(បន្ទាយមានជ័យ) ថ្ងៃអាទិត្យទី១៣ ខែកុម្ភ: ឆ្នាំ២០២២ លោក ឧត្តមេសេនីយ៍ត្រី ជឹម ប៊ុនអាន មេបញ្ជាការ អមដំណើរ ឯកឧត្តម អ៊ុ រាត្រី អភិបាលខេត្ត បន្ទាយមានជ័យ ឯកឧត្តម ខេង ស៊ុម ប្រធានក្រុមប្រឹក្សាខេត្ត បានអញ្ជើញចុះដឹកនាំ ប្រធានមន្ទីរ អង្គភាព មេបញ្ជាការកងកម្លាំងប្រដាប់អាវុធ ស្នងការនគរបាលខេត្ត កងរាជអាវុធហត្ថខេត្ត កងពលតូចថ្មើរជើងលេខ៥១ មន្ត្រីរាជការខេត្ត ក្រុង/ស្រុក យុវជនចុះដាំដើមឈើឡើងវិញនៅ តំបន់៣ នៃភូមិសាស្ត្រ ស្រុកមង្គលបូរី ខេត្តបន្ទាយមានជ័យ ដែលជាផ្ទៃដីជាប់បឹងទន្លេសាប ត្រូវកំណត់យកមកជាដីរដ្ឋវិញ ជាការចុះដាំដើមឈើឡើងវិញនេះ គឺត្រូវបានបិទបញ្ចប់ដោយជោគជ័យ បន្ទាប់ពីបានចុះវាស់វែងកំណត់បង្គោលព្រំដែនដីតំបន់៣ឡើងវិញ តាមបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីទប់ស្កាត់ និងស្តារឡើងវិញនូវធនធានធម្មជាតិ ក្នុងផ្ទៃបឹងទន្លេសាប កូនឈើដែលដុះចំរុះប្រមាន ជាង១៥០០ដើម មានដើមឬស្សី រាំងទឹក និងគ្រាប់ត្នោ ជាដើម ។
នៅក្នុងយុទ្ធនាការដាំកូនឈើឡើងវិញនេះ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានមានប្រសាសន៍ថា ការដាំកូនឈើឡើងវិញនៅថ្ងៃនេះ គឺដើម្បីបង្ហាញពីការចូលរួមទាំងអស់គ្នាក្នុងការចូលរួមទប់ស្កាត់ការកាប់ទន្ទ្រានខុសច្បាប់ដីតំបន់៣ ដីព្រៃលិចទឹកបឹងទន្លេសាប ហើយយើងមិនមែនដាំតែពេលនេះទេ គឺស្រុក២ ដែលរងការកាប់ទន្ទ្រានខុសច្បាប់ គឺព្រះនេត្រព្រះ ស្រុកមង្គលបូរី នឹងបន្តដាំបន្ថែមទៀត ទាំងក្រុមការងារខេត្តទទួលបន្ទុកស្រុក និងអាជ្ញាស្រុកសាមុី ត្រូវទទួលខុសត្រូវក្នុងការដាំ និងថែទាំបន្ត។
មហាជនទូទៅមានការគាំទ្រយ៉ាងពេញទំហឹង ចំពោះចំណាត់ការរបស់សម្ដេចអគ្គ មហាសេនា បតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា ក្នុងការ ដកហូតយកព្រៃលិចទឹកក្នុងតំបន់៣ ពី ជនខិលខូច ដែលទន្ទ្រានកាន់កាប់ ដោយ ខុសច្បាប់ ទុកជាសម្បត្តិរដ្ឋ ដើម្បីរក្សាជាជម្រកត្រីពងកូន បម្រើឱ្យសេចក្តីត្រូវការ របស់ប្រជាជនរាប់លាននាក់ នៅពេលបច្ចុប្បន្ន និងទៅអនាគត៕
