ខេត្តបន្ទាយមានជ័យ ៖ ក្រុមអ្នកមានអំណាច និងទ្រព្យធន បាននាំគ្នាចាក់ដីរំលោភ យកអូរបុរាណធ្វើកម្មសិទ្ធិ បណ្តាលអោយស្ទះមុខទឹក បង្កភាពរីងស្ងួតនៅរដូវគ្មានភ្លៀង និងទឹកជំនន់រយៈពេល៤ឆ្នាំផ្ទួនៗនៅរដូវវស្សាអូរនោះស្ថិតនៅចំណុចស្ពានទី១ តាមបណ្តោយផ្លូវជាតិលេខ៦ក្នុងក្រុងសិរីសោភ័ណខេត្តបន្ទាយមានជ័យ។ហេតុការណ៍ដែលលប់អូរធ្វើកម្មសិទ្ធមានរយៈពេលយូរមកហើយរហូតមកដល់ថ្ងៃទី២៧ខែមិនាឆ្នាំ២០១៥គ្មានសមត្ថកិច្ចជំនាញ ឬអាជ្ញាធរចុះទប់ស្កាត់ឡើយសង្ស័យបានប្រាក់កាក់ពីម្ចាស់ដីទាំអនោះ។
ការចាក់ដីរំលោភយកអូរបុរាណនេះដែរគឺគេធ្វើឡើងជាបន្តបន្ទាប់ទាំងផ្នែកខាងក្រោមស្ពាននិងខាងលើស្ពាន ដោយអ្នកខ្លះទើបតែចាក់ ដីចូលបម្រុង កសាងសំណង់រឹងមាំ ចំណែកអ្នកខ្លះទៀត បានចាក់ រំលោភយកធ្វើកម្មសិទ្ធិ ធ្វើរបងថ្មកសាង ផ្ទះវីឡានិងដាំដើមចេកផងនោះដែរ។
សកម្មភាពបែបនេះ ធ្វើឱ្យរង់ការរិះគន់ពីសំណាក់ប្រជាពលរដ្ឋរស់នៅក្នុងខេត្តបន្ទាយមានជ័យទៅលើអាជ្ញាធរដែនដីនិងមន្ត្រីអង្គភាពជំនាញពាក់ព័ន្ធដោយមិនបានគិតគូរទប់ស្កាត់នូវទង្វើរំលោភយកអូររដ្ឋខុសច្បាប់ធ្វើជាកម្មសិទ្ធនោះ ។
ប្រជាពលរដ្ឋរស់នៅក្នុងខេត្តបន្ទាយមានជ័យបានលើកឡើងទៀតថា អូរបុរាណស្ថិតនៅចំណុចខាងលើកាលពីដើមឡើយជាអូរមានទឹកហូរចេញចូលខួបប្រាំង និង ខួបវស្សាហើយជាអូរសម្រាប់រំដោះទឹកចេញពីផ្នែកខាងលើមកក្រោមនិងរំដោះទឹកពីផ្នែកខាងក្រោមទៅខាងលើវិញកាលណាមានទឹកជំនន់ជន់ជោរខ្លាំងនៅផ្នែកខាងក្រោមនោះ ។
ប្រជាពលរដ្ឋបានលើកឡើងទៀតថា បច្ចុប្បន្ននេះអូរនេះ ត្រូវបានគេចាក់ដីលប់យកធ្វើជា កម្មសិទ្ធិកសាងផ្ទះថ្មអស់ហើយ ។
ពាក់ព័ន្ធនិងកិច្ចការងារនេះ លោក យឹម ប៊ុនរុំ ប្រធានមន្ទីរធនធានទឹកខេត្ត បានប្រាប់ ឱ្យដឹង តាមទូរស័ព្ទនៅព្រឹកថ្ងៃទី២៧ ខែមីនា នេះថា លោកទទួលស្គាល់ពិតជាមានការចាក់ដី អាណាធិបតេយ្យរំ លោភយកដីអូរដែលជាផ្លូវទឹកនោះមែន ដោយខាងមន្ទីរពិបាកនិងហាម ឃាត់ណាស់ពីព្រោះបញ្ហានេះលោកតែងតែទាក់ទងសហការទៅអាជ្ញាធរដែនដីចុះទៅទប់ស្កាត់មិនឱ្យចាក់ដីលប់អូរនោះទេក៏ប៉ុន្តែនៅតែមានអ្នកខ្លះលួចលាក់ចាក់ដីចូលជាដដែល។
លោកបានបញ្ជាក់ឱ្យដឹងទៀតថាការចាក់ដីលប់អូររបិទផ្លូវទឹកនេះដែរគឺអាចរងផលប៉ះពាល់ដល់ប្រជាពលរដ្ឋ រស់នៅផ្នែកខាងលើផ្លូវទឹកនិងខាងក្រោមផ្លូវទឹកនោះទៀតផង។
លោកក៏សូមសំណុំពរឱ្យអាជ្ញាធរដែនដីឱ្យជួយទប់ស្កាត់ការចាក់ដីអាណាធិបតេយ្យ លប់ អូរនោះជាបន្ទាន់ផងពីព្រោះមានតែអាជ្ញាធរដែនដីទេអាចមានលទ្ធភាពទប់ស្កាត់បាន ។
លោកស្រីចាន់ថេងអភិបាលក្រុងសិរីសោភ័ណបានបំភ្លឺឱ្យដឹងថារូបលោកធ្លាប់ឱ្យអភិបាលរងក្រុងដឹកនាំកម្លាំងចុះទៅត្រួតពិនិត្យនៅចំណុចនោះម្តងរួចមកហើយដោយការពិនិត្យមិនមានអ្វីប៉ះពាល់ធ្ងន់ធ្ងរនោះទេប៉ុន្តែលោកស្រីនឹងចុះទៅត្រួតពិនិត្យម្តងទៀត ៕
