្រុកថ្មគោលចេញសាលាប័ត្រទទួលស្គាល់ ។
ប៉ុន្តែតាំងពីឆ្នាំ២០១២ ដល់ថ្ងៃទី១ខែកញ្ញាឆ្នាំ២០១៤ មិនទាន់មានមន្ត្រីសុរិយោដីចុះទៅវាស់វែង ឬធ្វើប័ណ្ណកម្មសិទ្ធអោយនៅឡើយទេ ទើបប្រជាពលរដ្ឋឡើងមកខេត្តតវ៉ា សុំអោយលោក ច័ន្ទ សុផល អភិបាលខេត្តបាត់ដំបង ទើបឡើងថ្មីជួយអន្តរាគមន៍ធ្វើប័ណ្ណកម្មសិទ្ធដីធ្លីរបស់ពួកគាត់ផង ។
លោក សម ណេង អភិបាលស្រុកថ្មគោលបានអោយដឹងតាមទូរស័ព្ទថាលំនៅដ្ឋានប្រជាពលរដ្ឋ៧៥គ្រួសារនៅជុំវិញផ្សារចាស់ជាដីអនុប្រយោគប៉ះពាល់ដីរដ្ឋ តែទោះជាយ៉ាងណា ក៏រូបលោកបានព្យាយាមសុំគោលការណ៍ថ្នាក់លើដោះស្រាយជូនពួកគាត់ដែរ តែថ្នាក់លើមិនទាន់ដាក់សេចក្តីសម្រេចយ៉ាងណានោះទេ ។
ពាក់ព័ន្ធករណីនេះ មន្ត្រីសាលាខេត្តបាត់ដំបងបានអោយតំណាងប្រជាពលរដ្ឋចំននួន៥នាក់មានឈ្មោះ មាស វណ្ណារ៉េត ឈ្មោះ ជុំ លឹម ឈ្មោះ ហម កឹម ឈ្មោះ ជេត វណ្ណថា ឈ្មោះ ប៉ាង ហេង ចូលក្នុងសាលាខេត្ត ជួបពិភាក្សារកដំណោះស្រាយ ។
នៅម៉ោងជាង១២ថ្ងៃត្រង់ តំណាងប្រជាពលរដ្ឋបានចេញពីសាលាខេត្តមកវិញអោយដឹងថាក្នុងការសំណូមពររកដំណោះស្រាយលោក សឿម ប៊ុនរិទ្ធិ នាយកទីចាត់ការសាលាខេត្តបានសន្យា និងធ្វើរបាយការណ៍ជូនលោក ស ខេង ឧបនាយករដ្ឋមន្ត្រីក្រសួងមហាផ្ទៃសុំគោលការណ៍ធ្វើប័ណ្ណកម្មសិទ្ធិ ជូនប្រជាពលរដ្ឋចំនួន ៧៥ គ្រួសារនេះ ហើយសូមអោយប្រជាពលរដ្ឋវិលត្រឡប់ទៅផ្ទះវិញ រង់ចាំស្តាប់លទ្ធផលរយៈពេល ១ សប្តាហ៍ទៀត ៕
