បន្ទាយមានជ័យ ៖ កម្លាំងអហខេត្តបន្ទាយមានជ័យ បានបង្ក្រាបឃាត់ខ្លួនជនសង្ស័យប្រុសស្រី ៥ នាក់ និងគ្រឿងញៀន មេតំហ្វេតាមីនទឹកកក ទម្ងន់ជិតមួយគីឡូក្រាម បញ្ជូនទៅសាលាដំបូងខេត្ត នារសៀលថ្ងៃទី១៨ ខែកញ្ញា ឆ្នាំ២០១៤ ចាត់ការតាមផ្លូវច្បាប់។
ក្រុមជនសង្ស័យត្រូវកម្លាំងអាវុធហត្ថស្រុកមង្គលបូរី បានសហការជាមួយកម្លាំងអាវុធហត្ថ ខេត្តបន្ទាយមានជ័យ បានចុះបង្ក្រាបវេលាម៉ោង០៩ និង៤៥នាទី ថ្ងៃទី១៧ ខែកញ្ញា ឆ្នាំ២០១៤ នៅចំណុចភូមិផាស៊ីស្រា ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
លោកឧត្តមសេនីយ៍ត្រី ឱក បូរិន មេបញ្ជាការអ ហខេត្តបានឲ្យដឹងនៅព្រឹកថ្ងៃទី១៨ ខែកញ្ញា នេះថា ក្រោយពីបានកម្លាំងសម្ងាត់បានចុះស្រាវជ្រាវតាមដានករណីជួញដូរគ្រឿងញៀនទ្រុងទ្រាយធំ នៅក្នុងស្រុកមង្គលបូរី ជាច្រើនថ្ងៃ លុះមកដល់ពេលនេះ ទើបឈានមកដល់ការបង្ក្រាបបានសម្រេច រួមទាំងបានដកហូតបានវត្ថុតាងរួមមាន គ្រឿងញៀន មេតំហ្វេតាមីនទឹកកក ទម្ងន់ជិតមួយ គីឡូក្រាម រថយន្តមួយគ្រឿង ម៉ាកទីកូ ពណ៌ស ពាក់ស្លាកលេខ ភ្នំពេញ 2D-2085 ម៉ូតូមួយគ្រឿង ម៉ាកអ៊ែរប្លេក ពណ៌ក្រហម ពាក់ស្លាកលេខ ភ្នំពេញ 1BB-4260។
លោកមេបញ្ជាការបានបន្តថា ជនសង្ស័យត្រូវបានសមត្ថកិច្ចឃាត់ខ្លួនបាន ១-ឈ្មោះ សោម សុភាព ភេទប្រុស អាយុ៣០ឆ្នាំ (ម្ចាស់ផ្ទះ) ទីកន្លែងកំណើតនៅភូមិផាស៊ីស្រា ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ ទីលំនៅបច្ចុប្បន្នភូមិ-ឃុំកើតហេតុខាងលើ ។ ២-ឈ្មោះ មឿន គឹមឡេង ភេទស្រី អាយុ២៩ឆ្នាំ (ប្រពន្ធម្ចាស់ផ្ទះ) ទីកន្លែងកំណើតភូមិកាបៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ទីលំនៅបច្ចុប្បន្នភូមិ-ឃុំកើតហេតុខាងលើ ។ ៣-ឈ្មោះ អួន សុនិន ហៅ វ័ន្ត ភេទប្រុស អាយុ២០ឆ្នាំ មានលំនៅបច្ចុប្បន្នភូមិអញ្ចាញ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ ៤-ឈ្មោះ ទេព ឈុនលី ភេទស្រី អាយុ១៦ឆ្នាំ មានទីលំនៅបច្ចុប្បន្ន ភូមិនាងកេត ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ ។ និង៥-ឈ្មោះ ផល ចន្ថា ភេទស្រី អាយុ១៦ឆ្នាំ មានទីលំនៅបច្ចុប្បន្នភូមិហ្លួង ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ ។
បច្ចុប្បន្នកម្លាំងអាវុធហត្ថកំពុងអនុវត្តនីតិវិធីច្បាប់បន្ត និងឃាត់ខ្លួនជនសង្ស័យបប្រុសស្រី៥នាក់ និងវត្ថុតាងគ្រឿងញៀនបញ្ជូនទៅសាលាដំបូងខេត្តដើម្បីចាត់ការតាមច្បាប់ ៕
