បន្ទាយមានជ័យ៖ កម្លាំងជំនាញប្រឆាំងបទល្មើសគ្រ៉ឿងញៀន បានចុះសហការជាមួយកម្លាំងមូលដ្ឋានកងរាជអាវុធហត្ថក្រុងសិរីសោភ័ណ ធ្វើប្រតិបត្តិការណ៍ត្រួតពិនិត្យអាវុធជាតិផ្ទុះ ក្នុងភូមិសាស្ត្រក្រុងសិរិសោភ័ណ ឃាត់ខ្លួនជនសង្ស័យបានចំនួន០៥នាក់ប្រើប្រាស់ថ្នាំញៀន និងដកហូតថ្នាំញៀនម៉ាទឹកកក ចំនួន០១កូនថង់តូច ស្មើនិង០,២១ក្រាម នៅល្ងាចថ្ងៃទី០៣ ខែកុម្ភៈ ឆ្នាំ២០១៧ នៅត្រង់ចំណុចសាលារៀនប៉ោយសូភី ស្ថិតក្នុងភូមិ២ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ ក្រោយពីកម្លាំងអាវុធហត្ថបានធ្វើការត្រួតនិត្យ ហើយបានឃាត់ខ្លួនជនសង្ស័យបានចំនួន០៥នាក់ ១/ឈ្មោះខេង ចន្ថា ភេទប្រុស អាយុ២៨ឆ្នាំ ២/ឈ្មោះបូ អូនតូច ភេទប្រុស អាយុ១៩ឆ្នាំ ៣/ឈ្មោះទិត្យ ថន ភេទប្រុសអាយុ៣១ឆ្នាំ ៤/ឈ្មោះអ៊ុក ប្រុស ភេទប្រុស អាយុ៣០ឆ្នាំ ៥/ឈ្មោះនី វិត ភេទប្រុស អាយុ២៤ឆ្នាំ។ ទាំង៥នាក់ រស់ក្នុងភូមិ៤ ភូម២ ភូមិកន្ទួត សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
ក្នុងការឃាត់ខ្លួននេះ កម្លាំងអាវុធហត្ថបានធ្វើការហូតវត្ថុតាងគ្រឿងញៀន ប្រភេទមេតំហ្វេតាមីនទឹកកកចំនួន ០១ កូនថង់តូច ស្មើនិង០,២១ក្រាម និងទូស័ព្ទដៃ០៣គ្រឿងផងដែរ ។
ជនសង្ស័យទាំង០៥នាក់ ក្រោយពីឃាត់ខ្លួនរួចហើយ ត្រូវបានយកមកបញ្ជាការដ្ឋានកងរាជអាវុធហត្ថខេត្ត ដើម្បីធ្វើការសាក។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារបទល្មើសគ្រឿងញៀនបានឲ្យដឹងថា ជនសង្ស័យទាំង០៥នាក់ នៅមុខអាវុធហត្ថបានឆ្លើយសារភាពថា ខ្លួនគេទាំង០៥នាក់ ពិតជាបានទិញគ្រឿងញៀនមកទុកប្រើប្រាស់ពិតប្រាកដមែន ។
លោកវរសេនីយ៍ឯក ស ប៊ុនសឿង បានឲ្យដឹងទៀតថា ក្រោយពីបានចម្លើយសារភាពហើយនោះ ជនសង្ស័យទាំង០៥នាក់ត្រូវបានកម្លាំងជំនាញអាវុធខេត្ត កសាងសំណុំរឿងបញ្ជូនទៅតុលាការដើម្បីដាក់ទោសទៅតាមផ្លូវច្បាប់ ៕
