ខេត្តកណ្ដាល៖ រថយន្តបែនដឹកដីរ៉េចង្កូតទៅឆ្វេងដៃជ្រុលបុករថយន្តសាំយ៉ុង បណ្តាលឲ្យរបួសធ្ងន់៨នាក់ និងស្រាលជាច្រើននាក់ នៅម៉ោងប្រមាណ ៣រសៀល ថ្ងៃទី១៨ ខែកុម្ភៈ ឆ្នាំ២០១៧ នៅ មុខអនុវិទ្យាល័យ ហ៊ុន សែន ខ្ពបវែង ស្ថិតក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ ។
លោក អ៊ាវ ចំរើន ស្នងការនគរបាលខេត្តកណ្តាល បានឲ្យដឹងជាបឋមថា គ្រោះថ្នាក់ចរាចរណ៍នេះ បានបណ្តាលឲ្យរងរបួសធ្ងន់៨នាក់ មានស្រី៧នាក់។
នគរបាលចរាចណ៍បានឲ្យដឹងថា គ្រោះថ្នាក់នេះ បណ្តាលមកពីរថយន្តបែនដឹកដី បានជ្រុលទៅខាងឆ្វេងដៃរបស់ខ្លួន ហើយបុករថយន្ត សាំយ៉ុង១២កៅអីតែម្តង។ តែក្រោយកើតហេតុ អ្នកបើករថយន្តបែនដឹកដី ត្រូវបានកម្លាំងនគរបាលរ ចាប់ខ្លួនបញ្ជូនទៅអធិការដ្ឋាន នគរបាលក្រុងតាខ្មៅ ខណ:អ្នករងគ្រោះត្រូវបានសមត្ថកិច្ច បញ្ជូនទៅកាន់មន្ទីរពេទ្យ។
រថយន្តបែនដឹកដីបង្កម៉ាក ហ្វុយសូ ពណ៌ក្រហមលាយទឹកប្រាក់ពាក់ស្លាកលេខភ្នំពេញ 3C-2102 បើកបរពីលិចទៅកើត លុះដល់ចំណុចកើតហេតុ បានជ្រុលទៅបុករថយន្ត ម៉ាកសាំងយ៉ុងពណ៌កណ្តុរប្រមេះ ពាក់ស្លាកលេខភ្នំពេញ2AL-5485 បណ្ដាលឲ្យរងគ្រោះជាច្រើននាក់ ហេីយតៃកុងឡានគៀបជាប់នៅក្នុងរថយន្ដ។ បច្ចុប្បន្នរថយន្តទាំង២គ្រឿងបានយកទៅរក្សាទុកនៅ អធិការដ្ឋាន នគរបាលក្រុងតាខ្មៅ រងចាំធ្វើការដោះស្រាយជាក្រោយ៕
