បាត់ដំបង ៖ កម្លាំងនគរបាលការិយាល័យប្រឆាំងគ្រឿងញៀន សហការនគរបាលក្រុមបង្កាបង្ក្រាបគ្រឿងញៀន ២ ករណី៖ករណីទី១ បង្ក្រាបឃាត់យុវជនម្នាក់ និងដកហូតបានវត្ថុតាងថ្នាំញៀនប្រភេទ ម៉ាទឹកកក២ថង់ស្មើទម្ងន់ ១,៣៣ ក្រាមកាលម៉ោង១៦និង១៥នាទី រសៀលថ្ងៃទី២០ ខែតុលា ឆ្នាំ២០១៤ នៅចំណុចភូមិ ២០ ឧសភាសង្កាត់ស្វាយប៉ោ ក្រុងបាត់ដំបង ។ ករណីទី២ឃាត់ខ្លួនស្ត្រីម្នាក់ និង ដកហូតបានវត្ថុតាងថ្នាំញៀន ប្រភេទយ៉ាម៉ា ចំនួន៩គ្រាប់ កាលពីម៉ោង១រំលងអធ្រាតថ្ងៃទី២១ ខែតុលា ឆ្នាំ២០១៤ នៅចំណុចភូមិ២០ ឧសភា សង្កាត់ស្វាយប៉ោ ក្រុងបាត់ដំបង ។
លោក ស៊ាន សូណាល់ នាយនគរបាលការិយាល័យប្រឆាំងគ្រឿងញៀន ស្តីទីបានអោយដឹងថា ករណីទី១ ឃាត់យុវជនម្នាក់ឈ្មោះ ធៀវ កុម្ភៈ ហៅប៉ាទី អាយុ១៩ឆ្នាំ មានទីលំនៅភូមិកើតហេតុ ។ ដកហូតបានវត្ថុតាងថ្នាំញៀនប្រភេទ ម៉ាទឹកកក២ថង់ស្មើទម្ងន់១,៣៣ក្រាម និងទូរស័ព្ទដៃ១គ្រឿង ។ ករណីទី២ សមត្ថកិច្ចឃាត់ខ្លួនស្ត្រីម្នាក់ឈ្មោះ រិទ្ធ ចំរើន អាយុ៣៧ឆ្នាំ មានផ្ទៃពោះ ៥ ខែមានទីលំនៅភូមិ-សង្កាត់ទួលតាឯក ក្រុងបាត់ដំបង ដកហូតបានវត្ថុតាងថ្នាំញៀន ប្រភេទយ៉ាម៉ាចំនួន ៩ គ្រាប់ និងទូរស័ព្ទដៃ ១ គ្រឿង ។
ក្រុមជនសង្ស័យបានសារភាពថា ពួកគេធ្លាប់លក់ដូរគ្រឿងញៀនយូរមកហើយ ។ លោក សុខ និមល បានបញ្ជាក់ថា ក្រុមជនសង្ស័យទាំង ២ នាក់និងថ្នាំញៀនយ៉ាម៉ា៩គ្រាប់ និងម៉ាទឹកកក ២ ថង់ បញ្ជូនទៅតុលាកា នារសៀលថ្ងៃទី២១ ខែតុលា ឆ្នាំ២០១៤ ចាត់ការតាមនិតិវិធី ៕
