ខេត្តឧត្តរមានជ័យ ៖ បុរសម្នាក់ស្រវឹងស្រា បើករថយន្តកាំម៉ារីបើករ៉េ បោកត្រូវម៉ូតូបញ្ច្រាស់ទិសគ្នា បណ្តាលអោយយុវជន ៣ នាក់ របួសធ្ងន់ ពេលបើករថយន្ត ដល់ផ្ទះ ទុករថយន្តចោល គេចខ្លួនបាត់ កាលពីវេលាម៉ោង ៣ និង ៤៥ នាទី ល្ងាចថ្ងៃទី ២៣ ខែកញ្ញា ឆ្នាំ២០១៤ នៅចំណុចផ្លូវកោង តាមផ្លូវយុត្តសាស្ត្រ ស្ថិតក្នុងភូមិគោកឈូក សង្កាត់កូនក្រៀល ក្រុងសំរោង ខេត្តឧត្តរមានជ័យ ។
លោក ម៉ៅ សំណាង មេប៉ុស្តិសង្កាត់កូនក្រៀលបានអោយដឹងថាជនរងគ្រោះ មានគ្នា ៣ នាក់មានទី ១. ឈ្មោះ លីវ ម៉ាត់វត្តនា ភេទប្រុស អាយុ ១១ ឆ្នាំដាច់ជើងខាងឆ្វេង។
២. ឈ្មោះ រាំង ងួន ភេទប្រុស អាយុ ១៦ ឆ្នាំ បាក់ជើងខាងឆ្វេង ។ ៣.ឈ្មោះ ពេជ្យ វណ្ណា ភេទប្រុស អាយុ១៦ឆ្នាំ បាក់ដៃខាងស្តាំ រស់នៅភូមិពល ឃុំសំរោង ក្រុងសំរោង ខេត្តឧត្តរមានជ័យជាមួយគ្នា ។ អ្នកទាំង ៣ នាក់ ជិះម៉ូតូ ១ គ្រឿង ម៉ាកឌ្រីម ២០១២ ពាក់ស្លាកលេខ ( ឧត្តរមានជ័យ 1 A. 9193) បានធ្វើដំណើរពីកើតទៅលិច ។ ចំណែករថយន្ត បង្ករម៉ាកកាម៉ារី ៩៣ ពណ៌ឈាមជ្រូក ពាក់ស្លាកលេខ ( ភ្នំពេញ 2B. 2977) បើកមកពីលិចទៅកើត ។
តាមប្រភពឲ្យដឹងថា មុនពេលកើតហេតុរថយន្តកាំម៉ារីបើកល្បឿន មិនខ្វះពី១០០នោះទេ ធ្វើដំណើរពីលិចទៅកើតដល់កន្លែងផ្លូវកែង ក៏បានរេចង្កូត ទៅរកម៉ូតូជនរងគ្រោះតែម្តង តែក្បាលរថយន្តគេចផុតបានបោកកន្ទុយបណ្តាលឲ្យត្រូវម៉ូតូ អោយដួលបង្កអោយយុវជន ៣ នាក់រងរបួសតែម្តង ។
ប្រភពបញ្ជាក់ថា ពេលកើតហេតុភ្លាមនោះ ភាគីខាងរថយន្តបានបើករត់គេចយ៉ាងលឿន តែភ្លាមៗនោះ កងកម្លាំងសមត្ថកិច្ច និងប្រជាពលរដ្ឋ តាមឃើញរថយន្តបើកចូលទៅផ្ទះហើយម្ចាស់គេចខ្លួនបាត់ ។
លោក ម៉ៅ សំណាង មេប៉ុស្តិសង្កាត់កូនក្រៀលតាមដល់ កន្លែងកើតបានឃើញរថយន្ត ដែលបង្កនៅនិងផ្ទះ តែអ្នកបើកបររត់គេចខ្លួនបាត់ បាននាំកម្លាំងយកទៅ ស្នងការដ្ឋាននគរបាលខេត្តទុក ដើម្បីអោយម្ចាស់រថយន្តចូលខ្លួនដោះស្រាយ ទៅតាមផ្លូវច្បាប់ ៕
