ប៉ៃលិន ៖ បុរសម្នាក់ស្រវឹងស្រាជិះម៉ូតូគេចកន្លុក ចូលរថយន្តអង្គការហេឡូ (halo) បើកបញ្ច្រាស់ទិសគ្នាប៉ើងធ្លាក់ ចញ្ចើមផ្លូវលំបណ្តាលអោយស្លាប់នៅកន្លែងកើតហេតុ រីឯអ្នកបើកបររថយន្តគេចខ្លួនបាត់ កាលម៉ោង១៣និង៣០នាទីរសៀល ថ្ងៃទី០១ ខែតុលា ឆ្នាំ២០១៤ នៅភូមិបឹងរាំងសង្កាត់អូរតាវ៉ៅក្រុងប៉ៃលិន ។
តាមប្រភពពីមន្ត្រីនគរបាលចរាចរណ៍ក្រុង និងខេត្តប៉ៃលិន ចុះវាស់វែងបានអោយដឹងថា ជនរងគ្រោះដែលស្លាប់មានឈ្មោះ ឈាង ឡេង អាយុ៤៥ឆ្នាំ របរកម្មករមានទីលំនៅស្រុកចំការលើខេត្តកំពង់ចាម (មកស្នាក់នៅបណ្តោះអាសន្នក្រុងប៉ៃលិន) ។ ជនរងគ្រោះជិះម៉ូតូសងកូរ៉េពណ៌ក្រហមពាក់ស្លាកលេខប៉ៃលិន U2324 ។ ចំណែករថយន្តអង្គការហេឡូ (halo) បើកបរដោយឈ្មោះ យួមមុំភេទប្រុសអាយុ៣៦ឆ្នាំគេចខ្លួនបាត់រស់នៅខេត្តបាត់ដំបង។
តាមប្រភពបុរស ២ នាក់ ឈ្មោះ បណ្ឌិត ភព អាយុ២៦ឆ្នាំ និងឈ្មោះ សុខ វណ្ណា អាយុ២៨ឆ្នាំ រស់នៅភូមិសង្កាត់ទឹកថ្លា ក្រុងសិរីសោភ័ណ្ឌ ខេត្តបន្ទាយមានជ័យ ជាមួយគ្នា និងជាបុគ្គលិកអង្គការហេឡូ អ្នកជិះលើរថយន្តអង្គការហេឡូ (halo) ដែរនោះ បានប្រាប់សមត្ថកិច្ចថា មុនពេលកើតហេតុក្រុមអង្គការហេឡូ (halo) បានបើករថយន្តចុះមកស្រាវជ្រាវទីតាំងភូមិខាងលើ ដើម្បីរាវរកចំការម៉ីន ពេលធ្វើដំណើរមកដល់កន្លែងកើតហេតុ បានឃើញម៉ូតូ១គ្រឿង បើកបរដោយបុរសរងគ្រោះ បានរ៉េគេចកន្លុក ហើយវ៉េចង្កូតចូលចំណែកខាងស្តាំរថយន្តបណ្តាល អោយរថយន្តបុកបន្ថែមកិនម៉ូតូនិងប៉ើងមនុស្សចូលដុបព្រៃចិញ្ចើមផ្លូវលំបណ្តាលអោយស្លាប់នៅកន្លែងតែម្តង ភ្លាមនោះ ភាគីខាងរថយន្តភ័យខ្លាំងបានបើកទ្វារត់គេចខ្លួនតែងម្តង ។
ប្រភពសាក្សីអ្នកស្គាល់ជនរងគ្រោះបានអោយដឹងថា មុនពេលកើតហេតុជនរងគ្រោះបានផឹកស៊ីនៅជុំគ្នាស្រវឹងស្រឿងៗ ក្រោយមកបានជិះម៉ូតូសំដៅទៅផ្ទះមិត្តភ័ក្តម្នាក់ទៀត ដើម្បីបបួលផឹកស្រាដែរ តែធ្វើដំណើរមិនទាន់ដល់គោលដៅផង ក៏ត្រូវគ្រោះថ្នាក់ចរាចរណ៍តែម្តង ។
មន្ត្រីនគរបាលចរាចរណ៍ក្រុងនិងខេត្តប៉ៃលិនចុះវាស់វែងបានបញ្ជាក់ថា ក្រោយពីការវាស់វែងនិងស្រាវជ្រាវកោសលវិច័យ បានការសន្និដ្ឋានករណីគ្រោះថ្នាក់ចរាចរណ៍នេះ មានកំហុសដោយសារភាគីខាងម៉ូតូ បើកចូលចំណែកស្តាំរថយន្ត ។ បច្ចុប្បន្នម៉ូតូនិងរថយន្តត្រូវយកមករក្សាទុកនៅការិយាល័យចរាចរណ៍ផ្លូវគោកខេត្តប៉ៃលិន រីឯសពជនរងគ្រោះតម្កល់នៅវត្តភ្នំបឹងរាំង ក្នុងភូមិឃុំកើតហេតុ រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
