ខេត្តប៉ៃលិន ៖ ជិតចូលឆ្នាំចិនផង បុរសមិនស្គាល់មុខម្នាក់បានទូរស័ព្ទទាក់ទង ហៅភ្នាក់ងារក្រុមហ៊ុន J&T ឲ្យទៅយកឥវ៉ាន់ (ជាប្រអប់ហាមបើកមើល) កាលម៉ោង៦និង២០នាទី យប់ថ្ងៃទី២៥ ខែមករា ឆ្នាំ២០២២ នៅចំណុចតារាងបាល់ខាងកើតរូបសំណាកលោកយាយយ៉ាត ស្ថិតក្នុងភូមិអូរតាប្រាង សង្កាត់ប៉ៃលិន ក្រុងប៉ៃលិន ខេត្តបប៉ៃលិន ដើម្បីផ្ញើទៅមនុស្សម្នាក់ទៀតរស់នៅខេត្តបាត់ដំបង ។ ដោយកើតការសង្ស័យ ខាងក្រុមហ៊ុនក៏បើកមើល ស្រាប់តែប្រទះឃើញគ្រាប់បែកកែច្នៃ១គ្រាប់នៅខាងក្នុងប្រអប់នោះ ករណីនេះបង្កឲ្យមានការភ្ញាក់ផ្អើលជាខ្លាំង ។
ប្រភពភ្នាក់ងារក្រុមហ៊ុនJ&Tបានឲ្យដឹងថា នៅវេលាម៉ោង៦និង២០នាទី យប់ថ្ងៃទី២៥ ខែមករា ឆ្នាំ២០២២ បន្ទាប់ពីមានជនមិនស្គាល់អត្តសញ្ញាណបានទូរស័ព្ទមកក្រុមហ៊ុន J&T តាមរយៈទូរស័ព្ទលេខ០១១២១៧០៤៤ ហើយប្រាប់ថា ឱ្យទៅយកអីវ៉ាន់នៅចំណុចតារាងបាល់ខាងកើតរូបសំណាកលោកយាយយ៉ាត ស្ថិតក្នុងភូមិអូរតាប្រាងសង្កាត់ប៉ៃលិន ក្រុងប៉ៃលិន ខេត្តប៉ៃលិន ។ លុះដល់ម៉ោង៦និង៥៤នាទីយប់ បុគ្គលិកក្រុមហ៊ុនបានទៅយកអីវ៉ាន់ពីជនមិនស្គាល់អត្តសញ្ញាណនៅចំណុចខាងលើ ហើយជននោះបានប្រាប់ទៅខាងក្រុមហ៊ុនមិនឱ្យបើកមើលអីវ៉ាន់នោះទេ ។ លុះក្រោយពេលយកមកដល់ក្រុមហ៊ុន ខាងក្រុមហ៊ុនកើតក្តី្តសង្ស័យ ព្រោះមានការវិចខ្ចប់មិនត្រឹមត្រូវក៏បានបើកមើលស្រាប់តែមានអណ្តាតភ្លើងឆេះឡើង ។ ប៉ុន្តែត្រូវបានបុគ្គលិកយកទឹកចាក់ពន្លត់ទាន់ពេលវេលា។
ប្រភពដដែលបានបញ្ជាក់ឲ្យដឹងទៀតថា អីវ៉ាន់នេះគឺមានគោលដៅផ្ញើទៅសង្កាត់ចំការសំរោង ក្រុងបាត់ដំបង ខេត្តបាត់ដំបង ដោយមានអ្នកទទួលកាន់ទូរស័ព្ទលេខ០៨៦២២៤៤៤០/០១២៥០៥៧១៦។
ក្រោយកើតហេតុភ្លាម ក៏រាយការណ៍ដល់សមត្ថកិច្ចនិងមន្ត្រីជំនាញរបស់អង្គការCMACបានចុះទៅធ្វើការត្រួតពិនិត្យនិងបានបញ្ជាក់ថាអីវ៉ាន់នេះជាប្រភេទគ្រាប់បែកកែច្នៃដដែលមានកម្លាំងផ្ទុះ
ស្មើនឹងកម្លាំងផ្ទុះរបស់មីនតោនចំនួនមួយគ្រាប់ រួចក៏យកទៅរក្សាទុករង់ចាំកម្ទេចចោលជាក្រោយ ។ បច្ចុប្បន្នសមត្ថកិច្ចកំពុងធ្វើការស្រាវជ្រាវដើម្បីចាប់ជនសង្ស័យយកមកផ្តន្ទាទោសតាមផ្លូវច្បាប់៕
ក្នុងករណីដែរសមត្ថកិច្ចកំពុងធ្វើការស៊ីបអង្កេតស្រាវជ្រាវចាប់ខ្លួនជនពាក់ព័ន្ធដើម្បីចាប់ខ្លួនមកផ្តន្ទាទោសតាមច្បាប់៕
