ខេត្តបន្ទាយមានជ័យ ៖ កម្លាំងអ ហស្រុកម៉ាឡៃបានចុះបង្ក្រាបករណីគ្រឿងញៀន បានឃាត់ខ្លួនជនសង្ស័យបាន៤នាក់ រួមទាំងវត្ថុតាងគ្រឿងញៀន ចំនួន៩គ្រាប់ កញ្ឆា ក្រៀម១ដុំ និងម៉ូតូ៣គ្រឿងនិងវត្ថុតាងមាន១ចំនួនធំទៀត សំរាប់ធ្វើសកម្មភាពចែកចាយ ប្រតិបត្តិការណ៍បង្ក្រាបគ្រឿងញៀន ក្រោមការដឹកនាំកម្លាំង លោកវរសេនីយ៍ត្រី តាំង សុខហេង មេបញ្ជាការអ ហស្រុកម៉ាឡៃ កាលពីវេលាម៉ោង៤ និង៥០នាទីល្ងាច ថ្ងៃទី១៥ ខែកញ្ញា ឆ្នាំ២០១៤ ចំនុចភូមិ អូរទំព័រ ឃុំអូរទំព័រ ស្រុកម៉ាឡៃ ខេត្តបន្ទាយមានជ័យ។
លោកឧត្តមសេនីយ៍ត្រី ឱ បូរិន មេបញ្ជាការអ ហខេត្តបន្ទាយមានជ័យ បានប្រាប់នៅព្រឹកថ្ងៃទី១៧ ខែកញ្ញា ឆ្នាំ២០១៤ នេះថា ក្រោយពីបានទទួលព័ត៌មានពីមហាជនថា មានករណីចែកចាយគ្រឿងញៀនយ៉ាងសកម្មនៅភូមិកើតហេតុខាងលើនេះលោកក៏បានបញ្ជកាឲ្យកម្លាំងសម្ងាត់ចុះទៅស្រាវជ្រាវ រហូតឈានមកដល់ការឃាត់ខ្លួនជនសង្ស័យ និងរត្ថុតាង។
លោកឧត្តមសេនីយ៍ត្រីបានបន្តថា ជនសង្ស័យ៤នាក់នេះ ១,ឈ្មោះ គង់ ជា ភេទប្រុស អាយុ១៦ឆ្នាំ ទី២,ឈ្មោះកៀន ប្រុស ហៅក្តាម ភេទប្រុស អាយុ២២ឆ្នាំ,៣ឈ្មោះ ហេ ឆាយ ហៅម៉ាប់ ភេទប្រុស អាយុ២៤ឆ្នាំ និងទី៤, ឈ្មោះ នាង អឿន ភេទប្រុស អាយុ២៣ឆ្នាំ ជនសង្ស័យខាងលើ មានលំនៅដ្ឋានភូមិកើតហេតខាងលើនេះ សមត្ថកិច្ចបានដកហូតបានវត្ថុតាង គ្រឿងញៀន ប្រភេទ មេតំហ្វេតាមីន ចំនួន៩គ្រាប់ កញ្ឆាក្រៀមចំនួន១ដុំធំ ម៉ូតូចំនួន ៣គ្រឿង ទូរស័ព្ទដៃចំនួន៤គ្រឿង បណ្ណ័សម្គាល់យានយន្ត១សន្លឹក ប្រដាប់សម្រាប់សេពគ្រឿងញៀនចំនួន២ សំបកសម្រាប់ច្រកគ្រឿងញៀនចំនួន១១ឡូ ខ្សែរដៃលោហធាតុ ពណ៌ក្រហមចំនួន១ខ្សែរ (៦កាំ) ខ្សែរក លោកហធាតុ ពណ៌ក្រហមចំនួន១ខ្សែរ (ប្រវែង៣៨ ស.ម) និងចិញ្ចៀនលោហធាតុពណ៌ក្រហមចំនួន១វង់ (ដាំត្បូងពណ៌ស )។
ក្រោយពីសមត្ថកិច្ចឃាត់ខ្លូនជនសង្ស័យ៤នាក់ រួមទាំងវត្ថុតាងខាងលើទាំងអស់នេះ ជនសង្ស័យបានសារភាពចំពោះមុខសមត្ថកិច្ចថា ពួកខ្លួនពិតជាបានប្រព្រឹត្តបទល្មើស និងធ្វើសកម្មភាពចែកចាយគ្រឿងញៀនពិតមែន ។
បច្ចុប្បន្នជនសង្ស័យ៤នាក់ទាំងនេះ ត្រូវបានសមត្ថកិច្ចជំនាញបានសាងសំណំរឿង បញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមផ្លូវច្បាប់ ៕
