ប៉ៃលិន ៖ អភិបាលខេត្តប៉ៃលិន លោកជំទាវ បាន ស្រីមុំ បានបង្ហោះសារអបអរសាទរលើបណ្តាញ សង្គមនូវ លទ្ធផលប្រឡងសញ្ញាប័ត្រមធ្យមសិក្សាទុតិយភូមិ(បាក់ឌុប)ឆ្នាំសិក្សា២០២០-២០២១ នាព្រឹកថ្ងៃទី១៥ ខែមករា ឆ្នាំ២០២២នេះ។
លោកជំទាវ បាន ស្រីមុំ បានលើកឡើងថា ក្នុងនាមថ្នាក់ដឹកនាំខេត្តពិតជាមានមោទនភាពចំពោះកូន ៗសិស្សានុសិស្ស ដែលជាកូនចៅរបស់អ្នកខេត្តប៉ៃលិន ដែលធ្វើបានល្អក្នុងការប្រឡងរហូតទទួលបាននិទ្ទេសA ៦នាក់។ ទន្ទឹមនិងការខិតខំសិក្សារៀនសូត្ររហូតទទួលបាននិទ្ទេសAនេះដែរនិងដូចអ្វីដែលបានសន្យានៅថ្ងៃបើកកញ្ចប់វិញ្ញាសាប្រឡងកាលពីថ្ងៃទី២៧ ខែធ្នូ ឆ្នាំ២០២១ រដ្ឋបាលខេត្តគឺបានត្រៀមរួចហើយនូវម៉ូតូ និងរង្វាន់ផ្សេងៗទៀត សម្រាប់ផ្តល់ឱ្យអ្នកជ័យលាភីខាងលើ។
ទោះជាយ៉ាងណា លោកជំទាវ អភិបាលខេត្តប៉ៃលិនបានចូលរួមអបអរសាទរជាមួយនឹងកូនៗ ក្មួយៗដែលបានប្រឡងជាប់សញ្ញាប័ត្រមធ្យមសិក្សាទុតិយភូមិ នាសម័យប្រឡង ២៧ ធ្នូ ២០២១ ជាពិសេស ក៏សូមកោតសរសើរដល់ក្មួយៗ ដែលបានខិតខំប្រឹងប្រែងរៀនសូត្ររហូតប្រឡងជាប់និទ្ទេស A ជាច្រើននាក់ បើទោះស្ថិតក្នុងដំណាក់កាលដ៏លំបាកនៃការរីករាលដាលជំងឺ Covid-19 ក៏ដោយ ។ ជាមួយនោះក៏សូមអរគុណចំពោះមាតាបិតា អាណាព្យាបាលសិស្ស ដែលបានផ្ដល់ឱកាសឱ្យកូនៗ ក្មួយៗ បានរៀនសូត្រពេញលេញ រហូតទទួលបាននូវកិត្តិយស គឺជ័យលាភីល្អសម្រាប់ខ្លួនគេ សម្រាប់គ្រួសារ សម្រាប់សាលារៀន និងសម្រាប់ខេត្តប៉ៃលិនរបស់យើង តាមរយៈនេះសូមលោកគ្រូ អ្នកគ្រូ អាណាព្យាបាលសិស្សានុសិស្ស ជាពិសេសក្មួយៗ ត្រូវបន្តខិតខំប្រឹងប្រែងរៀនសូត្រ ដើម្បីយកចំណេះវិជ្ជា មកចូលរួមអភិវឌ្ឍន៍គ្រួសារ សហគមន៍ និងសង្គមជាតិទាំងមូល ។
យោងតាមស្ថិតិលោកតង់ ធារ៉ា ប្រធានមន្ទីរអប់រំ យុវជន និងកីឡាខេត្តប៉ៃលិន បានឲ្យដឹងថា សម្រាប់ការប្រឡងសញ្ញាបត្រ័ទុតិយភូមិនៅក្នុងឆ្នាំ២០២១នេះ គឺមានបេក្ខជនប្រឡងទូទាំងខេត្តប៉ៃលិន សរុបចំនួន៤៩៥នាក់ស្រី ២៧០នាក់ មណ្ឌលប្រឡងមានចំនួន០២មណ្ឌល និងមាន២១បន្ទប់ ។ជាលទ្ធផលបេក្ខជនប្រឡងជាប់មានចំនួន ៣២៥នាក់ ស្មើនឹង ៦៧,៧០% ក្នុងនោះមាននិទ្ទេស A ៦នាក់, និទ្ទេស B ៦នាក់, និទ្ទេស C ៣៥នាក់, និទ្ទេស D ១២០នាក់ និងនិទ្ទេស E ១០៥នាក់។
