ខេត្តបាត់ដំបង ៖ ក្រុមអ្នកពត៌មាន ត្រូវមន្ត្រីពន្ធនាគារ ហាមមិនអោយថតផ្សាយរឿងទណ្ឌិតស្លាប់នៅក្នុងពន្ធនាគារ ប្រហែល មានអាថ៌កំបាំង។
ហេតុការណ៍អ្នកទោសស្លាប់នាសៀលថ្ងៃទី១៧ ខែកុម្ភៈ ឆ្នាំ២០១៧ នៅក្នុងពន្ធនាគារខេត្តបាត់ដំបងដែលស្ថិតក្នុងភូមិកំពង់សីមា សង្កាត់វត្តគរ ក្រុង-ខេត្តបាត់ដំបង។ ភ្លាមៗនោះក្រុមអ្នកយកព័ត៌មានក្នុងស្រុកជាច្រើនបានចុះទៅដល់ទីកន្លែងដើម្បីយកព័ត៌មានចេញផ្សាយ តែត្រូវបានមន្ត្រីយាមមាត់ច្រកទ្វារប្រាប់ថាលោកប្រធានមិនអោយធ្វើការថតផ្សាយ។
ប្រភពខ្លះថា អ្នកទោសដែលស្លាប់ ភេទប្រុស អាយុ៤២ឆ្នាំ មានទីលំនៅស្រុកថ្មគោលខេត្តបាត់ដំបង ហើយមានទោស២ឆ្នាំ តែការស្លាប់គេនិយាយតគ្នាមកពីគាំងបេះដូង ។
ជុំវិញករណីមានអ្នកទោសម្នាក់ស្លាប់នៅក្នុងពន្ធនាគារខាងលើនេះ ត្រូវបានប្រភពជាច្រើនដាក់ការសង្ស័យថា ៖ ជាករណីធ្វើទារុណកម្ម ឬជាការមិនយកចិត្តទុកដាក់មើលថែ នៅពេលដែលអ្នកទោសកើតមានជម្ងឺផ្សេងៗ។
ក្រោយពេលកើតហេតុ គេឃើញមានការលួចលាក់ រវាងមន្ត្រីជំនាញនិងរថយន្តពេទ្យចូលទៅដឹករំដោះសពចាកចេញពីពន្ធនាគារ ដើម្បីជាការបិទបាំងពីភ្នែកមហាជន៕
