ខេត្តរតនគិរី៖ លោកវរៈសេនីយត្រី ឃី សុខា ប្រធានមន្ទីរបច្ចេកទេសនិងសន្តិសុខអាវុធហត្ថខេត្តរតនគិរីសហការជាមួយអាវុធហត្ថស្រុកកូនមុំ ឃាត់ស្ទាក់រថយន្តស៊េរីទំនើបមួយគ្រឿង សង្ស័យដឹកឈើខុសច្បាប់តាមបណ្តោយផ្លូវជាតិលេខ៧៨ពីខេត្តស្ទឹងត្រែងមកចូលខេត្តរតនគិរីរហូតឃាត់បានពិនិត្យឃើញឈើប្រណីតប្រភេទធ្នង់ជាង១០០ដុំចំណែកម្ចាស់រថយន្តបានគេចខ្លួនបាត់ កាលពីវេលាម៉ោង៣និង១៥នាទីរសៀលថ្ងៃទី១៣ ខែមិនា ឆ្នាំ២០១៧ ត្រង់ចំណុចភូមិពីរ ឃុំស្រែអង្គ្រង ស្រុកកូនមុំ ខេត្តរតនគិរី ។
លោក ឃី សុខា បានអោយដឹងថា នៅក្រោយពេលទទួលព័ត៌មានតាមទូរស័ព្ទ លោកបាននាំកំលាំងចុះទៅកាន់តំបន់ខាងលើ ទើបប្រទះឃើញរថយន្តម៉ាក លុចស៊ីសRX ៣០០ពណ៌ស្ក គ្មានផ្លាកលេខ ដឹកឈើប្រណីតប្រភេទធ្នង់ពេញតែម្តង ខណៈនោះកំលាំងបានឃាត់និងរឹបអូសរថយន្តនាំមកកាន់បញ្ជាការដ្ឋានអាវុធហត្ថខេត្ត ដើម្បីវាស់វែងនិងបញ្ជូនទៅស្ថាប័នជំនាញចំណែកម្ចាស់រថយន្តបានគេចខ្លួនបាត់ ក្នុងពេលដែលចុះបង្ក្រាបនោះ។
របាយការណ៍របស់វរៈសេនីយត្រី ឃី សុខា ឈើប្រណីតនៅក្នុងរថយន្តនោះ មានចំនួនសរុប១០០ដុំ ជាប្រភេទឈើធ្នង់សុទ្ធ តែមិនទាន់ដឹងបរិមាណម៉ែត្រត្រីគុណនៅឡើយទេ។
បច្ចុប្បន្ន វត្ថុតាងទាំងឈើនិងរថយន្ត ត្រូវអាវុធហត្ថខេត្ត បានប្រគល់ទៅជំនាញរដ្ឋបាលព្រៃឈើ ដើម្បីចាត់ការតាមនីតិវិធីបន្តទៀតនាព្រឹកថ្ងៃទី១៤ខែមិនាឆ្នាំ២០១៧ ៕
