ខេត្តបាត់ដំបង ៖ សហគមន៍និងជលផលកោះជីវាំងបិតភ្នែក បើកដៃឲ្យលោកផេ មេកញ្ច្រែងប្រព្រឹត្តនេសាទ បរ៉ាវ បិតទំនាប និងអូរ បិតព្រែក ខុសច្បាប់ បានដាក់យ៉ាងច្រើនកន្លែងក្នុងតំបន់អភិរក្សឡូ៣ កោះប៉ាល់ ទ្រនុំជ្រឹង រហាល ឃុំកោះជីវាំង ស្រុកឯកភ្នំ ខេត្តបាត់ដំបង ប្រព្រឹត្តយ៉ាងរលូនមិនហ៊ានបង្ក្រាបឡើយ។
ប្រភពពីប្រជាពលរដ្ឋបានឲ្យដឹងថាពេលពួកគាត់ទៅដាក់មង រាយសន្ទូច លាន់ ឡើ នៅចំណុចកោះប៉ាល់ ទ្រនុំជ្រឹង ត្រូវបានលោកផេ ស្តីបន្ទោសនិងគំរាមហៅគេចាប់ ។លោកផេមិនឲ្យប្រជាពលរដ្ឋធ្វើនេសាទដាក់ មង សន្ទូច ឡើ លាន់ ក្បែរកន្លែងគាត់ដាក់បរ៉ាវឡើយ។ចំពោះអ្នកដាក់បរ៉ាវជាកូនកញ្ច្រែងឬអ្នកពឹងពាក់ឲ្យលោកផេ រត់ការបង់ជូនស្ថាប័នផ្សេងៗក៏លើកឡើងថាលោកផេ ធ្វើអ្នកបោះមប្រមូលុយក្នុងការប្រព្រឹត្តនេសាទខុសច្បាប់ដើម្បីដោះស្រាយជូនស្ថាប័មសមត្ថកិច្ច ប្រមូលពីអ្នករ៉ាវស៊ីលើក្រោម មិនតែប៉ុណ្ណោះអ្នកដាក់បរ៉ាវពីខាងក្រោមគាត់ គឺដាក់មិនបានត្រីឡើយ ដោយលោកផេ ដាក់បរ៉ាវបិតទំនាបអូរ បិតព្រែកមិនឲ្យត្រីធ្លាក់ឆ្លងចុះដល់កន្លែងពួកគាត់នេសាទឡើយ។
លោក ផេ គាត់អ៊ុងអាត់ខ្លាំងដោយអាងមានបងប្អូនធ្វើការនៅសហគមន៍ ជាមួយជលផលសង្កាត់កោះជីវាំង និងត្រូវជាក្មួយរបស់មេភូមិកំពុងប្រហុកផង។អ្នកខ្លះថាលោកផេមានខ្នងបង្អែកធំជាងនឹងទៀតគឺជលផល៥ខេត្ត។
ប្រជាពលរដ្ឋបញ្ជាក់ថាចំណុចកោះប៉ាល់ ទ្រនុំជ្រឹងជាតំបន់អភិរក្ស ឋិតក្រោមការគ្រប់គ្រងរបស់សហគមន៍ភូមិថ្វាងនិងសហគមន៍ភូមិកំពុងប្រហុកនិងក្រោមការគ្រប់របស់សង្កាត់ជលផលកោះជីវាំង ដូច្នេះហេតុអ្វីមិនទុកឲ្យប្រជាពលរដ្ឋរកស៊ីត្រឹមត្រូវ បែរជាទុកឲ្យលោកផេ រកស៊ីនេសាទខុសច្បាប់មិនបង្ក្រាប ទុកឲ្យលោកផេធ្វើព្យុះភ្លៀងបែបនេះឬក៏ត្រូវថ្នាំសន្តំលោកផេហើយ។
ចំណែកលោកផេ បានអះអាងថាគាត់រកស៊ីត្រឹមត្រូវមិនមានសមត្ថកិច្ចណាហ៊ានមកបង្ក្រាបកាប់បរ៉ាវលោកឡើយ។
ពាក់ព័ន្ធករណីនេះនៅព្រឹកថ្ងៃទី១៨ ខែមករាឆ្នាំ២០២២ លោកឆាយ សំអុល នាយសង្កាត់រដ្ឋបាលជលផលសង្កាត់កោះជីវាំងបានបញ្ជាក់ថាលោកនឹងចូលបង្ក្រាបទីតាំងបរ៉ាវខុសច្បាប់នៅចំណុចទ្រនុំជ្រឹង រហាល ឡូ៣នោះឆាប់ៗ ដើម្បីឲ្យប្រជាពលរដ្ឋប្រកបនេសាទស្របច្បាប់ដាក់មងសន្ទូចវិញ ហើយនៅថ្ងៃនេះកំពុងជាប់រវល់បង្ក្រាបនៅតំបន់ឡូ២៕
