ខេត្តពោធិ៍សាត់ ៖ ពហុកីឡដ្ឋានថ្មី ស្រុកភ្នំក្រវាញ ត្រូវបានសម្ពោធជាផ្លូវការនិង
ប្រកាសលទ្ធផល នៃការប្រគួតពានរង្វាន់អបអរសាទរទិវាជ័យជំនះ ៧ មករា ខួបលើកទី៤៣ ជូនដល់កីឡាករ កីឡាការិនី ដែលបានប្រព្រឹត្តទៅកាលពីពេលកន្លងមក។ ពិធីសម្ពោធក្រោមអធិបតី ឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ និងឯកឧត្តម ទី នរិន្ទ រដ្ឋលេខាធិការ ក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកភ្នំក្រវាញ កាលពីថ្ងៃទី១៥ ខែមករា ឆ្នាំ២០២២។
ពិធីនេះត្រូវបានធ្វើឡើង នៅបរិវេណពហុកីឡដ្ឋានថ្មី ក្នុងបរិវេណអនុវិទ្យាល័យសម្តេចឪ សម្តេចម៉ែ និងវិទ្យាល័យ ហ៊ុន សែន ភ្នំក្រវាញ ដោយបានការចូលរួមពីឯកឧត្តម ម៉ក់ រ៉ា ប្រធានក្រុមប្រឹក្សាខេត្ត ឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា និងជាអនុប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកភ្នក្រវាញ ព្រមទាំងក្រុមការងារ ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធទាំង៣ លោកគ្រូ អ្នកគ្រូ សិស្សានុសិស្ស និងយុវជនយ៉ាងច្រើនកុះករ។
បន្ទាប់ពីប្រគល់លិខិតថ្លែងអំណរគុណ ជូនដល់សប្បុរសជន និងប្រគល់ពានរង្វាន់ជ័យលាភី ជូនដល់កីឡាករ កីឡាការិនី ព្រមទាំងថតរូបអនុស្សាវរីយ៍នោះរួចមក ប្រតិភូជាថ្នាក់ដឹកនាំ ក៏បានបន្តចុះជួបសំណេះសំណាល សួរសុខទុក្ខបងប្អូនអាជីវករផ្សារភ្នំក្រវាញ ប្រកបដោយភាពស្និទស្នាលក្រៃលែង៕
