ប៉ៃលិន ៖ លោក ពេជ្រ ប៊ុនធិន រដ្ឋមន្ត្រីក្រសួងមុខងារ សាធារណៈអញ្ជើញជាអធិបតីភាពប្រកាសតែងតាំង លោក នាក់ ណាង ជាប្រធានមន្ទីរមុខងារសាធារណៈខេត្តប៉ៃលិនកាលពីព្រឹកថ្ងៃទី១៦ខែកក្កដាឆ្នាំ២០១៤នៅសាលប្រជុំសាលាខេត្តប៉ៃលិន។
វត្តមានអញ្ជើញចូលរួមជាភ្ញៀវកិត្តិយសមាន លោក កើត សុធា អភិបាលខេត្តប៉ៃលិន ព្រមទាំងប្រតិភូអមដំណើរ និងមន្ត្រីរាជការជុំវិញសាលាខេត្តជាច្រើនរយនាក់ផងដែរ ។
លោក ប្រាក់ វីក្រា អគ្គនាយកដ្ឋានរដ្ឋបាល និងហិរញ្ញវត្ថុនៃក្រសួងមុខងារសាធារណៈបានឲ្យដឹងថា យោងតាមសេចក្ដីប្រកាសតែងតាំងរបស់ក្រសួងមុខងារសាធារណៈបានសម្រេចប្រកាសតែងតាំងលោកនាក់ ណាងជាប្រធានមន្ទីមុខងារសាធារណៈខេត្តប៉ៃលិន។
លោក កើត សុធា អភិបាលខេត្តប៉ៃលិនបានមានប្រសាសន៏ថា ការបង្កើតឲ្យមានមន្ទីមុខងារសាធារណៈនិងដាក់ឲ្យដំណើរការជាផ្លូវការនាពេលនេះ ដើម្បីការពារផលប្រយោជន៏មន្ត្រីរាជការដូចជាការតម្លើងកាំប្រាក់តម្លើងឋានន្តរស័ក្តឬការផ្លាស់ប្ដូរមន្ត្រីរាជការក្នុងខេត្តប៉ៃលិន ។ល។ លោកបានបញ្ជាក់ថា មន្ទីមុខងារសាធារណៈថ្មីនេះ នៅពុំទាន់មានទីតាំងថ្មីសម្រាប់ធ្វើការងារនោះទេប៉ុន្តែបានសុំខ្ចីការិយាល័យរបស់មន្ទីផែនការខេត្តដើម្បីចូលធ្វើការងារ ។ លោកបានបន្តថា សូមឲ្យមន្ទីផែនការត្រូវសហការគ្នាជាមួយមន្ទីមុខងារសាធារណៈដែលបានបង្កើតឡើងថ្មីហើយពុំមានទីតាំងសម្រាប់ធ្វើការនិងរក្សាសាមគ្គីភាពឲ្យបានល្អ។
លោក នាក់ ណាង ប្រធានមន្ទីរមុខងារសាធារណៈខេត្តប៉ៃលិនបានប្ដេជ្ញាចិត្តអនុវត្ត
ន៏គោរពស្រលាញ់ស្មោះស្ម័គ្រជាតិសាសនាព្រះមហាក្សត្រ ចូលរួមអនុវត្តន៍គោលនយោបាយរបស់រាជរដ្ឋាភិបាលកម្ពុជាអណត្តិទី៥ អនុវត្តន៏បំពេញការងារបស់ខ្លួននិងកិច្ចសហការឲ្យបានល្អជាមួយមន្ទីរស្ថាប័នពាក់ព័ន្ធនៅក្នុងខេត្តប៉ៃលិន ។
លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈបានមានប្រសាសន៏ណែរនាំ
ដល់លោកនាក់ ណាងប្រធានមន្ទីមុខងារសាធារណៈខេត្តប៉ៃលិនត្រូវខិតខំបំពេញតួនាទីភារកិច្ចរបស់ខ្លួនដើម្បីការពារនិងផ្ដល់ផលប្រយោជន៏ពិតប្រាកដដល់មន្ត្រីរាជការទាំងការតម្លើងឋានន្តរស័ក្តិឬតម្លើងប្រាក់ខែ ។ល។ ប៉ុន្តែបើលោកប្រធានមន្ទីមុខងារសាធារណ មិនបានបំពេញធ្វើការងារតាមតម្រូវការរបស់មន្ត្រីរាជការហើយពួកគាត់បានដាក់ពាក្យប្ដឹងគឺត្រូវទទួលឬមានទោសទាន់ទៅតាមផ្លូវច្បាប់ ។
ជាចុងបញ្ចប់ លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈ បានប្រគល់សៀវភៅមុខងារសាធារណដល់លោក កើត សុធា អភិបាលខេត្ត លោក ឡី ចាន់ឆាយ សមាជិកក្រុមប្រឹក្សាខេត្ត និងលោក នាក់ ណាង ប្រធានមន្ទីរមុខងារសាធារ
ណខេត្តប៉ៃលិន ទុករៀនសូត្រ និងយល់ដឹងបន្ថែមទៀត ៕
