ខេត្តស្ទឹងត្រែង ៖ បុរសម្នាក់ ទើបចេញពីគុកបាន៣ខែ ត្រូវសមត្ថកិច្ចនគរបាលឃាត់ខ្លួន និងប្រពន្ធ ព្រមទាំងគ្រឿងញៀនចំនូន៤កញ្ចប់ធំនិង២កញ្ជប់តូច កាលពីវេលាម៉ោង១០ព្រឹក ថ្ងៃ៣១ខែមករាឆ្នាំ ២០១៧ ស្ថិតនៅចំណុចរូងដីព្រៃខាងក្រោយវិទ្យុសេកុង ក្នុងភូមិស្ពានថ្មសង្កាត់ក្រុងស្ទឹងត្រែង។
មន្ត្រីជំនាញអោយដឹងថា ជនសង្ស័យ២នាក់ប្តីប្រពន្ធនេះ មានឈ្មោះ ផាន់ ពិសិទ្ធ (ប្តី) អាយុ៣០ឆ្នាំ មុខរបរមិនពិតប្រាកដ រស់នៅភូមិស្ពានថ្មសង្កាត់ក្រុងស្ទឹងត្រែង និងប្រពន្ធឈ្មោះ តនធីតា អាយុ២៨ឆ្នាំ មុខរបរមិនពិតប្រាកដ មានស្រុកកំណើតនៅខេត្តកំពង់ចាម បច្ចុប្បន្នរស់នៅជាមួយប្តី ។
មន្ត្រីជំនាញបន្តថា គ្រឿងញៀនដែលសមត្ថកិច្ចដកហូតបានមានថ្នាំញៀនប្រភេទមេតំហ្វេតាមីនម្សៅក្រាមពណ៍សថ្លាចំនូន៤កញ្ចប់ធំនិង២កញ្ជប់តូច សរុប៦កញ្ជប់មានទំងន់៣.៦ក្រាម និងប្រដាប់ប្រដាសំរាប់ជក់មួយចំនួនទៀត ។
មន្ត្រីជំនាញបន្តអោយដឹងទៀតថា មុននឹងឈានទៅដល់ការបង្ក្រាបជនសង្ស័យ២នាក់ប្តីប្រពន្ធនោះ បានក្រុមកងកម្លាំងបានតាមដានកំណត់មុខសញ្ញានេះ ហើយស៊ើបអង្គេតដឹងថា ពួកគេជួញដូរនិងប្រើប្រាស់គ្រឿងញៀនទើបបង្ក្រាបបានតែម្តង។
មន្ត្រីជំនាញបន្ថែមថា ជនសង្ស័យម្នាក់ឈ្មោះ ផាន់ ពិសិទ្ធ ត្រូវបានកម្លាំងចាប់ខ្លួនម្តងរួចមកហើយ ពាក់ព័ន្ធនឹងករណីគ្រឿងញៀនបញ្ជូនទៅតុលាការចាត់តាមនិតិវិធីច្បាប់។
លោកថា ជនសង្ស័យនូវបន្ទាប់ពីចេញពីពន្ធនាគារបាន៣ខែ នៅតែប្រព្រឹត្តបទល្មើសគ្រឿងញៀនទៀតក៏ត្រូវសមត្ថកិច្ចឃាត់ខ្លួនបានម្តងទៀតរួមជាមួយប្រពន្ធរបស់ខ្លួន។
ជនសង្ស័យ២នាក់ប្តីប្រពន្ធនិងគ្រឿងញៀន៦កញ្ជប់ធំតូច នឹងត្រូវបញ្ជូនទៅកាន់តុលាការចាត់ការបន្តទៅតាមនិតិវិធីច្បាប់ ៕
