ខេត្តបន្ទាយមានជ័យ ៖ លោក កែ គឹមយ៉ាន ឧបនាយករដ្ឋមន្ត្រី និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ បានផ្តល់អំណោយប្រជាពលរដ្ឋក្រីក្រ ចំនួន៤១៣គ្រួសារ មកពី៦ឃុំស្រុកអូរជ្រៅព្រឹកថ្ងៃទី២៧ខែកញ្ញាឆ្នាំ២០១៥នៅបរិវេនសាលាឃុំអូរបីជាន់ ស្ថិតក្នុងភូមិអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ វត្តមានចែកអំណោយដល់ជនក្រីក្រីនេះមានការចូលរួម លោកគោស៊ុំសារឿត អភិបាលខេត្តបន្ទាយមានជ័យ លោក សាន ស៊ានហូ អភិបាលស្រុកអូរជ្រៅ និងក្រុមការងារអមដំណើរលោក កែ គឹមយ៉ាន ជាច្រើននាក់ផងដែរ ។
លោក កែ គឹមយ៉ាន បានមានប្រសាសន៍ក្នុងពិធីចែកអំណោយនោះថា ប្រជាពលរដ្ឋទាំង ៤១៣ គ្រួសារនោះ សុទ្ធតែគ្រួសារក្រីក្របំផុត ព្រោះមុននិងលោកធ្វើការចែកអំណោយជូនដល់ពួកគាត់នោះ លោក កែ គឹមយ៉ាន បានឲ្យក្រុមការងារចុះទៅដល់ខ្នងផ្ទះផ្ទាល់តែម្តង ប្រជាពលរដ្ឋក្រីក្របំផុតទើបអាចចុះបានហើយក្នុងការចុះឈ្មោះចែកអំណោយនោះមិនប្រកាន់និនាការនយោបាយនោះឡើយ ឲ្យតែប្រជាពលរដ្ឋនោះក្រីក្រពិតប្រាកដលោកចែកឲ្យហើយ ។
លោក កែ គឹមយ៉ាន បានបន្តទៀតថា ក្នុងការចែកអំណោយនោះ លោកបានផ្តោតទៅ ១ លើការជួយសាងសង់ផ្ទះជូន ដល់ប្រជាពលរដ្ឋក្រីក្រពីផ្ទះស្បូវឲ្យទៅជាផ្ទះប្រកស័ង្កសី ទាំងអស់ដែលមានប្រហែលចំនួនជិត៣ពាន់ខ្នងហើយចាប់ផ្តើមធ្វើជូនពួកគាត់នៅខែប្រាំងខាងមុខនេះ ។ ២ លោកចាប់អារម្មណ៍លើការបង្កបង្កើនផល លោកថា ក្នុងខេត្តបន្ទាយមានជ័យនេះមាន៩ក្រុងស្រុក ការធ្វើស្រែឆ្នាំនេះស្រុកខ្លះមានទឹកលិច ស្រុកខ្លះមានទឹកធ្វើស្រែ និងស្រុកខ្លះទៀតគ្មានទឹកធ្វើស្រែដូចជាស្រុកថ្មពួក និងស្រុកព្រះនេត្រព្រះជាដើម ចំណែកផលស្រូវវិញធ្វើបានលើសផែនការ តែចំណែកផលស្រូវវិញថយចុះ ព្រោះទឹកភ្លៀងធ្លាក់មិនបានគ្រប់គ្រាន់ លោកថា ឆ្នាំនេះប្រាកដជាមានការខ្វះអង្កជាមិនខានឡើយ ។ លោកក៏បានធ្វើការផ្តាំផ្ញើដល់ប្រជាពលរដ្ឋក្រីក្រទាំងអស់ត្រូវចេះគោរពអនាម័យត្រូវយកចិត្តទុកដាក់ក្នុងការ ហូបស្អាត រស់នៅស្អាត ផឹកស្អាត ពិសេសការហូបចុក គួរឲ្យប្រុងប្រយ័ត្នបន្លែមានជាតិគីមីព្រោះហូបទៅបណ្តាលឲ្យខូចសុខភាព ។
លោកកែគឹមយ៉ានបាននិយាយបន្តទៀតថាក្នុងការចែកអំណោយជូនដល់ប្រជាពលរដ្ឋក្រីក្រតោកយ៉ាកទាំង៤១៣គ្រួសារនោះក្នុងមួយគ្រួសារបានអំណោយអង្ករ២៥គីឡូក្រាម មី១កេស នំធុង១ធុង ទឹកស៊ីអ៊ីវ និងទឹកត្រី ២ យួរ សារុង ២ និងថវិកា ១ ម៉ឺនរៀល ។
ពលរដ្ឋក្រីក្រទាំង៤១៣គ្រួសារក្រោយពីបានទទួលអំណោយហើយគាត់បានថ្លែងអំណគុណយ៉ាងជ្រៀលជ្រៅដល់លោក កែ គឹមយ៉ាន និងក្រុមគ្រួសារនិងក្រុមការងារទាំងអស់ឲ្យជួបតែសេចក្តីសុខគ្រប់ៗគ្នា ៕
