បាត់ដំបង ៖ ពលករប្រុសស្រី ៥ នាក់នាំគ្នាបម្រុងឆ្លងដែនខុសច្បាប់ ទៅប្រទេសថៃ ត្រូវនគរបាលប៉ុស្តិ៍កូនភ្នំវរៈការពារព្រំដែនគោក ៨១ ៧ទប់ស្កាត់អប់រំអោយវិលត្រឡប់ទៅផ្ទះវិញ កាលពីវេលាម៉ោង១១និង៣០នាទីព្រឹក ថ្ងៃទី២៧ ខែកញ្ញា ឆ្នាំ២០១៤ ចំណុចតំបន់ខ្សែបន្ទាត់ព្រំដែនថៃកម្ពុជា ក្នុងភូមិកូនភ្នំ (៣២) ឃុំសាស្តាស្រុកសំពៅលូនខេត្តបាត់ដំបង ។
លោកជួនស៊ីនាយប៉ុស្តិ៍កូនភ្នំ (៣២) នគរបាលវរៈការពារព្រំដែនគោក៨១៧ បានអោយដឹងថា ប៉ុស្តិ៍កូនភ្នំជាយូរឆ្នាំមក ហើយមិនដែលមានពលករចំណាកស្រុកមកដល់ទេ តែនៅព្រឹកថ្ងៃសៅរ៍ ទី២៧ ខែកញ្ញា ឆ្នាំ២០១៤ កម្លាំងនគរបាលវរៈការពារព្រំដែនគោក ៨១៧ ប៉ុស្តិ៍កូនភ្នំ(៣២) ធ្វើការល្បាតប្រទះឃើញម៉ូតូឌុប ចំនួន ៣ គ្រឿង នាំមនុស្សប្រុសស្រី ៥ នាក់ក្នុងនោះស្រី ២ នាក ហើយពួកគេមានវ័យចាប់ពីអាយុ២៥ឆ្នាំ ដល់៣៥ឆ្នាំ មានទីលំនៅខេត្តព្រៃវែង ចូលមកតំបន់ខ្សែបន្ទាត់ព្រំដែន ច្រករបៀងកូនភ្នំបម្រុង ធ្វើដំណើរឆ្លងចូលប្រទេសថៃ ។ ពេលនោះ កម្លាំងនគរបាលយើងបានហៅមកសាកសួរ និងធ្វើការអប់រំអោយត្រឡប់ទៅផ្ទះវិញ និងអោយធ្វើសំណុំបែបបទតាមផ្លូវច្បាប់ មុននឹងឆ្លងដែនចូលទៅរកការងារធ្វើនៅប្រទេសថៃ ។
លោកនាយប៉ុស្តិ៍បានបញ្ជាក់ថា ដោយអង្គភាពជាប់រវល់ រៀបចំកម្មវិធីជប់លៀងខ្នាតតូច មិនបានយកឈ្មោះ របស់ពលករទាំង ៥ នាក់នោះឡើយ គ្រាន់តែអប់រំ ហើយអោយនាំគ្នាទៅរកការងារនៅក្នុងស្រុកវិញ កុំអោយចាញ់បោកមេខ្យល់ ៕
