បាត់ដំបង៖ ស្ត្រីម្នាក់អ្នកជិះកង់ឆ្លងថ្នល់ចូលស្តាំផ្លូវ ត្រូវរថយន្តកាំម៉ារីបុកពីក្រោយ បណ្តាលឲ្យស្លាប់ កាលពីវេលាម៉ោង៥និង៤០នាទីព្រឹកថ្ងៃទី២៦ខែកញ្ញាឆ្នាំ២០១៤នៅតាមបណ្តោយផ្លូវជាតិលេខ៥ស្ថិតក្នុងក្រុមទី៤ភូមិថ្មីឃុំព្រៃតូចស្រុកមោងឬស្សី។
លោក ម៉ែនបូរី នាយផ្នែកចរាចរណ៍វាស់វែងបានឲ្យដឹងថាស្ត្រី អ្នកបើកបររថយន្តបង្កមានឈ្មោះ អ៊ីវ សុផានី អាយុ២៤ឆ្នាំ បុគ្គលិកបេឡាធនាគារប្រាសាក់ ប្រចាំស្រុកគាស់ក្រឡ មានទីលំនៅភូមិត្រស់ឃុំតាលាស់ស្រុកមោងឬស្សី ជិះរថយន្តកាមរីឆ្លាមពណ៌ស្ករពាក់ស្លាកលេខភ្នំពេញ2 i 6615។ចំណែកស្ត្រីរងគ្រោះដែលបានស្លាប់មានឈ្មោះតឹក លឹមអាយុ៥៧ឆ្នាំរស់នៅភូមិថ្មីឃុំព្រៃតូចស្រុកមោងឬស្សីនិងខូចខាតកង់១គ្រឿង។
តាមសម្តីអ្នកបានឃើញហេតុការណ៍បានប្រាប់សមត្ថកិច្ចថា នៅម៉ោងជិត៦ព្រឹកថ្ងៃទី២៦ខែកញ្ញាឆ្នាំ២០១៤មានស្ត្រីចំណាស់ម្នាក់ជិះកង់ចេញពីផ្ទះ ពេលមកដល់ចំណុចកើតហេតុក៏បានឆ្លងថ្នល់ជាតិមិនបានមើលក្រោយ ឆ្លងផុតចូលចំណែកខាងស្តាំរថយន្ត ស្របពេលនោះ មានរថយន្តកាមរីមួយគ្រឿងបើកបរយ៉ាងលឿន មកពីទិសខាងកើត ឆ្ពោះទៅទិសលិច ហើយបានបុកអ្នកជិះកង់មួយទំហឹង ប៉ើងមនុស្ស ធ្លាយកញ្ចក់រថយន្តខាងមុខ ចូលទៅក្នុងរថយន្ត ជិតអ្នកបើករថយន្ត បណ្តាលឲ្យស្លាប់ភ្លាមៗតែម្តង ។
រថយន្តនិងបើកបរត្រូវបានប្រជាពលរដ្ឋ និងសមត្ថកិច្ចឃាត់បានភ្លាមៗនាំទៅអធិការស្រុកសាកសួរ ។ ចំណែកសាកសពជនរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី។
លោក ម៉ែន បូរី បានបញ្ជាក់ថា ចំពោះមធ្យោបាយទាំងពីរគ្រឿង និងអ្នកបើកបររថយន្តបង្កត្រូវបាននគរបាលចរាចរណ៍ខេត្ត អូសយកមករក្សាទុកនៅការិយាល័យចរាចរណ៍ផ្លូវគោកខេត្ត ដើម្បីចាត់ការតាមច្បាប់ ។ កំហុសអ្នកជិះកង់ តែខាងរថយន្តមិនមានឯកសារគ្រប់គ្រាន់ ៕
