ប្រជាពលរដ្ឋស្រុកភ្នំព្រឹកនិងស្រុកសំពៅលូនចំនួន ១២០ នាក់ ថា ក្រុមហ៊ុនសួនមានសម្បត្តិរំលោភយកដី
បាត់ដំបង ៖ ប្រជាពលរដ្ឋស្រុកភ្នំព្រឹក និងស្រុកសំពៅលូន ចំនួន១២០នាក់ថា ក្រុមហ៊ុនសួនមានសម្បត្តិរំលោភយកដីពួកគាត់ សុំលោកអភិបាលខេត្តជួយអន្តរាគមន៍រកយុត្តិធម៌វាស់វែងនិងធ្វើប័ណ្ណកម្មសិទ្ធិកាលពីថ្ងៃត្រង់ ថ្ងៃទី០៥ ខែកញ្ញា ឆ្នាំ២០១៤ នៅសួននាគបាញ់ទឹកក្រុងបាត់ដំបង។
តាមប្រភពតំណាងប្រជាពលរដ្ឋ៦នាក់បានអោយដឹងថាពួគគាត់បានមកពីភូមិអូរដា ភូមិដំណាក់ក្សាន្ត ភូមិអូរដា ឃុំបួរស្រុកភ្នំព្រឹក និងភូមិចក្រីឃុំចក្រី ស្រុកភ្នំព្រឹក និងមកពីភូមិគីឡូ៩ ឃុំជ្រៃសីមា ស្រុកសំពៅលូន ភូមិទួលក្រសាំង ភូមិប្រហូត ឃុំសិរីមានជ័យ ស្រុកសំពៅលូន សរុបទាំអអស់ ១២០ នាក់ឡើង មកតវ៉ាសុំលោក ចន្ទ័ សុផល អភិបាលខេត្តជួយអន្តរាគមន៍ រកយុត្តិធម៌ដោយក្រុមហ៊ុន សួនមានសម្បត្តិ រំលោភយកដីគាត់អាស្រ័យផល ម្នាក់មាន១ហិកតា២ហិកតា ។ ប្រជាជនមាន ៣ ហិកតា ត្រូវរំលែកវិភាគទានអនុប្រយោគ១ហិកតាជូនក្រុមហ៊ុន ដូចមាន៥ហិកតាបាន៤ហិកតា អ្នកមាន២ហិកតា ឬ១ហិកតា សហគមន៍មិនដកហូតទេ ។ ប្រជាពលរដ្ឋបានធ្វើការដោះដូរនេះដើម្បីបានសិទ្ធកាន់កាប់ តែការអនុវត្តន៍វាផ្ទុយការសន្យាអ្នកខ្លះវាស់វែងមិនមានដីគ្រប់ត្រឹមត្រូវ ហើយអ្នកមានដីតិចតួច ត្រូវក្រុមហ៊ុនសួនមានសម្បត្តិដកហូតទាំងស្រុង ម្យ៉ាងទៀត ពេលប្រជាពលរដ្ឋចុះធ្វើលើដីខ្លួនឯង ត្រូវសមត្ថកិច្ចចាប់វាយខ្នោះដាក់គុក ។ ដូច្នេះសំណូមពរអោយលោកអភិបាលខេត្តជួយអន្តរាគមន៍រកយុត្តិធម៌ អោយបានដីត្រឹមត្រូវ និងវាស់វែងកម្មសិទ្ធិផង បើពុំដូច្នេះ ពួកគាត់ឡើងទៅធ្វើការតវ៉ានៅរាជធានីភ្នំពេញបន្តទៀត។
ពាក់ព័ន្ធករណីនេះ លោកស្រី មួរ សុខហួរ តំណាងរាស្ត្របានចេញមុខគាំទ្រប្រជាជន និងនិយាយថា តើក្រុមហ៊ុនមានសម្បត្តិ ក្រោយពីទទួលដីសម្បទានពីរដ្ឋបានអភិវឌ្ឍន៍អ្វីខ្លះ ហើយការអភិវឌ្ឍន៍ បើប៉ះពាល់ប្រយោជន៍ប្រជាជន ត្រូវតែដោះស្រាយជូនពួកគាត់ ការអភិវឌ្ឍន៍ត្រូវតែចំណេញទាំងសងខាងទើបល្អ ។ មិនត្រូវប្រើប្រព័ន្ធតុលាការ ធ្វើបាបរាស្ត្រនោះទេ បើខុសថាខុស បើត្រូវថាត្រូវ ក្រុមហ៊ុនមួយចំនួនបានខ្ចីដៃតុលាការចាប់រាស្ត្រស្លូតត្រង់យកទៅដាក់គុក សូមបញ្ចប់វប្បធម៌នេះជាបន្ទាន់ ហើយខាងតំណាងរាស្ត្រសង្ឃឹមថា លោកអភិបាលខេត្តរកដំណោះស្រាយជូនប្រជាពលរដ្ឋដោយត្រឹមត្រូវ សូមកុំអោយអ្នកមានទំនាស់ដីធ្លីឡើងទៅភ្នំពេញអី សូមធ្វើការតវ៉ាត្រឹមថ្នាក់ខេត្តបានហើយ។
បន្ទាប់ពីលោកស្រី មួរ សុខហួរ និយាយចប់ ខាងសាលាខេត្តអោយតំណាងប្រជាពលរដ្ឋចំនួន ៦ នាក់ មានឈ្មោះ គយ ជឿន ឈ្មោះឈន ឆាត ឈ្មោះ វង្ស រឿម (ស្រី) ឈ្មោះ ប៉ុល ហាក់ (ស្រី) ឈ្មោះ ស៊ុំ ហៀង ឈ្មោះ កែត រុំ ចូលជួបពីភាក្សា។
តំណាងប្រជាពលរដ្ឋ ចេញពីសាលាខេត្តបាន អោយដឹងថា លោក សឿម ប៊ុនរិទ្ធ នាយកទីចាត់ការសាលាខេត្ត បានអោយប្រជាពលរដ្ឋត្រឡប់ទៅផ្ទះវិញ ចាំរកដំណោះស្រាយអោយ និងជាចម្លើយពិតប្រាកដ ម៉ោង៥ល្ងាច ។ ចំពោះប្រជាពលរដ្ឋមិនព្រមទៅផ្ទះទេ បើមិនមានដំណើស្រាយច្បាស់លាស់ ៕
