នៅព្រឹកថ្ងៃអង្គារ ទី០១ ខែកុម្ភ: ឆ្នាំ២០២២ នៅទីបញ្ជាការ តំបន់ប្រតិបត្តិការសឹករងឧត្តរមានជ័យ បានប្រារព្ធពីធីបំពាក់ឋានន្តរស័ក្តិជូននាយទាហាន នាយទាហានរងចំនួន ៧១រូប ដែលទើបទទួលបានសេចក្តីសម្រេចដំឡើងឋានន្តរស័ក្តិថ្មីពីថ្នាក់លើ ក្នុងនោះថ្នាក់អនុសេនីយ៍ឯក ចំនួន៤រូប, អនុសេនីយ៍ទោ ចំនួន ០៩រូប, អនុសេនីយ៍ត្រី ចំនួន ១៤រូប និងថ្នាក់នាយចំណង់ ចំនួន ៤៤រូប ក្រោមអធិបតីភាព ឧត្តមសេនីយ៍ទោ អេង ហឿង មេបញ្ជាការរងយោធភូមិភាគទី៤ មេបញ្ជាការប្រចាំទិសទី៣ សំរោង ឧត្តរមានជ័យ។
ក្នុងឪកាសនោះដែរ ឧត្តមសេនីយ៍ទោ អេង ហឿង បានលើកឡើងថា ថ្នាក់ដឹកនាំកងទ័ពជើងគោក ជាពិសេស ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ជានិច្ចជាកាល ឯកឧត្តម តែងតែគិតគូរអំពីសុខទុក្ខសុខមាលភាព ក៏ដូចជាការរៀបចំកែសម្រួលរចនាសម្ព័ន្ធចាត់តាំងតួនាទីភារកិច្ច និងដំឡើងឋានន្តរស័ក្តិ ជូនយោធិនក្នុងកងយោធពលខេមរភូមិន្ទ ដើម្បីឱ្យសមស្របតាមក្របខ័ណ្ឌចាត់តាំង និងសមត្ថភាពដឹកនាំរបស់បងប្អូនយោធិនយើងម្នាក់ៗ ក្នុងកងយោធពលខេមរភូមិន្ទ។ ឯកឧត្តម ក៏បានកោតសរសើរចំពោះនាយទាហាន នាយទាហានរង ទាំងអស់ដែលបានបំពេញភារកិច្ចបានយ៉ាងល្អ ក្នុងរយៈពេលមួយឆ្នាំនេះ និងបានចូលរួមចំណែកយ៉ាងធំធេងក្នុងការទប់ស្កាត់នូវជំងឺកូវីដ-១៩ផងដែរ។
លោកមេបញ្ជាការ បានបំពាក់ឋានន្តរស័ក្កិ និងប្រគល់សេចក្តីសម្រេចតែងតាំងផ្លាស់ប្ដូរមុខងារយោធិន ចំនួន ៧១រូប និងបានផ្ដាំផ្ញើសូមឱ្យបងប្អូនយោធិនយើងទាំងអស់ដែលទើបទទួលបានការតម្លើងឋានន្តរស័ក្កិថ្មី សូមឲ្យយកស្មារតីទទួលខុសត្រូវខ្ពស់បំពេញតួនាទីភារកិច្ចឱ្យបានជោគជ័យតាមការប្រគល់ជូនរបស់ថ្នាក់លើ និងបន្តអនុវត្តនូវវិធានការ ៣កុំ ៣ការពារ របស់រាជរដ្ឋាភិបាល ប្រុងប្រយ័ត្នអោយបានខ្ពស់នូវជំងឺកូវីដ-១៩ ថ្មីអូមីក្រុងផងដែរ៕
