ខេត្តកំពង់ធំ ៖ ជារៀងរាល់ខែ ក្រោយពីការប្រកាសឲ្យមានការចងសមព័ន្ឋមេត្រីភាពជាមួយក្រុមគ្រួសារអតីតយុទ្ឋជនដែលចាប់ឆ្នោតទទួលបានផ្ទះនិងដីសម្បទានសង្គមកិច្ច ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ។ អតីតយុទ្ធជនចំនួន ៨គ្រួសារ ដែលជាដៃគូសម្ព័ន្ធមេត្រីភាពជាមួយបញ្ជាការដ្ឋានតំបន់ប្រតិបត្តិការសឹករងកំពង់ធំ តែងទទួលបាននូវការឧបត្ថម្ភគាំទ្រផ្នែកជីវភាពរស់នៅជារៀងរាល់ខែពីថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ។
ជាក់ស្ដែងនៅព្រឹកថ្ងៃទី ០៧ខែកម្ភៈ ឆ្នាំ២០២២ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អមដំណើរដោយលោកវរសេនីយ៍ត្រី សាន់ រិន មេបញ្ជាការផ្នែកសឹករងកំពង់ស្វាយ និងសហការី បានអញ្ជើញទៅសំណេះសំណាលសាកសួរសុខទុក្ខក្រុមគ្រួសារអតីតយុទ្ធជនចំនួន ៨គ្រួសារដែលជាដៃគូសម្ព័ន្ធមេត្រីភាព កំពុងរស់នៅលើផ្ទះថ្មីនៃដីសម្បទានសង្គមកិច្ចស្ថិតនៅភូមិដងក្តា ឃុំក្រយា ស្រុកសន្ទុកខេត្តកំពង់ធំ ។
ឧត្តមសេនីយ៍ទោ សោម ស៊ុន បានបញ្ជាក់ថា នេះជាលើកទីប្រាំមួយហើយ ក្រោយពីការប្រកាសសមាសភាពបណ្តាអង្គភាព មន្ទីរសា្ថប័ននានានៅក្នុងខេត្តឲ្យមានសកម្មភាពគាំទ្រដល់ជីវភាំពរស់នៅរបស់បងប្អូនអតីតយុទ្ធជន ដែល កំពុង រស់នៅ កសាង ជីវភាព ថ្មី នៅ លេីដីសម្បទានសង្គមកិច្ច ដែលថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ នាំយកជំនួយឧបត្ថម្ភស្បៀងអាហារ និងគ្រឿងឧបភោគបរិភោគឧបត្ថម្ភជូនក្រុមគ្រួសារអតីតយុទ្ធជនជារៀងរាល់ខែ លើផែនការរយៈពេលមួយឆ្នាំ ដើម្បីបង្កលក្ខណៈងាយស្រួលឲ្យបងប្អូនរស់នៅកសាងជីវភាពថ្មីនៅលើដីសម្បទានសង្គមកិច្ចនៅទីនេះ ឲ្យ មានភាពល្អប្រសេីរឡេីង ។
ឧត្តមសេនីយ៍ទោ សោម ស៊ុន បានបញ្ជាក់បន្ថែមទៀតថា ស្បៀងអាហារ និងគ្រឿងឧបភោគបរិភោគ ដែលបានឧបត្ថម្ភជូនក្រុមគ្រួសារអតីតយុទ្ធជននៅពេលនេះ មានអង្ករចំនួន ២៥គីឡូក្រាម មីជាតិចំនួន ០១កេស ទឹកត្រីទឹកស៊ីអ៉ីវចំនួន ០២ យួរ ប៊ីចេង មួយ កញ្ចប់ និងត្រីខកំប៉ុងចំនួនមួយយួរផងដែរ។
ក្រុមគ្រួសារអតីតយុទ្ធជន សូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចអគ្គមហាសេនាបតីតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានជួយគាំទ្រឲ្យពួកគាត់បានមករស់នៅទីនេះ ដែលមានដីមួយហិចតាកន្លះនិងផ្ទះមួយខ្នង និងសូមអរគុណចំពោះថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងដែលតែងតែជួយឧបត្ថម្ភគាំទ្រក្នុងជីវភាពរស់នៅរបស់ពួកគាត់ជារៀងរាល់ខែ និងសូមគោរពគាំទ្រសម្ដេចតេជោបន្តដឹកនាំនាវាកម្ពុជាក្នុងសុខសន្តិភាពរហូត៕
