បាត់ដំបង ៖ បុរសសង្ស័យជាប់ពីបទរួមភេទជាមួយក្មេងស្រីអនិតិជន ខ្សែក្រវ៉ាត់ចងកសម្លាប់ខ្លួនពេលអ្នកយាមដេកលក់ កាលពីព្រឹកថ្ងៃទី០៣ ខែសីហា ឆ្នាំ២០១៤ នៅបន្ទប់ឃុំខ្លួនបណ្តោះអាសន្ន ស្នងការរដ្ឋានខេត្តបាត់ដំបង ។
តាមប្រភពសមត្ថកិច្ចថា ជនសង្ស័យត្រូវនគរបាលស្រុករតនៈមណ្ឌលហៅមកសាកសួរ ឃាត់ខ្លួនកាលពីម៉ោង១០ព្រឹក ថ្ងៃទី០២ ខែសីហា ឆ្នាំ២០១៤ នៅអធិការដ្ឋាននគរបាលស្រុករតនៈមណ្ឌល ហើយបញ្ជូនភ្លាមមកការិយាល័យប្រឆាំងការជួញដូរមនុស្ស និងការពារអនិតិជន ។
សមត្ថកិច្ចនគរបាលបានអោយដឹងថា បុរសសង្ស័យចងក សម្លាប់ខ្លួន មានឈ្មោះ កាន់ នឹម ហៅ ឆាង អាយុ ៣២ ឆ្នាំ របររត់តាក់ស៊ីរស់នៅភូមិនាងលេមឃុំរស្មីសង្ហាស្រុករតនៈមណ្ឌល។ក្មេងស្រីរងគ្រោះឈ្មោះសចណអាយុ១៤ឆ្នាំចេញពីផ្ទះទៅរួមភេទដោយមិនស្របច្បាប់កាលពីថ្ងៃទី២៧ខែកក្កដា ឆ្នាំ២០១៤។
សាច់ញាតិជនសង្ស័យចងកសម្លាប់ខ្លួនបានអោយដឹងថា ជនសង្ស័យមានប្រពន្ធ៤នាក់ និងកូនតូច២នាក់ដោយម្តាយបានរៀបការប្រពន្ធអោយ២នាក់ និងសែន២នាក់ រួចមានកូនតូច២នាក់ ហើយប្រពន្ធទាំង៤នាក់បានរត់ចេញផ្ទះ ទុកអោយជនសង្ស័យក្លាយជាបុរសពោះម៉ាយ ។ ពេលជនសង្ស័យរត់តាក់ស៊ី ពីស្រុករតនៈមណ្ឌលទៅក្រុងបាត់ដំបង ។ ពេលទំនេរឈ្មោះ ឆាង ហួសទៅលេងផ្ទះបងប្អូន ក៏ស្គាល់ក្មេងស្រីរងគ្រោះ បានប្រហែល១ឆ្នាំ លុះថ្ងៃទី២៦ ខែកក្កដា ឆ្នាំ២០១៤ ក្មេងស្រីរងគ្រោះដឹងថា ឪពុកចុងនាងជិតចេញពីមន្ទីរឃុំឃាំងវិញ ហើយភ័យខ្លាចឪពុកធ្វើបាបផង ក៏ក្មេងស្រីរងគ្រោះបានអោយជនសង្ស័យដឹកមករួមរស់ជាមួយគ្នា ។ ពេលរួមរស់រួមរ័ក្សបាន៦ថ្ងៃ ម្តាយក្មេងស្រីប្តឹងអោយនគរបាលឃាត់ខ្លួនតែម្តង ។
លោក សែម ឡាយ នគរបាលយាមបន្ទប់ឃុំខ្លួនបណ្តោះអាសន្នបានប្រាប់អោយដឹងថា ម៉ោងប្រហែលជាង៣យប់ លោកឮសម្លេងក្រេះក្រុះ ដូចសត្វឆ្មាកេះកន្ត្រករកចំណី មិនចាប់អារម្មណ៍ ហើយក៏មិនបានងើបមើលដែរ ព្រោះយល់ថាសត្វឆ្មាវាតែងមករើកកាយរកត្រីស៊ីដូចរាល់យប់ ។ លុះម៉ោង៤និង៥០នាទីបៀតភ្លឺ ទើបខ្ញុំងើបមកមើលក៏ឃើញជនសង្ស័យបានចងកនឹងខ្សែក្រវ៉ាត់ជាប់នឹងចំរឹងទ្វារដែកផុតកែងជើងពីការ៉ូ( ចំទើតកែងជើង) ស្លាប់ ។
លោកបានបញ្ជាក់ថា ជនសង្ស័យបានយកអំបោសជ័រវែង នៅមុខទ្វារបន្ទប់ឆ្កឹះយកខ្សែក្រវ៉ាត់របស់វាដែលសមត្ថកិច្ចអោយវាដោះទុក ក្នុងកន្ត្រកក្បែរបន្ទប់ យកចងកសម្លាប់ខ្លួន ព្រោះឃើញអំបោសជ័រដួលក្បែរកន្ត្រកដាក់ខ្សែក្រវ៉ាត់។
ការចូលរួមធ្វើកោសលវិច័យមានលោក ហេង លុយ ព្រះរាជអជ្ញារងអមសាលាដំបូងខេត្ត ។ លោក ជេត វណ្ណនី ស្នងការរងកណ្តាលយុត្តិធម៌ ។ ក្រុមគ្រួពេទ្យ៣នាក់ របស់មន្ទីរពេទ្យបង្អែកខេត្តបាត់ដំបងមាន ទី១លោក ម៉ាន់ សុជីវិ ប្រធានផ្នែកជំងឺស្បែក ទី២ លោក គង់ សុវណ្ណ មន្ត្រីផ្នែកវះកាត់ ទី៣ លោក អៀប ធឹង ប្រធានផ្នែរដ្ឋបាល ព្រមទាំងមន្ត្រីការិយាល័យកោសលវិច័យ និងបច្ចេកទេសវិទ្យាសាស្ត្រទាំងអស់ផងដែរ ។ ការធ្វើកោសវិច័យឃើញមានស្នាមខ្សែក្រវ៉ាត់រឹតក និងមានចេញទឹកកាមដោយមិនមានស្លាកស្នាមអ្វីផ្សេងទៀត ដូចករណីនេះសន្និដា្ឋនថា ជាករណីចងកសម្លាប់ខ្លួនប្រាកដមែន ពុំមានករណីប្រើហឹង្សាធ្វើឃាតឡើយ ។ សាកសពប្រគល់អោយសាច់ញាតិយកទៅធ្វើបុណ្យនៅផ្ទះតាមប្រពៃណី ៕
