ប៉ៃលិន ៖ ក្មេងប្រុសពីរនាក់រងរបួសធ្ងន់ម្នាក់ដាច់ជើងខាងឆ្វេងត្រឹមក្បាលជង្គង់ និងម្នាក់ទៀត ត្រូវអំបែងគ្រាប់ខ្ទៀតត្រូវពេញខ្លួន ខណៈពេលដែលក្មេងប្រុសរងគ្រោះទាំងពីរនាក់ឡើងភ្នំ ដើម្បីរកដកផ្សិត មកស្លហូបហើយជាន់មីនផ្ទុះ ។ ហេតុការណ៍ផ្ទុះមីននេះបានកើតឡើង កាលពីវេលាម៉ោង ៩ និង១៥នាទី ព្រឹកថ្ងៃទី៩ ខែកញ្ញា ឆ្នាំ២០១៤ នៅចំណុចលើភ្នំព្រិច ស្ថិតក្នុងភូមិប៉ាងរលឹមសង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។ ក្រោយពេលកើតហេតុក្មេងប្រុសរងគ្រោះទាំងពីរនាក់ ត្រូវបានបញ្ចូនមកសង្គ្រោះ នៅពេទ្យបង្អែកខេត្តប៉ៃលិន តែដោយសារស្ថានភាពរបួសធ្ងន់ធ្ងពេក ទើបត្រូវបានក្រុមគ្រូពេទ្យបញ្ចូនទៅ សង្គ្រោះបន្តនៅមន្ទីរខេត្តបាត់ដំបង ។
លោក កឹម ក្លឹម អាយុ ៤៧ ឆ្នាំជាឪពុកនិងជាតារបស់ក្មេងរងគ្រោះបានឲ្យដឹងថា ប្រុសរងគ្រោះទី១-ឈ្មោះ ក្លឹម អ៊ីត អាយុ ៨ ឆ្នាំ ត្រូវជាកូនបង្កើតរបស់គាត់ ត្រូវអំបែងគ្រាប់ខ្ទៀតត្រូវពេញខ្លួន រងរបួសធ្ងន់។ទី២-ឈ្មោះ តិក តយ អាយុ ៦ ឆ្នាំ ត្រូវជាចៅរបស់គាត់ រងរបួសដាច់ជើងខាងឆ្វេង ។ ក្មេងប្រុសឈ្មោះ តិក តយ ជាក្មេងកំព្រា ព្រោះម្តាយរបស់គេបានស្លាប់ចោលបាត់ហើយនៅតែ ឪពុក សព្វថ្ងៃរស់នៅជាមួយគាត់ស្ថិត ក្នុងចំណុចកើតហេតុខាងលើ ។ គាត់មានស្រុកកំណើតនៅភូមិកំបោ ឃុំមោង ស្រុកស្រីស្នម ខេត្តសៀមរាប ។
លោកបានបន្តថា មុនពេលកើតហេតុ គាត់នឹងក្រុមគ្រួសារបាននាំគ្នាឡើងលើភ្នំ ដើម្បីរកដកផ្សិតមកស្លហូប ។ ពេលឡើងទៅលើភ្នំ ពួកគេបានដើរបែកផ្លូវគ្នា ដោយក្មេងប្រុសរងគ្រោះទាំងពីរ នាក់ទៅជាមួយគ្នា ស្រាប់តែមួយសន្ទុះក្រោយ ក៏លឺសំលេងផ្ទុះប៊ឺង គាត់និងអ្នកផ្សេងៗទៀតបាននាំគ្នារត់សំដៅទៅរកមើលកន្លែង លឺសំលេងផ្ទុះ ក៏ឃើញកូនប្រុស និងចៅរបស់គាត់ត្រូវរបួសសន្លប់បាត់ស្មារតី និងមានឈាមហូរយ៉ាងខ្លាំង ក៏នាំគ្នាសែងយកផ្ទះហើយបញ្ចូនមកសង្គ្រោះនៅមន្ទីរពេទ្យបង្អែកខេត្តប៉ៃលិនតែម្តង ។
លោក ឌី ម៉េងអ៊ីម មេភូមិប៉ាងរលឹមបានឲ្យដឹងថា តំបន់ភ្នំនេះគឺខាងស៊ីម៉ាក់បានចុះសិក្សារួចហើយ និងបានដាក់ ផ្លាក់សញ្ញាគ្រោះថ្នាក់ (មានគ្រាប់មីន) ហាមមិនឲ្យប្រជាពលរដ្ឋចូលទៅឡើយ តែគាត់នៅតែឡើងទៅ ទើបបណ្តាលជាន់គ្រាប់មីនផ្ទុះបែបនេះ ។
លោក គង់ សំណាង មេប៉ុស្តិ៍សង្កាត់អូរតាវ៉ៅ បានឲ្យដឹងថា គ្រាប់មីនដែលផ្ទុះបណ្តាលឲ្យក្មេងប្រុសទាំង ពីរនាក់រងរបួសនោះ ជាប្រភេទគ្រាប់មីន ៧២ A (សញ្ញាបូករបស់សូវៀត) ដែលសេសសល់ពីសម័យសង្គ្រាម ។
ក្រោយពេលទទួលបានព័ត៌មានថា មានករណីផ្ទុះមីនបណ្តាលឲ្យមានក្មេងប្រុសពីរនាក់រងរបួស លោក កើត សុធា អភិបាលខេត្តប៉ៃលិនបានជួយឧបត្ថមជាថវិកាចំនួន ១លានរៀលដល់ក្រុមគ្រួសារក្មេងប្រុស រងទាំងពីរនាក់ ដើម្បីយកទៅព្យាបាលរបួសផងដែរ ។
លោក លោក កឹម ក្លឹម ត្រូវជាឪពុក និងជាតារបស់ក្មេងប្រុសរងគ្រោះ បានថ្លែងអំណរគុណយ៉ាងខ្លាំង ចំពោះឯកឧត្តម កើត សុធា ដែលបានជួយដល់គ្រួសារគាត់នៅពេលដែលជួបគ្រោះថ្នាក់នេះ ៕
សំ កូលីន
