បាត់ដំបង ៖ ជនស្ស័យដែលកាប់សម្លាប់មនុស្សម្នាក់ ក្នុងពេលផឹកស៊ីនៅភូមិរៀមគន់ឃុំគារស្រុកមោងឬស្សី កាលពីឆ្នាំ២០០៦ ហើយរត់គេចខ្លួនទៅនៅភ្នំពេញ និងចុងក្រោយទៅនៅប៉ោយប៉ែត ទើបប៉ូលិសខេត្តបាត់ដំបង សហការជាមួយប៉ូលិសក្រុងប៉ោយប៉ែត ចាប់ខ្លួនបានកាលពីម៉ោង៥និង៤០នាទីល្ងាច ថ្ងៃទី៣០ ខែកញ្ញា ឆ្នាំ២០១៤ រួចនាំខ្លួនមកសួរនាំនៅស្នងការខេត្តបាត់ដំបង ហើយបញ្ជូនខ្លួនទៅតុលាការ នៅព្រឹកថ្ងៃទី ១ ខែតុលានេះ ។
លោក ជា ប៉ូច មន្ត្រីប៉ូលិសផ្នែកអនុវត្តដីកា នៃស្នងការនគរបាលខេត្តបានឲ្យដឹងថា ជនសង្ស័យមានឈ្មោះ ចក់ កំសត់ ភេទប្រុសអាយុ៣៦ឆ្នាំទីលំនៅមុនចាប់ខ្លួន នៅភូមិរៀមគន់ឃុំគារស្រុកមោងឬស្សី ។ ចំណែកអ្នកស្លាប់មានឈ្មោះកាំងភេទ ប្រុស អាយុ៣៥ឆ្នាំរស់នៅភូមិ ឃុំជាមួយគ្នា ។
លោកវរសេនីយ៍ឯក ជេត វណ្ណនី ស្នងការងទទួលការិយាល័យកណ្តាល យុត្តិធម៌បានបញ្ជាក់ថា ការតាមចាប់ខ្លួនជនសង្ស័យ រហូតដល់ក្រុងប៉ោយប៉ែត គឺអនុវត្តតាមដីកាបង្គាប់ឲ្យចាប់ខ្លួនលេខ ២១៧ ដបចខរបស់លោក ឌុច សុខសារិន ចៅក្រមស៊ើបសួរអមសាលាដំបូង ខេត្តចុះថ្ងៃទី១១ ខែមិនា ឆ្នាំ២០០៩ ចោទពីបទឃាតកម្មគិតទុក ជាមុនប្រព្រឹត្តនៅភូមិរៀមគន់ ឃុំគារស្រុកមោងឬស្សីខេត្តបាត់ដំបង កាលពីថ្ងៃទី១៧ ខែឧសភា ឆ្នាំ២០០៦ បទល្មើសមានចែងឲ្យផ្តន្ទាទោស តាមមាត្រា៣ នៃច្បាប់ស្តីពីស្ថានទម្ងន់ទោសនៃបទឧក្រិដ្ឋ ។
ជនសង្ស័យបានឆ្លើយសារភាពថា ខ្លួនបានកាប់ទៅលើឈ្មោះ កាំង មួយកាំបិតខ្វែវ បណ្តាលឲ្យស្លាប់កាលពី ថ្ងៃទី១៧ ខែឧសភា ឆ្នាំ២០០៦ ពិតប្រាកដមែន ក្នុងពេលផឹកស៊ីស្រវឹង ហើយមានទំនាស់គ្នាដោយឈ្មោះកាំងបាន
យកកាំបិតចាក់ខ្លួនមុនត្រូវមាត់ ។ ក្រោយពេលកាប់សម្លាប់ជនរងគ្រោះរួច ខ្លួនបានទៅរស់នៅខណ្ឌឬស្សីកែវរាជធា
នីភ្នំពេញបានប្រពន្ធ ជាស្ត្រីមេមាយម្នាក់មានកូនជាមួយប្តីមុនពីរនាក់ ហើយមានកូនជាមួយខ្លួនម្នាក់ ។ នៅចុងខែ កញ្ញា២០១៤នេះ ខ្លួនបានមកក្រុងប៉ោយប៉ែតខេត្តបន្ទាយមានជ័យ ដើម្បីទៅធ្វើពលករនៅប្រទេសថៃ ។ ពេលកំពុង រត់ការក៍ត្រូវសមត្ថកិច្ចចាប់ខ្លួនបានតែម្តង។
លោកស្នងការរងបានបញ្ជាក់ថា បច្ចុប្បន្នជនសង្ស័យត្រូវបានប៉ូលិសជំនាញ កសាងសំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី១ ខែតុលា ឆ្នាំ២០១៤ ដើម្បីចាត់ការតាមច្បាប់ ៕
