ខេត្តបន្ទាយមានជ័យ៖ ប្រជាពលរដ្ឋ ស្រុកមង្គលបុរី លើកឡើងពីទុក្ខលំបាកក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តបន្ទាយមានជ័យ នៅព្រឹកថ្ងៃទី២៧ ខែតុលា ឆ្នាំ២០១៥ថាដោយការខ្វះទឹកធ្វើស្រែចំការទើបប្រជាពលរដ្ឋចំណាកស្រុកទៅរកការងារនៅប្រទេសថៃ
តំណាងក្រុមប្រជាពលរដ្ឋ ស្រុកមង្គលបុរី បានលើកឡើងថា មូលហេតុចម្បងដែលធ្វើឲ្យពួកគាត់ចំណាកស្រុកទៅធ្វើការងារនៅប្រទេសថៃ គឺដោយសារតែគ្មានទឹកសម្រាប់បង្កបង្កើនផល បច្ចុប្បន្ននេះ ពួកគាត់មិនអាចបង្កបង្កើនផលដាំដុះបានទេ ដោយសារតែពួកគាត់ត្រូវរំពឹងទៅលើទឹកភ្លៀងតែមួយមុខ។ចំពោះប្រឡាយទឹកមួយខ្សែ ដែលមានប្រវែងប្រមាណជាង៧គីឡូម៉ែត្រ តភ្ជាប់ពីស្ទឹងបវេលខេត្តបាត់ដំបង សម្រាប់ចែកចាយទឹកដល់ឃុំចំនួន៦ក្នុងស្រុកមង្គលបុរី ត្រូវរីងស្ងួតនិងមិនអាចបង្ហូរទឹកមកបាន ដោយសារតែមិនមានការស្តារឡើងវិញ ដូច្នេះហើយទើបធ្វើឲ្យគ្រួសារប្រជាពលរដ្ឋមួយចំនួនធំ ត្រូវបង្ខំចិត្តធ្វើចំណាកស្រុក ដើម្បីទៅរកចំណូលជីវភាពរស់នៅប្រចាំថ្ងៃ។
ពាក់ព័ន្ធបញ្ហានេះ លោក គោស៊ុំ សារឿត អភិបាលខេត្តបន្ទាយមានជ័យ បានថ្លែងថា លោកត្រេកអរពេលដែលបានឮ ប្រជាពលរដ្ឋលើកឡើងពីបញ្ហាទុក្ខលំបាកផ្ទាល់ខ្លួនឲ្យអាជ្ញាធរបានដឹង។ ចំពោះបញ្ហាប្រឡាយទឹកនេះ លោកបានបញ្ជាក់ថា អាជ្ញាធរមិនបានព្រងើយកន្តើយឡើយ គឺអាជ្ញាធរបានដាក់គម្រោងស្តារនិងកសាង ទៅកាន់ក្រសួងធនធានទឹក រួចហើយតែដោយសារតែគម្រោងនោះធំពេក ពេលនេះ ក្រសួងកំពុងតែដាក់ស្នើរថវិកាមកជួសជុលនិងស្តារប្រឡាយនេះ ហើយសង្ឃឹមថា មិនយូរនោះទេ ការស្តារប្រឡាយនឹងចាប់ផ្តើមមានទឹកបរិបូរសម្រាប់អោយប្រជាកសិករមានទឹកប្រើប្រាស់ដើម្បីបង្កបង្កើនផល ជួយសម្រួលដល់ជីវភាព មិនបាច់ធ្វើការចំណាកស្រុកទៅប្រទេសថៃ៕
