ប៉ៃលិន ៖ លោកផាន់ ចាន់ធុល ត្រូវបានប្រកាសតែងតាំង ជាអភិរងខេត្តប៉ៃលិនបន្ថែមមួយរូបទៀត ដើម្បីចូលរួមចំណែក ក្នុងការដឹកនាំ គ្រប់គ្រង និងអភិវឌ្ឍខេត្តប៉ៃលិន ឲ្យកាន់តែរីកចម្រើន បន្ថែមទៀត ។ ពិធីនេះត្រូវបានធ្វើឡើងកាលពីរសៀលថ្ងៃទី១៥ ខែកញ្ញា ឆ្នាំ ២០១៤ នៅសាល ប្រជុំសាលាខេត្តប៉ៃលិនស្ថិតក្រោមអធិបតីភាពលោក អ៊ុង សាមី អនុរដ្ឋលេខាធិការក្រសួងមហាផ្ទៃ លោក កើត សុធា អភិបាលខេត្តប៉ៃលិន ដោយមានការចូលរួមពី លោកស្រីអភិបាលរងខេត្ត សមាជិកក្រុមប្រឹក្សាខេត្តគណៈប្រតិភូអបដំណើ និងមន្ត្រីរាជជុំវិញខេត្តជាច្រើននាក់ផងដែរ ។
លោក អ៊ឹង សុវណ្ណារិន អនុប្រធាននាយកដ្ឋានបុគ្គលិក និងបណ្តុះបណ្តាលវិជ្ជាជីវៈ នៃអគ្គនាយកដ្ឋានរដ្ឋបាលមូលដ្ឋានក្រសួងមហាផ្ទៃ បានអានអនុក្រឹត្យលេខ ១២៧៦ អនក្រ.តត ចុះថ្ងៃទី ២៩ ខែសីហា ឆ្នាំ២០១៤ របស់រាជរដ្ឋាភិបាលកម្ពុជា សម្រេចត្រូវបានតែងតាំងលោក ផាន់ ចាន់ធុល ឋានន្តរស័ក្កវរមន្ត្រីថ្នាក់លេខ ៦ ជាអភិបាលរងនៃគណៈអភិបាលរងខេត្តប៉ៃលិន ។
លោក ផាន់ ចាន់ធុល ដែលត្រូវបានប្រកាសតែងតាំងជាអភិបាលរងខេត្តប៉ៃលិន បានប្តេជ្ញា គោរពតាមរដ្ឋធម្មនុញ្ញ ដែលជាច្បាប់កំពូលរបស់ជាតិ រួមចំណែកអនុវត្តឲ្យបានល្អតាមយុទ្ធសាស្ត្រ ចតុកោណដំណាកកាលទី៣ របស់រាជរដ្ឋាភិបាលកម្ពុជា ។ រក្សាសាមគ្គី ឯកភាពផ្ទៃក្នុង ពង្រឹងកិច្ចសហការល្អជាមួយក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កម្លាំងគ្រប់លំដាប់ថ្នាក់ដើម្បីឲ្យការដឹកនាំ និងការគ្រប់គ្រងទទួលបានភាពជោគជ័យ ក្នុងការបម្រើរជាតិមាតុភូមិ ។
លោក កើត សុធា អភិបាលខេត្តប៉ៃលិនបានមានប្រសាសន៏ថាក្នុងនាមគណៈអភិបាលខេត្ត សូមសម្តែងនូវការស្វាគមន៍យ៉ាងកក់ក្តៅចំពោះលោក ផាន់ ចាន់ធុល ដែលត្រូវបាន រាជរដ្ឋាភិបាលកម្ពុជា សម្រេចតែងតាំងជាអភិបាលរងនៃគណៈអភិបាលខេត្ត ដើម្បីរួមគ្នាដឹកនាំ និងគ្រប់គ្រងសំដៅធ្វើយ៉ាងណាឲ្យខេត្តប៉ៃលិនមានការអភិវឌ្ឍរីកចម្រើន លើគ្រប់វិស័យ ។
លោក អ៊ុង សាមី អនុរដ្ឋលេខាធិការក្រសួងមហាផ្ទៃ បានមានប្រសាសន៍ថា ដោយមើលឃើញ ពីទំហំការងាររដ្ឋបាលខេត្តប៉ៃលិនមានភាពកាន់តែមមាញឹកច្រើនឡើងៗជា លំដាប់ ។ ដូចនេះ ដើម្បីធានា ឲ្យការអនុវត្តនូវគោលនយោបាយកំណែទម្រង់នេះមានភាពរលូន និងមានប្រសិទ្ធភាព រាជរដ្ឋាភិបាលបាន សម្រេចតែងតាំងលោក ផាន់ ចាន់ធុល ជាអភិបាលរង នៃគណៈអភិបាលខេត្តប៉ៃលិនបន្ថែមមួយរូបទៀត ដើម្បីចូលរួមចំណែកក្នុងការដឹកនាំ គ្រប់គ្រង និងអភិវឌ្ឍខេត្តប៉ៃលិន ឲ្យកាន់តែរីកចម្រើនបន្ថែមទៀត ។
លោកបានបន្តថា ដើម្បីឲ្យការដឹកនាំ និងគ្រប់គ្រងទទួលបានភាពជោគជ័យ ត្រូវពង្រឹងស្មារតីសាមគ្គីភាព ឯកភាផ្ទៃក្នុងឲ្យបានល្អ ដោយឈរលើមូលដ្ឋាន នៃការលើកកម្ពស់ប្រសិទ្ធភាព ការងារ ការគោរពច្បាប់ គោរពគោលការណ៍នានារបស់រដ្ឋ និងពង្រឹងរបៀបរបបធ្វើការ ដើម្បីលើកកម្ពស់ការទទួលខុសត្រូវ និងភាពជាម្ចាស់របស់មន្ត្រី នៅក្នុងការបំពេញតួនាទី ភារកិច្ចរបស់ខ្លួន ៕ សំ កូលីន
