បាត់ដំបង៖ ជនសង្ស័យម្នាក់ធ្លាប់កាប់អ្នកភូមិអោយរបួសរួចរត់គេចខ្លួន ពេលមកលេងផ្ទះម្តាយដើរផឹកស៊ី ក្នុងភូមិស្រវឹងស្រាយកកាំបិតប៉័ងតោកាប់បុរសម្នាក់ កំពុងអង្គុយមើលទូរទស្សន៍បណ្តាលអោយរបួសធ្ងន់ កាលពីវេលាម៉ោង៧និង៣០នាទីយប់ថ្ងៃទី២៩ខែកញ្ញាឆ្នាំ២០១៤នៅក្រុមទី៣ភូមិកូនខ្លុងឃុំព្រៃតូចស្រុកម៉ោងឬស្សីខេត្តបាត់ដំបង។
លោក ឡាច ប្រុស នាយការិយាល័យប្រឆាំងបទល្មើសអាវុធហត្ថខេត្តបានអោយដឹង កាលរសៀលថ្ងៃទី០១ ខែតុលា ឆ្នាំ២០១៤ តាមទូរស័ព្ទថា ជនរងគ្រោះដែលត្រូវគេកាប់មានឈ្មោះឆូយប៊ុនរ៉ាភេទប្រុសអាយុ២៥ឆ្នាំនៅលីវ របួសដៃសងខាងក្បាលនិងក កំពង់សំរាកព្យាបាលនៅមន្ទីរពេទ្យ ។ ជនរងគ្រោះមានម្តាយឈ្មោះ នន ទូច អាយុ៤៩ឆ្នាំ និងឪពុកឈ្មោះ សុទ្ធ ឆូយ អាយុ៥០ឆ្នាំរបកសិករ មានទីលំនៅក្នុងភូមកើតហេតុ ។ ចំណែកជនសង្ស័យមានឈ្មោះ ឌី ស៊ីណា ភេទប្រុសអាយុ២៧ឆ្នាំ មានប្រពន្ធនិងកូនតូចម្នាក់រស់នៅភូមិជាមួយគ្នា ។
ប្រភពកន្លែងកើតហេតុប្រាប់សមត្ថកិច្ចថា មុនពេលកើតហេតុជនរងគ្រោះឈ្មោះ ឆូយ ប៊ុនរ៉ា បានទៅអង្គុយមើលទូរទស្សន៍នៅផ្ទះឈ្មោះឌីន (ម្តាយឈ្មោះរ៉ុម) ដូចសព្វដង ចំណែកជនដៃដល់ឈ្មោះ ឌី ស៊ីណា និងបក្ខពួកបានផឹកស៊ីនៅកន្លែងផ្សេងអស់ស្រាសចំនួន២លីត្រ ក្រោយមកឈ្មោះ ឌីន បានបបួលជនសង្ស័យទៅធ្វើម្ហូបនៅផ្ទះរបស់ខ្លួន ដើម្បីផឹកស៊ីបន្ត ។ ពេលជនសង្ស័យកំពង់កាប់មាន់ធ្វើម្ហូបមិនដឹងជាខឹងរឿងអ្វីបានយកកាំបិតប៉័ងតោទៅកាប់ជនរងគ្រោះជាច្រើនកាំបិតមិនប្រណីដៃហើយរត់គេចខ្លួនបាត់តែម្តង ។
ក្រោយពីកើតហេតុជនរងគ្រោះ ត្រូវបានអ្នកភូមិដឹកទៅធ្វើការសង្គ្រោះនៅមន្ទីរពេទ្យ ។
លោក ឡាច ប្រុស បានបញ្ជាក់ថា ជនសង្ស័យមិនស្នាក់នៅក្នុងភូមិខាងលើទេ គ្រាន់មកលេងផ្ទះម្តាយ ព្រោះជនសង្ស័យធ្លាប់កាប់អ្នកភូមិអោយរបួសប្រហែល ៣ ដង មកហើយ រួចរត់ទៅរស់នៅតាមតំបន់ព្រំដែនកម្ពុជាថៃ ។ ទោះជាយ៉ាងណា ខាងមន្ត្រីនគរបាលយុត្តិធម៌អនុវត្តន៍ច្បាប់នៅតែខិតខំស្វែងរកស្រាវជ្រាវចាប់ឃាត់ខ្លួនជនសង្ស័យយកមកផ្តន្ទាទោសទៅតាមផ្លូវច្បាប់ទាល់តែបាន ៕
