បាត់ដំបង ៖ នគរបាលស្រុកកំរៀង ល្បាតបង្ក្រាបបទល្មើសផ្សេងប្រទះ យុវជនម្នាក់កំពុងចាក់សោរទ្វារផ្ទះ ហៅមកសាកសួរ ឃើញថ្នាំញៀន១៥គ្រាប់ ឃាត់ខ្លួនតែម្តង កាលពីវេលាម៉ោង ៣ រសៀល ថ្ងៃទី២៥ ខែកញ្ញា ឆ្នាំ២០១៤ នៅចំណុចផ្សារចាស់ភូមិដូង ឃុំបឹងរាំង ស្រុកកំរៀង ។
លោក ស្រី វុឌ្ឍី អធិការរងស្រុកកំរៀងបានអោយដឹងថា យុវជនសង្ស័យដែលសមត្ថកិច្ចឃាត់ខ្លួន មានឈ្មោះ ប៉ិប សិទ្ធ អាយុ២១ឆ្នាំ មានស្រុកកំណើត ភូមិទ្រនប់បាក់ ខេត្តកំពង់ស្ពឺ គ្មានទីលំនៅពិតប្រាកដ ។ វត្ថុតាងដកហូតបាន មានថ្នាំញៀនប្រភេទយ៉ាម៉ាចំនួន ១៥ គ្រាប់ ។
យុវជនសង្ស័យបានសារភាពថា ថ្នាំញៀនដែលខ្លួនកំពុងតែកាន់ គឺទិញពីអ្នករត់ម៉ូតូឌុប មិនស្គាល់សាវតា ។
លោក ស្រី វុឌ្ឍី បានបញ្ជាក់ថា មុនឈានដល់ការឃាត់ខ្លួនជនសង្ស័យ សមត្ថកិច្ចល្បាតរកបង្ក្រាបបទល្មើសផ្សេង តែពេលក្រឡេកមើលឃើញជនសង្ស័យ កំពុងចាក់សោរផ្ទះ១កន្លែង មានចរឹកភ័យខ្លាច ក៏ហៅមកសាកសួរ ទើបធ្លាយរឿងគ្រឿងញៀនតែម្តង ។ បច្ចុប្បន្នយុវជនសង្ស័យ និងវត្ថុតាងថ្នាំញៀនចំនួន ១៥ គ្រាប់ ត្រូវកសាងសំណុំរឿង បញ្ជូនទៅស្នងការដ្ឋាននគរបាលខេត្ត នារសៀលថ្ងៃទី ២៦ ខែឆ្នាំដដែល ចាត់ការតាមផ្លូវច្បាប់ ៕
