ខេត្តបន្ទាយមានជ័យ៖ អាវុធហត្ថបញ្ជូនជនសង្ស័យម្នាក់និងថ្នាំញៀនម៉ាទឹកកក ចំនួន០,៧៦ក្រាម ទៅសាលាដំបូងនៅព្រឹកថ្ងៃទី៣០ខែកញ្ញា ឆ្នាំ២០១៤ចាត់ការតាមនិតិវិធី។
ជនសង្ស័យម្នាក់អ ហក្រុងប៉ោយប៉ែតប្រតិបត្តិការណ៍ឃាត់ខ្លួន កាលវេលាម៉ោង ៤ និង ៣០ នាទីល្ងាច ថ្ងៃទី២៨ ខែកញ្ញា ឆ្នាំ២០១៤ ស្ថិតនៅត្រង់ភូមិក្បាលស្ពាន១ សង្កាត់-ក្រុងប៉ោយប៉ែត ខេត្តបន្ទាយមានជ័យ លោកឧត្តមសេនីយ៍ត្រី ឱ បូរិន មេបញ្ជាការអ ហ ខេត្តបានប្រាប់នៅថ្ងៃទី៣០ ខែកញ្ញា ឆ្នាំ២០១៤នេះថា ករណីបង្ក្រាបគ្រឿងញៀននេះ គឺក្រោមការដឹកនាំកម្លាំង ដោយលោកអនុសេនីយ៍ឯក ជា ដា មេបញ្ជាការមូលដ្ឋានអ ហក្រុងប៉ោយប៉ែត និងបានឃាត់ខ្លួនជនសង្ស័យកំពុងធ្វើសកម្មភាពចែកចាយគ្រឿងញៀន រួមទាំងបានដកហូតបានវត្ថុតាង ជាគ្រឿងញៀន ប្រភេទមេតំហ្វេតាមីន ទឹកកក ចំនួន០,៧៦ក្រាម គ្រឿងញៀនប្រភេទ ខេតាមីន ចំនួន១,៩៨ក្រាម ទូរស័ព្ទចំនួន១គ្រឿង ប្រាក់ខ្មែរចំនួន ២៥០០រៀល ប្រាក់ថៃ ចំនួន៥០បាត និងកាបូបពណ៌ខ្មៅចំនួន១ផងដែរ ។
លោកមេបញ្ជាការខេត្តបានបន្តថា ជនសង្ស័យត្រូវបានសមត្ថកិច្ចឃាត់ខ្លួន មានឈ្មោះ ពេជ្រ អាជី ភេទស្រី អាយុ២៨ឆ្នាំ មានលំនៅមិនពិតប្រាកដ ។ ក្រោយពីឃាត់ខ្លួន ជនសង្ស័យបានសារភាពថា ខ្លួនពិតជាបានធ្វើសកម្មភាពចែកចាយគ្រឿងញៀន នៅតាមតំបន់ជាយដែនកម្ពុជា ថៃពិតមែន ។
បច្ចុប្បន្នត្រូវបានសមត្ថកិច្ចអ ហជំនាញបានបញ្ជូនទៅកាន់បញ្ជាការដ្ឋានអ ហខេត្តបន្ទាយមានជ័យ សាងសំណំរឿងទៅកាន់តុលាការ ដើម្បីចាត់ការតាមនិតិវិធីច្បាប់ ៕
