បាត់ដំបង ៖ កម្លាំងនគរបាលស្រុកភ្នំព្រឹកបញ្ជូនខ្លួនយោធាថៃ៣នាក់ នាំចូលរូបិយបណ្ណដុល្លារក្លែងក្លាយចំនួន៣កេះជាង៧លានដុល្លាទៅស្នងការដ្ឋានខេត្តព្រឹកថ្ងៃ២១ ខែកញ្ញា ឆ្នាំ២០១៤ចាត់ការតាមផ្លូវច្បាប់។
ជនសង្ស័យ ជនជាតិថៃ៣នាក់ត្រូវកម្លាំងនគរបាលស្នងការដ្ឋានខេត្តសហការសមត្ថកិច្ចស្រុកភ្នំព្រឹកធ្វើការឃាត់ខ្លួនពេលបើករថយន្តដឹកប្រាក់ចូលមកទឹកដីកម្ពុជានៅ ម៉ោង១១ព្រឹកថ្ងៃ១៩ ខែកញ្ញា ឆ្នាំ២០១៤ នៅមុខសៃឡូ(ស្តង់ពោតឬដំឡូងមី)ឈ្មោះ ហួត អួន ស្ថិតក្នុងភូមិ-ឃុំអូររំដួល ស្រុកភ្នំព្រឹក ។
លោក ជេត វណ្ណនី ស្នងការរងកណ្តាលយុត្តិធម៌បានអោយដឹងថា មុនពេលឃាត់ខ្លួនជនសង្ស័យជនជាតិថៃ៣នាក់ខាងលើ សមត្ថកិច្ចបានចុះស៊ើបអង្កេត និងតាមដានស៊ើបកម្លាំងសម្ងាត់បានរាយការណ៍មកថា មានករណីដឹកជញ្ជូនរូបិយបណ្ណអន្ដរជាតិ(ដុល្លារ ក្លែងក្លាយ)ពីប្រទេសថៃចូលប្រទេសកម្ពុជា ត្រង់ចំណុចភូមិ-ឃុំអូររំដួល ស្រុកភ្នំព្រឹក ទើបកម្លាំងនគរបាល ស្រុកសហការជាមួយកម្លាំងស្នងការដ្ឋាននគរបាលខេត្ដឈានដល់ការ ឃាត់ខ្លួនជនសង្ស័យជនជាតិថៃទាំង៣ រួមជាមួយនឹងប្រាក់ដុល្លារក្លែងក្លាយប្រភេទក្រដាស១០០ដុំ ស្មើ៧.១៦០.០០០ដុល្លារ ។
សមត្ថកិច្ចបានបញ្ជាក់ថា ជនសង្ស័យទាំង៣នាក់រួមមាន ១-ឈ្មោះ កីតថាណេត មេធីកេតសុវត្ថិ(ហៅជ័រ) ភេទប្រុស អយុ៤៧ឆ្នាំ រស់នៅទីក្រុងបាងកក ប្រទេសថៃ មុខរបរជាអាជីវករ, ២-ឈ្មោះ ឡាយស៊ីលិ ប្រា ម៉ូដ ភេទប្រុស អយុ៤៨ឆ្នាំ ជាយោធា រស់នៅសាប់តាហ៊ីត ខេត្ដច័ន្ទបួរី និង៣-ឈ្មោះ ផង់សាតចំលាត់( សំរ៉ាត់ វង្សា ) ភេទ ប្រុស អាយុ៥២ឆ្នាំ មេបញ្ជាការ កងអនុសេនាធំ៥២២ថៃយោធា រស់នៅស្រុកសយដាវ ខេត្ដច័ន្ទបូរី ។ហើយវត្ថុតាង ដែលដកហូតបានមានប្រាក់ដុល្លារក្លែងក្លាយ៣កេសស្មើ៧លាន១សែន៦ ម៉ឺនដុល្លារ ។
បច្ចុប្បន្នជនសង្ស័យទាំង៣នាក់ រួមជាមួយវត្ថុតាងជាប្រាក់ដុល្លារក្លែងក្លាយចំនួន៧.១៦០.០០០ដុល្លារ និង រថយន្ដវីហ្គោ ពណ៌ខ្មៅ ពាក់ស្លាកលេខ ក ត ៧៨២ ច័ន្ទបូរី ចង្កូតស្ដាំ ត្រូវបាននគរបាលស្រុកភ្នំព្រឹក បញ្ជូនខ្លួន ទៅកាន់ស្នងការដ្ឋាននគរបាលខេត្ដ ដើម្បីកសាងសំណុំរឿងបញ្ជូនទៅកាន់សាលាដំបូងខេត្ដចាត់កាតាម នីតិវិធី ៕
