បាត់ដំបង ៖ នៅរសៀលថ្ងៃទី៧ ខែតុលា ឆ្នាំ២០១៤ នៅដងស្ទឹងសង្កែក្រុងបាត់ដំបង មានរៀបចំការប្រកួតអុំទូកចំនួន២២គ្រឿង មកពីខេត្តប៉ៃលិន ខេត្តបាត់ដំបង ខេត្តកំពង់ឆ្នាំង និងខេត្តបន្ទាយមានជ័យ ចូលរួមប្រកួតអបអរសាទរថ្ងៃចេញព្រះវស្សា ដើម្បីដណ្តើមជ័យលាភីទៅប្រកួតនៅរាជធានីភ្នំពេញ ក្នុងព្រះរាជពីធីបុណ្យអុំទូកបណ្តែតប្រទីប សំពះព្រះខែ អកអំបុក នាពេលខេងមុខផង ។
ពីធីនេះប្ររព្ធធ្វើឡើង ក្រោមអធិបតីភាពលោក អ៊ុក វង្ស ប្រធានក្រុមប្រឹក្សាខេត្តនិងលោក ប៊ុន សេង មេបញ្ជាការយោធភូមិភាគទី៥ ។ វត្តមានអញ្ជើញចូលរួមមានលោក ង្វៀង សឺនស៊ី អគ្គកុងស៊ុលវៀតណាម ប្រចាំខេត្តបាត់ដថំបង គណៈប្រតិភូនៃព្រះរាជាណាចក្រថៃខេត្តប៉ៃលិន ខេត្តកំពង់ឆ្នាំងនិងខេត្តបន្ទាយមានជ័យ អ្នកឧញ៉ា ភ្ញៀវជាតិអន្តរជាតិ ក្រុមកីឡាករ កីឡាការិនីនិងប្រជាជនយ៉ាងច្រើនកុះករ ។
លោក អ៊ុយ រី សមាជិកក្រុមប្រឹក្សាខេត្តបានអោយដឹងថា ដោយសារទឹកជំនន់ផ្ទួនៗ ពិធីអុំប្រណាំងទូកនៅខេត្តបាត់ដំបង បានផ្អាកចំនួន២ឆ្នាំ ដោយស្ថានភាពទឹកជំនន់មានភាពធូរស្រាល និងបានការណែនាំដ៏ខ្ពង់ខ្ពស់ពីសម្តេចអ្គ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានផ្តល់ឱកាសរៀបចំកម្មវិធីប្រណាំងទូកនេះឡើងវិញ ។ នេះជាលើកទី១៤ ក្នុងគោលបំណងរំលឹកឡើងវិញ ពីវីរភាពដ៏អង់អាចក្លាហានរបស់កងទ័ពជើងទឹក និងបង្ហាញេពីការសាមគ្គីភាព មិត្តភាពរបស់អង្គភាពរដ្ឋ ស្ថាប័ននានា និងប្រជាពលរដ្ឋគ្រប់មជ្ឈដ្ឋានក្នុងខេត្តបាត់ដំបង ។ យើងកាន់តែមានស្មារតីផុលផុសឡើង ចូលរួមចំណែកលើកស្ទួយរក្សានូវវប្បធម៌ប្រពៃណីខ្មែរតាំងពីបរមកាលមក ។ ម្យ៉ាងទៀត គឺដើម្បីបង្កភាពសប្បាយរីករាយជូនប្រជាពលរដ្ឋ ដែលបានសំរាកពីការនឿយហត់ ក្នុងការកសាងជីវភាពរស់នៅ និងកិច្ចការអភិវឌ្ឍន៍សង្គម និងអនុវត្តន៍តាមស្មារតីសេចក្តីណែនាំរបស់គណៈកម្មាធិការជាតិរៀបចំបុណ្យជាតិ អន្តរេជាតិ ដើម្បីធ្វើការប្រកួតជ្រើសរើសទូក ដែលជាប់ចំណាត់ថ្នាក់ទៅចូលរួមប្រណាំងនៅរាជធានីភ្នំពេញ ក្នុងព្រះរាជពីធីបុណ្យអុំទូកបណ្តែតប្រទីប សំពះព្រះខែ អកអំបុក នាពេលខេងមុខផង ។
ចំនួនទូកប្រកួតមានចំនួន ២២ គ្រឿង ក្នុងនោះទូកខ្លីអន្តរជាតិផ្នែកបុរស ប្រវែង១៤ម៉ែត្រចុះ ចំណុះ២២នាក់ មានចំនួន៧គ្រឿង ។ ទូកខ្លីនារី ចំណុះ ២២ នាក់ មានចំនួន ៣ គ្រឿង ។ ទូកខ្លីប្រពៃណី ប្រវែង ១៥ ម៉ែត្រឡើង ចំណុះ២២នាក់មានចំនួន៤គ្រឿង ។ ទូកវែងប្រពៃណី ចំណុះ៤៩ នាក់ ដល់៦៩នាក់ មានចំនួន ៦ គ្រឿង ។ ទូកខ្លីរបស់ខេត្តប៉ៃលិន ខេត្តកំពង់ឆ្នាំង ចំណុះ៦នាក់ មានចំនួន២គ្រឿង មកប្រកួជាកិត្តិយស ។ ចំពោះទូកដែលបានទទួលចំណាត់ថ្នាក់ខ្ពស់នឹងជ្រើសរើសទៅចូលរួមប្រណាំងក្នុងពីធីបុណ្យអុំទូក បណ្តែប្រទីប អកអំបុកនិងសំពះប្រះខែនៅរាជធានីភ្នំពេញ ខាងមុខបន្តទៀត ។
លោក អ៊ុក វង្ស ប្រធានក្រុមប្រឹក្សាខេត្តបាត់ដំបងបានអោយដឹងថា ពិធីបុណ្យអុំទូកមានតាំងពីសម័យលោកម្ចាស់ ដែលលោកម្ចាស់រៀបចំប្រណាំងនៅមុខកំផែង ទូកប្រណាំងចេញដំណើរពីមុខផ្សារស៊ីផ្សារលើ ប្រជែងគ្នាចាប់ទង់នៅមុខវត្តសង្កែ ។
ជាការពិតណាស់ ខេត្តបាត់ដំបងយើងធ្លាប់ទទួលរងគ្រោះទឹកជំនន់ផង និងគ្រោះរាំងស្ងួតផងយ៉ាងធ្ងន់ធ្ងរជាច្រើនលើក ប៉ុន្តែយើងនៅតែមានសុទិទ្ធិនិយមថាក្រោមការដឹកនាំដ៏ឆ្លាតវ៉ៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងជំនះរាល់ការលំបានឧបសគ្គទាំងឡាយ ហើយពុះពាររៀបចំអុំទូកឆ្នាំនេះ អោយបានសប្បាយរីករាយ មានសុវត្ថិភាពនិងជ័យជំនះ ។ ក្នុងន័យនេះ ចង់និយាយថា យើងរៀបចំអោយមានការប្រណាំងទូករបស់ខេត្តយើងនាឆ្នាំនេះ មានអត្ដថន័យសំខាន់ៗ ៥ ចំណូច គឺ៖១ ដើម្បីចូលរួមអបអរសាទរបុណ្យប្រពៃណី ថ្ងៃចេញព្រះវស្សា និងបណ្តែតប្រទីប របស់ខេត្តបាត់ដំបង ។ ២ ដើម្បីតភ្ជាប់និងរក្សាប្រពៃណីដែលខេត្ត យើងបានបាត់បង់កន្លងទៅរយៈពេលជាច្រើនទសវត្សដូចជា ដោយសារតែសង្គ្រាមនិងអាក់ខាន ដោយសារគ្រោះទឹកជំនន់និងគ្រោះរាំងស្ងួតជាដើម ។ ៣ ដើម្បីបង្ហាញអោយឃើញនូវការរីកចំរើនរបស់ខេត្តបាត់ដំបងយើងលើគ្រប់វិស័យ រាប់ទាំងវិស័យសិល្បៈ វប្បធម៌ និងប្រពៃណីផង ។ ៤ ដើម្បីអោយប្រជាពលរដ្ឋយើងទូទៅកល្នុងខេត្តបាត់ដំបងទាំងមូល ទទួលបាននូវការសប្បាយរីករាយបំបាត់ទុក្ខកង្វល់ បង្កើនស្មារតីឈោងចាប់យកការងារថ្មីថែមទៀត សម្រាប់ការអភិវឌ្ឍន៍ក្នុងគ្រួសារនិងសង្គម ។ ៥ ដើម្បីបន្តឈានទៅចូលរួមប្រណាំងជាមួយបណ្តាលខេត្តក្រុង ទូទាំងប្រទេសនៅរាជធានីភ្នំពេញនិងក្រៅប្រទេស ។
សូមអំពាវនាវដល់បងប្អូនប្រជាពលរដ្ឋដែលទទួលរងគ្រោះដោយសារភាពរាំងស្ងួត ដែលមានប្រភពទឺកនៅជិត សូមបន្តខិតខំយកចិត្តទុកដាក់រក្សាទប់ទឹកនិងដាំដុះស្រូវឬដំណាំផ្សេងៗ ទៅតាមផែនការដែលគណៈកម្មាធិការគ្រប់គ្រងគ្រោះ មហន្តរាយខេត្តបានដាក់ចេញ ។ ចំពោះមន្ត្រីពាក់ព័ន្ធត្រូវត្រូវបង្កើនស្មារតីយកចិត្តទុកដាក់ក្នុងការជួយសង្គ្រោះ ប្រជាពលរដ្ឋដែលរងគ្រោះដោយសារការអត់ឃ្លាននិងគ្រោះរាំងស្ងួត ។ និងសូមអំពាវនាវដល់សហគមន៍ អង្គការជាតិ អន្តរជាតិនានា សូមបន្តចូលរួមសហការជាមួយអាជ្ញាធរខេត្ត ដើម្បីជួយប្រជាពលរដ្ឋដែលកំពង់ជួបការលំបាកខ្វះខាតផង ៕
