ខេត្តបន្ទាយមានជ័យ៖ យោធិនចំនួន១៣៩នាក់ វីរសេនាតូចយោធាការពារព្រំដែន៥១៥ ចំណុះឲ្យកងពលតូចថ្មើរជើងលេខ៥១ ឈរជើងនៅភូមិ ថ្មដែកកេះ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យបានទទួការវគ្គហ្វឹកហ្វឺន ដើម្បីជួយទប់ស្កាត់បទល្មើស ទំនិញគេចពន្ធនៅតាមព្រំដែនថ្ងៃទី៣ ខែវិច្ឆិកា ឆ្នាំ២០១៥ ។
ប្រភពពី កងពលតូចថ្មើរជើងលេខ៥១ អោយដឹងថាយោធិនចំនួន១៣៩នាក់ ត្រូវបានមេបញ្ជាការ ជ្រើសរើសទៅរៀនសូត្របន្ថែម ដើម្បីទុកអន្តរាគមន៍ និងទប់ស្កាត់បទល្មើសផ្សេងៗ ជាពិសេសបទល្មើសគេចពន្ធតាមព្រំដែន ទាហានត្រូវធ្វើការងារសង្គមឲ្យបានច្រើន ពិសេសត្រូវជួយដល់ពលរដ្ឋក្នុងគ្រាមានអាសន្នដូចជា ភ្លើងឆេះផ្ទះ ទឹកជំនន់ គ្រោះធម្មជាតិផ្សេងៗ ។ ក្រៅពីនេះទាហានត្រូវចេះក្តាប់ព័ត៌មាន ទាំងសភាពការណ៍ព្រំដែន និងភូមិសាស្ត្រគ្រប់គ្រង ដើម្បីរួមគ្នាទប់ស្កាត់រាល់បទល្មើសផ្សេងៗ ពិសេសបទល្មើសពលករឆ្លងដែនខុសច្បាប់ និងទប់ស្កាត់រាល់បទល្មើសទំនិញគេចពន្ធ ដើម្បីលើកស្ទួយចំណូលជាតិ និងប្រាក់ខែមន្ត្រីរាជការ ។
ទន្ទឹមគ្នានោះក៏មានការកាត់ខ្សែបូព៌ដាក់ឲ្យប្រើប្រាស់នូវអាគារគិលានដ្ឋានមួយខ្នងទំហំ ៧x១០ ម៉ែត្រសម្រាប់ឲ្យពេទ្យទាហាន បម្រើសេវាព្យាបាលដល់ពលទាហានក្នុងអង្គភាព។ ក្នុងនោះលោក សេង ធារិន ក៏បាននាំយកថ្នាំពេទ្យ និងសម្ភារៈមួយចំនួនមកចែកជូនដល់ពេទ្យទីនោះផងដែរ៕
