ប្រទេសថៃ ៖ ក្រឡាប់ ម៉ូតូកង់៣ ( ថុក ថុក )របួស ព្រះសង្ឃខ្មែរ៥អង្គមានព្រះជន្មចាប់ពី២១ ដល់២៧ វស្សា ដោយគាំងគ្រឿងម៉ាសុីនរួច បុកទៅលើជញ្ជាំងបេតុងយ៉ាងពេញទំហឹង កាលវេលាម៉ោង ១២ និង៤៥ នាទី ថ្ងៃត្រង នៅថ្ងៃទី១៨ ខែកុម្ភៈ ឆ្នាំ២០១៧ នៅត្រង់ចំណុចផ្លូវអក្សរតេ កែងផ្លូវថាវសុរៈនិងផ្លូវរ៉ាចនីកុន ស្ថិតនៅខាងក្រោមស្ពានអាកាស ដែលមានផ្លូវរថភ្លើងឆ្លងកាត់ ក្នុងខេត្ត នគររាជសីមា ប្រទេសថៃ ។
ព័ត៌មានបានបន្តថា នៅមុនពេលកើតហេតុគឺមានព្រះសង្ឃចំនួន៥អង្គ ដែលមានសញ្ជាតិជាខ្មែរ បានគង់នៅឯទីអារាមក្នុងប្រទេសថៃ បាននិមន្តតាមរយៈម៉ូតូកង់៣ ក្នុងទិសដៅទៅកាន់មហាវិទ្យាល័យ មហាចុឡាឡុងកន ដែលស្ថិតនៅចំងាយពីទីតាំងកើតហេតុ ប្រមាណ ៦ គីឡូម៉ែត្រ ។លុះនៅពេលដែលម៉ូតូកង់៣ កំពុងតែបើកសុខៗ ដល់ត្រង់ចំណុចកើតហេតុ ដែលផ្លូវ មានលក្ខណៈជាអក្សរតេ ស្រាប់តែម៉ូតូនោះទំនងជាមានបញ្ហា ព្រោះម៉ូតូលែងស្តាប់ ការបញ្ជារបស់ម្ចាស់វាទៅហើយ ធ្វើអោយម៉ូតូនេះមិនអាចកាច់ចង្កូតបាន ក៏ត្រូវទៅមុខ ត្រង់ ដោយបានបុកទៅលើជញ្ជាំងបេតុងយ៉ាងពេញទំហឹង ព្រមទាំងបានរួញក្បាលម៉ូតូ
ទាំងស្រុង ។ ដោយឡែកអ្នកបើកបរ និងព្រះសង្ឃដែលកំពុងគង់នៅលើម៉ូតូនោះ បានហោះផ្លោងបោកព្រះកេសទៅនឹងថ្នល់ផង និងទៅលើជញ្ជាំងបេតុងនោះផង បណ្តាល អោយរងរបួសពេញផ្លូវ ។
អ្នកបើកបរម៉ូតូកង់៣ ដែលមានឈ្មោះ ផាន់ អ៊ុនម៉ា ភេទប្រុស អាយុ៥៥ឆ្នាំរស់នៅភូមិ៨ ឃុំណងបួរសាលា ស្រុកមឿង ខេត្តនគររាជសីមា ក៏បានរងរបួស យ៉ាងដំណំដែរ ។
ម្ចាស់ម៉ូតូបានសារភាពថា មិនដឹងយ៉ាងម៉េចបានជាម៉ូតូគាំងម៉ាស៊ីនលែងស្តាប់ ទើបលេងស្តាប់បញ្ជាម្ចាស់។
បច្ចុប្បន្នទាំងអ្នកបើកបរ ក៏ដូចជាព្រះសង្ឃខ្មែរទាំងអស់ ក្រុមតម្រួតថៃបានចុះជួយបញ្ជូនទៅសង្គ្រោះនៅឯមន្ទីរពេទ្យអស់ហើយ ៕
