ខេត្តស្ទឹងត្រែង ៖ ប្រភពពីមន្ត្រីអាជ្ញាធរមូលដ្ឋាន និងសមត្ថកិច្ចក្នុងស្រុកសេសាន បានឲ្យដឹងថា មេឈ្មួញ ម៉ឹក សុផាន់ណារ៉េត ហៅ ឧកញ៉ាជ័យ នៅតែបន្តសកម្មភាពកាប់ឈើនៅខាងក្រៅតំបន់បាតអាងទំនប់វារីអគ្គិសនីសេសានក្រោម ២ ចូលទៅទីតាំងបាតអាង ដើម្បីអារច្រៀកហើយដឹកជញ្ជូនចេញវិញយ៉ាងរលូន ។ មួយរយៈចុងក្រោយនេះ ឧកញ៉ាជ័យបង្កើនសកម្មភាពដឹកជញ្ជូនឈើចេញពីស្រុកសេសាន ខេត្តស្ទឹងត្រែង ចេញទៅប្រទេសវៀតណាម តាមច្រកព្រំដែនក្នុងស្រុកស្នួលខេត្តក្រចេះ ដោយគ្មានសមត្ថកិច្ចណាហ៊ានប៉ះពាល់ឡើយ។
ប្រភពពីសកម្មជនព្រៃឈើនិងមន្ត្រីអង្គការក្រៅរដ្ឋាភិបាលក្នុងខេត្តស្ទឹងត្រែងបានឲ្យដឹងថា បច្ចុប្បន្ន ព្រៃឈើដែលនៅសេសសល់ខាងក្រៅបាតអាងទំនប់វារីអគ្គិសនីសេសានក្រោម២ស្រុកសេសានខេត្តស្ទឹងត្រែងកំពុងរងការបំផ្លាញយ៉ាងពេញបន្ទុក។
ប្រភពពីសមត្ថកិច្ចពាក់ព័ន្ធបានឲ្យដឹងថា រយៈពេលជាងកន្លះខែមកហើយ ដែលឧកញ៉ាជ័យសម្រុកដឹកជញ្ជូនឈើចេញពីតំបន់បាតអាងទំនប់វារីអគ្គិសនីសេសានក្រោម២តាមរថយន្តសាំយ៉ុងក្នុងមួយយប់ៗពី១០ទៅ១៥គ្រឿង ។
មន្ត្រីអាជ្ញាធរមូលដ្ឋានក្នុងស្រុកសេសានបានឲ្យដឹងថា បើទោះបីនៅតំបន់បាតអាងទំនប់វារីអគ្គិសនីសេសានក្រោម២គ្មាននៅសល់ឈើសម្រាប់កាប់ធ្វើអាជីវកម្មតទៅទៀតក៏ដោយក៏ឧកញ៉ាជ័យនៅតែមានឈើដឹកជញ្ជូនចេញយ៉ាងពេញបន្ទុកដដែល ។ សកម្មជនព្រៃឈើក្នុងខេត្តស្ទឹងត្រែងបានឲ្យដឹងថា ឈើទាំងនោះ ត្រូវបានគេបំពានកាប់ក្នុងតំបន់ព្រៃការពារព្រៃអភិរក្សនៅស្រុកសេសាននិងស្រុកសៀមប៉ាងហើយដឹកជញ្ជូនចូលទីតាំងបាតអាងទំនប់វារីអគ្គិសនីសេសានក្រោម២ដើម្បីឲ្យក្លាយជាឈើស្របច្បាប់។ក្រោយពេលអារច្រៀករួចទើបឧកញ៉ាជ័យធ្វើសកម្មភាពដឹកជញ្ជូនចេញទៅស្រុកយួនយ៉ាងរលូនដោយមានការឃុបឃិតបើកដៃពីសំណាក់មន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធច្រើនស្ថាប័នដែលគិតតែរឿងប្រមូលលុយចែកគ្នាធ្វើមានធ្វើបាន។
ប្រជាពលរដ្ឋក្នុងស្រុកសេសានខេត្តស្ទឹងត្រែងបានរិះគន់ថា លោកអភិបាលខេត្តស្ទឹងត្រែងនិងប្រធានមន្ទីរបរិស្ថានខេត្តស្ទឹងត្រែងនិងរដ្ឋបាលព្រៃឈើមិនចាត់វិធានការទប់ស្កាត់បទល្មើសបំផ្លាញព្រៃឈើដែលកំពុងកើតឡើងយ៉ាងរាលដាលនៅស្រុកសេសាននិងស្រុកសៀមប៉ាងនោះទេ ។ ជាក់ស្ដែង រយៈពេលជាងកន្លះខែកន្លងទៅនេះ ឈ្មួញសម្រុកកាប់ឈើនិងដឹកជញ្ជូនឈើចេញពីតំបន់បាតអាងទំនប់វារីអគ្គិសនីសេសានក្រោម២ដោយគ្មានញញើតអ្វីទាំងអស់ហើយព្រៃអភិរក្សព្រៃការពារក្នុងស្រុកសេសាននិងស្រុកសៀមប៉ាងចៀសមិនផុតពីសេចក្ដីវិនាសសាបសូន្យឡើយ ។
ប្រជាពលរដ្ឋនិងមន្ត្រីអង្គការក្រៅរដ្ឋាភិបាលបានអំពាវនាវឲ្យលោក សាយ សំអាល់ រដ្ឋមន្ត្រីក្រសួងបរិស្ថានចាត់វិធានការទប់ស្កាត់បទល្មើសបំផ្លាញព្រៃឈើក្នុងស្រុកសេសាននិងស្រុកសៀមប៉ាងជាបន្ទាន់ព្រោះព្រៃអភិរក្សព្រៃសហគមន៍និងព្រៃការពារក្នុងស្រុកទាំង២នេះកំពុងរងការបំផ្លាញយ៉ាងរាលដាល ។
