ប្រទេសថៃ ៖ បុរសថៃម្នាក់ជា់កងទ័ពអាកាសលេខ២៣ និង អាកាសយានិកបានធ្លាក់ចេញពីយន្តហោះ ខណ:កំពុងធ្វើការហោះហើរ នៅកណ្តាលព្រៃនៃចំការកៅស៊ូ បណ្តាលឲ្យរងរបួសធ្ងន់ តែដោយសារការយកចិត្តទុកដាក់ លើការព្យាបាលរបស់ក្រុមគ្រូពេទ្យ ជនរងគ្រោះ បានរួចផុតពីសេចក្តីស្លាប់ កាលវេលាម៉ោង១០ និង៣០ នាទីព្រឹក ថ្ងៃទី១៥ ខែកុម្ភៈ ឆ្នាំ២០១៧ ត្រង់ចំណុច ខាងជើងភូមិចំរើនសុខ ក្នុងតំបន់ណាឌិនដាំ ស្ថិតក្នុងស្រុកមឿង ខេត្តអ៊ុដនថានីប្រទេសថៃ ។
បើតាមការអះអាងពីប្រជាពលរដ្ឋដែលរស់នៅក្នុងតំបន់ខាងលើ បាននិយាយថា នៅមុនពេលកើតហេតុគេបានឃើញយន្តហោះមួយគ្រឿងលេខ F១៦ ដែលជាយន្តហោះ របស់កងទ័ពអាកាស បានធ្វើការហោះហើរឆ្លងកាត់តំបន់នេះ ភ្លាមៗនោះដែរក៏ស្រាប់តែ មានអាកាសយានិកម្នាក់ដែលនៅក្នុងយន្តហោះ បានប៉ើងខ្ទាតចេញមកខាងក្រៅយន្តហោះ ហើយក៏បានធ្លាក់មកដី បើទោះបីជាអាកាសយានិករូបនោះខំប្រឹងបើកឆ័ត្រដើម្បីការពារខ្លួន យ៉ាងណាក៏ដោយ ក៏សឹងតែហួសពេលដែរ ព្រោះគេបានធ្លាក់មកជិតដល់ដីទៅហើយ ដែលធ្វើអោយឆ័ត្រយោងបានទាក់នឹងមែកឈើចំណែកមនុស្សក៏បានធ្លាក់បោកទៅលើដី និងរងរបួសយ៉ាងធ្ងន់ធ្ងរ ។
នៅពេលនោះដែរ ទាំងកំលាំងសមត្ថកិច្ច ក៏ដូចជាអាជ្ញាធរ និងប្រជាពលរដ្ឋ បាននាំគ្នា ដឹកជនរងគ្រោះបញ្ជូនទៅកាន់មន្ទីរពេទ្យយ៉ាងប្រញ៉ាប់ប្រញ៉ាល់ដើម្បីសង្គ្រោះ ព្រោះ សភាពអ្នករបួស កំពុងស្ថិតក្នុងសភាពធ្ងន់ធ្ងរដែលចាំបាច់ត្រូវសង្គ្រោះបន្ទាន់ នៅទីបំផុត ទើបគេស្គាល់ថា ជនរងគ្រោះមានឈ្មោះ សុខូថៃ សុំសិរីសៃ ភេទប្រុស អាយុ៣៦ឆ្នាំ ជាកងទ័ពអាកាសលេខ២៣ និងជាអាកាសយានិកនៃយន្តហោះ F១៦ ក្នុងខេត្តអ៊ុដនថានី ប្រទេសថៃ ៕
