ខេត្តប៉ៃលិន ៖ មានហេតុការណ៍បង្កឱ្យភ្ញាក់ផ្អើលមួយ ដោយនារីជាបុគ្គលិកម្នាក់ កាន់ផ្នែកគណនេយ្យ របស់”ក្រុមហ៊ុនថូម៉ាក់ ផ្គត់ផ្គង់ទឹកស្អាតខេត្តប៉ៃលិន”បានលួចកិបកេងប្រាក់ក្រុមហ៊ុនអស់ចំនួនជាង៣០លានរៀលរួចបានវេចបង្ខិចរត់គេចខ្លួនបាត់ស្រមោល ដែលហេតុការណ៍នេះបានកើតឡើងកាលពីវេលា ម៉ោង៩និង៣០នាទីព្រឹកថ្ងៃទី០៦ ខែកញ្ញា ឆ្នាំ២០១៤ ស្ថិតនៅភូមិបឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ជនសង្ស័យកិបកេងប្រាក់ក្រុមហ៊ុនរត់គេចខ្លួន ឈ្មោះ ហ៊ុល លក្ខណា ភេទស្រី អាយុ៣២ឆ្នាំ មានស្រុកកំណើតរស់នៅផ្លូវលេខ១២២ សង្កាត់មិត្តភាព ខណ្ឌ៧មករា រាជធានីភ្នំពេញ ។ បច្ចុប្បន្នស្នាក់នៅធ្វើការក្នុងក្រុមហ៊ុន ក្នុងភូមិសង្កាត់ខាងលើ ។
ប្រភពព័ត៌មានពីស្ត្រីម្នាក់ជាម្ចាស់ក្រុមហ៊ុន ថូម៉ាក់ ផ្គត់ផ្គង់ទឹកស្អាត បានរៀបរាប់ឱ្យដឹងថា មុនពេលកើតហេតុ ដោយសារខាងក្រោមហ៊ុនមានការបាត់ថវិការអស់ច្រើនពេកមិនដឹងជា ទៅណា ទើបធ្វើការស្រាវជ្រាវសើរើមើលបញ្ជីមើល ខណៈកំពុងតែពិនិត្យមើលទិន្នន័យស្រាប់ តែនារីខាងលើបានរៀបចំសម្លៀកបំពាក់ស្អាត់ៗ រួចឡើងលើរថយន្តតាក់ស៊ីចេញពីក្រុងប៉ៃលិន ឆ្ពោះទៅទិសខាងកើតទៅខេត្តបាត់ដំបងបាត់ស្រមោល ។ ក្រោយមកទើបរកឃើញថា បាត់ប្រាក់ក្រុមហ៊ុនអស់ជាង៣០លានរៀល ។ ប្រភពបន្តទៀតថា ខាងក្រុមហ៊ុនសង្ស័យថាក្នុង១ថ្ងៃៗ នារីខាងលើ បានលួចកិបកេងប្រាក់ក្រុមហ៊ុនទុកសម្រាប់ខ្លួនឯង តែដោយគ្មានអ្នកណាចាប់ ភ្លឹកសើរើមើលបញ្ជីអស់រយៈពេលជាង១ឆ្នាំកន្លងមកហើយ ទើបបាត់លុយកាក់អស់ច្រើនបែប នេះ ។
ស្ត្រីជាម្ចាស់ក្រុមហ៊ុនខាងលើ បានបញ្ជាក់ទៀតថា ខាងក្រុមហ៊ុនបានដាក់ពាក្យបណ្តឹង ទៅសមត្ថកិច្ចក្រុងប៉ៃលិនរួចរាល់អស់ហើយនៅព្រឹកថ្ងៃដដែលបន្ទាប់ពីកើតហេតុភ្លាមៗ ដើម្បីឱ្យសមត្ថកិច្ចតាមចាប់ជនសង្ស័យខាងលើយកមកផ្តន្ទាទោសតាមផ្លូវច្បាប់ ៕
ចៅ ចិត្រ
