ខេត្តបន្ទាយមានជ័យ៖ពលករខ្មែរចំនួន១២៥នាក់ចំណាកស្រុកដើរឆ្លងដែនខុសច្បាប់ចូលទៅប្រទេសថៃដើម្បីស្វែងរកការងារធ្វើត្រូវបានទាហានថៃចាប់ឃាត់ខ្លួន បញ្ជូនតាម រថយន្ត ឲ្យសមត្តកិច្ចកម្ពុជាវិញ កាលពីយប់អធ្រាត្រថ្ងៃទី២៨ ខែកក្កដា ឆ្នាំ២០១៤ នៅចំណុចព្រំដែនក្នុងដីថៃទល់មុខក្នុងភូមិសាស្ត្រទឹកដីស្រុកម៉ាឡៃ ខេត្តបន្ទាយមានជ័យ ។
ពលករទាំងនោះត្រូវទាហានថៃដឹកតាម រថយន្ត បញ្ជូនមកប្រទេសកម្ពុជាវិញ តាមច្រកតំបន់ម៉ាឡៃចំនួន៥៦នាក់ និងច្រករបៀង ខ្លាងាប់ក្នុង ឃុំទួលពង្រចំនួន៦៩នាក់ កាលពីយប់អធ្រាត្រ ថ្ងៃទី២៨ ខែកក្កដា ឆ្នាំ២០១៤។
បើតាមប្រភព័ត៌មានពីមន្ត្រីនគរបាលការពារព្រំដែនគោកលេខ៨១៥ ឈរជើងនៅទិស ស្រុកម៉ាឡៃបានឲ្យដឹងថា៖ពលករខ្មែរ១២៥នាក់នោះមកពីខេត្តបន្ទាយមានជ័យ បាត់ដំបង ឧត្ថរមានជ័យ សៀមរាប ព្រៃវែង កំពត និងខេត្តកំពង់ឆ្នាំ ។ ពួកគេចញទៅប្រទេសថៃតាមច្រកតំបន់ម៉ាឡៃចំនួន៥៦នាក់ និងច្រករបៀង ខ្លាងាប់ក្នុង ឃុំទួលពង្រចំនួន៦៩នាក់ ការចេញឆ្លងដែនខុសច្បាប់របស់ ពួកគាត់ អ្នកខ្លះទៅតាមរយៈមេខ្យល់ជនជាតិថៃ និងតាមរយៈថៅកែថៃដោយទំនាក់ ទំនង តាមទូរស័ព្ទហើយណាត់ជួបគ្នាកន្លែងគោលដៅក្នុងប្រទេសថៃជាប់ព្រំដែន បន្ទាប់មក មេខ្យល់ និងថៅកែថៃយករថយន្តមកទទួលថែមទាំងចេញថ្លៃសាហ៊ុយធ្វើដំណើរផងនោះទៀត។
ពលករខ្មែរខាងលើក្រោយពីសមត្តកិច្ចធ្វើការអប់រំនិងឲ្យធ្វើកិច្ចសន្យាផ្តិតមេដៃរួច ឲ្យពួកគាត់ ធ្វើដំណើរត្រឡប់ទៅស្រុកកំណើតវិញ។
គួរបញ្ជាក់ថា ៖ គ្រាដែលពលករខ្មែរត្រូវទាហានថៃចាប់បញ្ជូនមកវិញជាបន្តបន្ទាប់ ប្រគល់ឲ្យសមត្តកិច្ចកម្ពុជានៅក្នុងទឹកដីស្រុកម៉ាឡៃ ។កាលពីព្រឹកថ្ងៃទី២៩ ខែកក្កដា ឆ្នា២០១៤ នេះ កម្លាំងការិយាល័យប្រឆាំងការជួញដូរមនុស្ស និងការពារអនីតិជនខេត្ត ចុះសហការជាមួយនិងនគរបាលប៉ុស្ថិ៍ព្រំដែនក្បាលទំនប់ នៃវរៈនគរបាលការពារព្រំដែនគោក ៨១៥ ឈរជើងនៅភូមិបន្ទាយទី២ ឃុំអូរសំព័រ ស្រុកម៉ាឡៃ បានចុះទប់ស្កាត់ពលករខ្មែរចំនួន ៥៧ នាក់ ដែលពួកគាត់កំពុងតែធ្វើដំណើរបម្រុង ឆ្លងដែនខុសច្បាប់ចូលទៅប្រទេសថៃ ។ បន្ទាប់មកពលករទាំងនោះត្រូវសមត្តកិច្ចណែនាំអប់រំ ហើយឲ្យពួកគាត់ត្រឡប់ទៅស្រុកកំ ណើតវិញផងដែរ ៕
