ខេត្តបាត់ដំបង ៖ ក្រុមចោរ ២ នាក់យកកាំភ្លើងភ្ជង់ប្លន់ម្ចាស់វីង (ផ្ទះវេលុយ) យកប្រាក់មួយចំនួនគេចខ្លួនបាត់ដោយសុវត្ថិភាព កាលពីម៉ោង ៧ និង ២០ នាទី យប់ថ្ងៃទី២៨ ខែកញ្ញា ឆ្នាំ២០១៥ ចំណុចភូមិក្រឡោមភ្លុក ឃុំព្រៃស្វាយ ស្រុកមោងឬស្សី ខេត្តបាត់់ដំបង ។
ប្រភពពីសមត្ថកិច្ចបានអោយដឹងថា ម្ចាស់ផ្ទះរងគ្រោះមានឈ្មោះ ឈឿន រដ្ឋធី ភេទប្រុសអាយុ៣៥ឆ្នាំ និងប្រពន្ធឈ្មោះ រ៉ែម ម៉ារ៉ា អាយុ៣៤ឆ្នាំ មានទីលំនៅភូមិកើតហេតុ ។ ប្រាក់ដែលបាតបង់មានប្រាក់ថៃ ចំនួន១៦០០០បាត(មួយម៉ឺនប្រាំមួយពាន់បាត)ប្រាក់អាមេរិកចំនួន២០០ដុល្លា(ពីររយដុល្លា)ប្រាក់កម្ពុជា១៥០០០០រៀល(មួយលានប្រាំសែនរៀល)។
ប្រភពបានបន្តថា នៅពេលកើតហេតុមានមន្ត្រីអាវុធហត្ថម្នាក់នៅចម្ងាយប្រហែល ៣០ ម៉ែត្រ បានឃើញសកម្មភាពចោរប្លន់ បន្ទាប់មក បានដកកាំភ្លើងខ្លីបាញ់ឡើងលើ ប្រហែល ៣ ទៅ ៤ គ្រាប់ បណ្តាលអោយក្រុមចោរភ័យដកខ្លួន រត់គេចទៅតាមវាលស្រែ ក្រោយភូមិបាត់តែម្តង ក្នុងហេតុការណ៍ប្លន់នេះមិនមានមនុស្សគ្រោះថ្នាក់់ឡើយ ។
បច្ចុប្បន្ននៅព្រឹកថ្ងៃទី២៩ ខែកញ្ញា ឆ្នាំ២០១៥ ទាំងនគរបាល និងមន្ត្រីអាវុធហត្ថកំពុងដុតដៃ ជើងកំណត់មុខសញ្ញាស្វែងរកចាប់ខ្លួនជនសង្ស័យយកមកផ្តន្ទាទោសតាមផ្លូវច្បាប់ ៕
