ខេត្តប៉ៃលិន ៖ បុរសម្នាក់ត្រូវបានប៉ូលិសឃាត់ខ្លួន ខណៈពេលដែលកំពុងបើករថយន្តរត់គេច បន្ទាប់ពីបានលួចរថយន្តកាមរីឆ្លាម របស់អ្នករត់តាក់ស៊ីម្នាក់ ដែលចតនៅចិញ្ចើមថ្មមុខបេនឡានថ្មីប៉ៃលិន ហើយចុះទៅរកចាប់ម៉ូវ ។ ហេតុការណ៍ឃាត់ខ្លួននេះត្រូវបានធ្វើឡើងកាលពីវេលាម៉ោង៧និង៤៩នាទី យប់ថ្ងៃទី២២ ខែតុលា ឆ្នាំ២០១៤ នៅតាមផ្លូវលំទៅអាងជីងចក់ ស្ថិតក្នុងភូមិអូរច្រារលើ សង្កាត់ទួលល្វា ក្រុងប៉ៃលិន ខេត្តប៉ៃលិន ។
លោក សូ សារឹម អនុប្រធានការិយាល័យព្រហ្មទណ្ឌកំរិតធ្ងន់ស្នងការនគបាលខេត្តប៉ៃលិន បានឲ្យដឹងថាជនសង្ស័យ ដែលត្រូវបានប៉ូលិសឃាត់ខ្លួនឈ្មោះ លឿត កំសត់ ហៅគឹម ភេទប្រុស អាយុ២៩ឆ្នាំមុខរបរជាកម្មករ មានទីលំនៅភូមិកោះគ្រាប់បាយ ឃុំបោះមង្គល ស្រុកម៉ោងឫស្សីខេត្តបាត់ដំបង ។ ឯម្ចាស់រថយន្តឈ្មោះ អុំ ផេង ភេទប្រុសអាយុ៥២ឆ្នាំ មុខរបរអ្នករត់តាក់ស៊ីប៉ៃលិនទៅ ព្រំ រស់នៅភូមិផ្សារព្រំឃុំស្ទឹងកាច់ ស្រុកសាលាក្រៅ ខេត្តប៉ៃលិនរថយន្តរបស់គាត់ម៉ាក់កាមរីឆ្លាម សេរីឆ្នាំ១៩៩៩ ពណ៌សពាក់ស្លាកលេខ ភ្នំពេញ2k-2064 ។
លោក អុំ ផេង ជាម្ចាស់រថយន្តបានឲ្យដឹងថា មុនពេលកើតហេតុម៉ោងប្រហែលជា៦កន្លះល្ងាចគាត់បើករថយន្តមកឈប់នៅចិញ្ចើមថ្មមុខបេឡានថ្មី ដោយមិនបានបន្លត់រថយន្តទេ ។ គាត់បានចុះពីរថយន្តដើរទៅរកចាំម៉ូវ ហើយឈរនិយាយលេងជាមួយអ្នករត់តាក់ស៊ីដូចគ្នា ក៏ឃើញបុរសម្នាក់ចូល ក្នុងរថយន្តគាត់ហើយបើកចេញទៅបាត់តែគាត់ស្មាន ថាជាគ្នាឯង បើកទៅយកម៉ូវ លុះមួយសន្ទុះក្រោយមក គាត់ក៏សួរតៃកុងគ្នាឯងថា អ្នកណាបើកឡានខ្ញុំ ម៉េចយូរម្លះ ស្រាប់តែពួកគេអត់ដឹងទេ ទើបដឹងថា រថយន្តរបស់គាត់ត្រូវគេលួច ក៏ប្តឹងប៉ូលិសតែម្តង ។
លោក សូ សារឹម បានបញ្ជាក់ថា ក្រោយពីខាត់ខ្លួនជនសង្ស័យបានសារភាពថាគេពិតជាបានលួចរថយន្ត របស់ជនរងគ្រោះប្រាកដមែន ហើយបំរុងបើករត់គេច តែត្រូវប៉ូលិសស្ទាក់ចាប់បានតែម្តង ។ ជនសង្ស័យត្រូវ បានកម្លាំងប៉ូលិស កសាងសំនុំរឿងបញ្ជូនទៅតុលាការនៅរសៀលថ្ងៃទី២៣ ខែ តុលា នេះដើម្បីចាត់ការទៅតាមផ្លូវច្បាប់ ៕
សំ គូលីន
